ވޭތުވެދިޔަ 30 އަހަރު ތެރޭގައި ސަރުކާރު ތަކުން ނުކުރެވުނު ކަންކަން މިސަރުކާރުން ހަތަރު އަހަރު ތެރޭގައި ކުރަމުންދާ ކަމަށް އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެ އެވެ.

ހދ.ހަނިމާދޫ އިންޓަނޭޝަން އެއަރޕޯޓް ތަރައްގީކުރުމަށް އިންޑިއާގެ ޖޭއެމްސީ ޕްރޮޖެކްޓްސްއާ ހަވާލުކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރ ފައްޔާޒު ވިދާޅުވީ، ހަނިމާދޫ އިންޓަނޭޝަން އެއަރޕޯޓް ތަރައްގީކުރުމުގެ މަސައްކަތް ކުރިއަށް ގެންދިޔުމަށްޓަކައި 2018 ވަނަ އަހަރު ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް އިންތިޚާބްވި ދުވަހުން ފެށިގެން މަސައްކަތް ފެއްޓެވިކަމަށެވެ. މިގޮތުން އޭރު އިންޑިއާ ސަރުކާރާއެކު މަޝްވަރާތައްކޮށް އިންޑިއާގެ އެހީގައި މި މަސައްކަތް ކުރެވޭނެކަމުގެ ޔަޤީންކަން ލިބުނުކަން މިނިސްޓަރ ފާހަގަކުރެއްވިއެވެ.

މިއާއެކު ފައްޔާޒު ވަނީ، އަދުގެ ސަރުކާރުގެ އިގްތިސާދީ ހާލަތު ދަށަށް ގޮސް، ދަރަނި އިންތިހާއަށް ބޮޑުވެފައި ވަނިކޮށްވެސް ސަރުކާރުން ލޯނު ނަގާ ކަމަށް އިދިކޮޅުން ދައްކަމުންދާ ވާހަކަތަކަށް ރައްދުދެއްވާފައެވެ. އެގޮތުން ފައްޔާޒު ވިދާޅުވީ ދަރިންގެ ބޮލުގައި ދަރަނި އެޅޭނެ ކަމަށް ބަލައިގެން ތަރައްގީގެ މަޝްރޫއުތައް ނުހިންގައިފިނަމަ އަނެއްކާވެސް "އެ ކުދިން ޖެހޭނީ މާލެއަށް އައިސް ގެއެއްގައި ގުލާނު ކުރަން" ކަމަށެވެ. އަދި ތަރައްގީގެ އެކިއެކި މަޝްރޫއުތައް ހިންގައި ރަށްރަށް ތަރައްގީ ކުރެވެމުން މި ދަނީވެސް ދަރަނި ނަގައިގެން ކަމަށް ފާހަގަކުރެއްވިއެވެ. 

Advertisement

"އަޅުގަނޑުމެންނަށް މަޑުކޮށްލެވިދާނެ ލިބޭ އެއްޗަކުން ފުއްދާލައިގެން ކުރިއަށް އޮތް އަދި ސަތޭކަ އަހަރުން މި އެއާޕޯޓް ހަދާލަން މަޑުކޮށްލަން. އެކަމަކު އަޅުގަނޑުމެން މި ނިންމީ ދަރަނި ނެގޭނެ ގާބިލުކަން ދިވެހިރާއްޖޭގައި ވެސް އެބަހުއްޓޭ. ރާއްޖޭގެ އިގްތިސާދު އޮތީ ބާރަށް ކުރިއަށް، މިއައި ގޮންޖެހުންތަކާއެކު ވެސް މިދަނީ އެ ކަންކަން ކުރަމުން" ފައްޔާޒު ވިދާޅުވި އެވެ.

ފައްޔާޒު އިތުރަށް ވިދާޅުވީ ފާއިތުވި 30 އަހަރު ނުކުރެވުނު ކަންކަން މި ސަރުކާރުގެ ހަތަރު އަހަރުތެރޭގައި ކުރަމުންދާ ކަމަށާއި މިއީ ގަބޫލުކުރަން ބޭނުން ނޫނަސް ފެންނަން އޮތް ހަގީގަތް ކަމަށެވެ. އަދި ކޮވިޑާއެކު ކަންކަން ކުރިއަށް ގެންދަން ބޭނުންވި އެންމެ އަވަސް މިނުގައި ކުރިއަށް ނުގެންދެވުނު ކަމަށާއި ނަމަވެސް ރެޔާއި ދުވާލު އެ ކަންކަން ކާމިޔާބު ކުރަން މަސައްކަތް ކުރަމުންދާ ކަމުގެ ޔަގީންކަން އަރުވާ ކަމަށްވެސް ފައްޔާޒު ވިދާޅުވި އެވެ.

ހަނިމާދޫ އެއަރޕޯޓް ތަރައްޤީކުރުމުގެ މަޝްރޫޢޫއާއެކު މިހާރުވެސް އިންވެސްޓަރުންގެ ޝައުގުވެރިކަން ތިލަދުންމައްޗަށް އިތުރުވަމުން އަންނަކަން ފާހަގަކުރައްވައި ފައްޔާޟު އިތުރަށް ވިދާޅުވީ، އެއަރޕޯޓް ތަރައްޤީކުރުމުގެ މަޝްރޫޢޫއާއެކު އެ ސަރަޙައްދުގައި ގެސްޓްހައުސްތައް އިތުރުވެ، ފަތުރުވެރިކަން ކުރިއަރައިގެންދާނެކަމަށާ، އަދި ބޮޑު ކަންނެލީގެ މަސްވެރިކަން ކުރާ ފަރާތްތަކުން މަސް ބޭރުކުރުމަށް ކުރަންޖެހޭ ޚަރަދުވެސް ކުޑަވެގެންދާނެކަމަށެވެ.

ހަނިމާދޫ އެއަރޕޯޓް ތަރައްޤީކުރުމުގެ މަޝްރޫޢުގެ ދަށުން 2.46 ކިލޯމީޓަރުގެ އައު ރަންވޭއަކާއި އަހަރަކު 1.3 މިލިއަން ފަސިންޖަރުންނަށް ޚިދުމަތްދެވޭނެ ޖާގައިގެ ޓަރމިނަލެއް ޢިމާރާތްކުރެވޭނެއެވެ. މިމަޝްރޫޢު ނިމުމުން ބައިނަލްއަޤްވާމީ ދަތުރުތަކުގައި ބޭނުންކުރާ އެއަރބަސް A320 އާއި ބޮއިންގ 737 މަރުކާގެ ބޯޓުތަކަށް މި އެއަރޕޯޓުން ޚިދުމަތް ދެވޭނެކަމަށް އިކޮނޮމިކް މިނިސްޓްރީން ބުނެއެވެ. އަދި މެދުއިރުމައްޗާއި، ދެކުނު އޭޝިއާ އާއި، ދެކުނު އިރުމަތީ އޭޝިއާ އާއި އިރުމަތީ އެފްރިކާގެ ގައުމުތަކުން ސިދާ ފްލައިޓްތައް ހަނިމާދޫ އަށް އޮޕަރޭޓްކުރުމުގެ ގާބިލުކަން ލިބިގެންދާނެއެވެ. އަދި ބައިނަލްއަޤްވާމީ ދަތުރުތައް ފުޅާކުރުމަށް ބޭނުންވާ އެހެނިހެން ވަސީލަތްތައްވެސް ޤާއިމުވެގެންދާނެކަމަށް އިކޮނޮމިކް މިނިސްޓްރީން ބުނެއެވެ.