ބޮޑެތި ޖަރީމާތަކަށް އިސްލާމްދީނުގައި މާތް ﷲ ކަނޑައަޅުއްވާފައިވާ ހުކުމްތައް، ވަޟުއީ ގާނޫނުތަކުގެ ދަށުން ކުޅޭ ކުޅިވަރަކަށް ހަދައިފި ކަމަށް ވިދާޅުވެ ޖަމިއްޔަތުއް ސަލަފުގެ ޗީފް މާކެޓިންގ އޮފިސަރ ޢަލީ ރަމީޒު ކަންބޮޑުވުންފާޅުކޮށްފިއެވެ.

އެއްޖިންސުން ގުޅުން ހިންގާ މީހުންނަށް ދިނުމަށް އިސްލާމީ ޝަރީޢަތުގައި ކަނޑައަޅުއްވާފައިވާ އަދަބު، ދޫކޮށް، ވަޟުއީ ގާނޫނުގެ ދަށުން އެއް ކުށެއް ކުރި އެކި މީހުންނަށް އެކި އަދަބު ދެމުންދާ މި ދަނޑިވަޅުގައި، އަލީ ރަމީޒު ކުރެއްވި ޓުވީޓެއްގައި ވިދާޅުވީ، މާތް ﷲގެ ހުކުމްތައް ބޮލާލާޖަހައި، ބޮޑެތި ޖަރީމާތަކަށް އިސްލާމްދީނުގައި މާތް ﷲ ކަނޑައަޅުއްވާފައިވާ ހުކުމްތައް، ވަޟައީ ގާނޫނުތަކުގެ ދަށުން ކުޅޭ ކުޅިވަރަކަށް ހަދައިފި ކަމަށެވެ. 

އަދި އެފަދައިން ކަންތައް ކޮށްފައި، މާތް ﷲ ގެ ދަރުބާރުގައި ހުއްޓި ހުންނަންޖެހޭ ދުވަހު ދައްކާނެ އެއްވެސް އުޒުރެއް ނޯންނާނެ ކަމަށާ، އެދުވަހުން އިންސާފު ގާއިމް ކުރެވޭނެ ކަމަށްވެސް އަލީ ރަމީޒު ވިދާޅުވިއެވެ. 

Advertisement

ބަންގްލަދޭޝްގެ ޒުވާނެއްކަމަށްވާ އެމްޑީ އަލަމްގީރް (އަލަމްގިރި) އާއެކު އެއް ޖިންސުން ޖިންސީ ގުޅުން ހިންގި މައްސަލައިގައި ދަޢުވާ އުފުލި ޢަބްދުއްރަޙްމާން ރަފީޢު (ދޮންދިގު) މައްޗަށް ކުށް ސާބިތުވެ, އެއް އަހަރާއި ދެ މަހާއި 12 ދުވަހަށް އޭނާ ޖަލަށްލުމަށް ކްރިމިނަލް ކޯޓުން ހުކުމް ކޮށްފައިވާއިރު، އަލަމްގީރާ ގުޅުން ހިންގި މައްސަލާގައި ކުރީގެ ރައީސް މުހައްމަދު ނަޝީދުގެ ކޮއްކޮ ނާޒިމް ސައްތާރު އަށް އައީ ތިން މަހާއި 26 ދުވަހަށް ގޭބަންދުގެ ހުކުމެކެވެ.

އެއް ކުށެއް ކުރި ދެމީހުންނަށް އިއްވާފައިވާ ހުކުމުގެ ފަރަގު މިހާ ބޮޑުވުމުން ގިނަ ބައެއްގެ ފާޑުކިޔުންތައް އަންނަނީ ސަރުކާރަށާއި، އެ ހުކުމް ކުރި ގާޒީންނަށް އަމާޒުވެފައެވެ.