ސައުދީ އަރަބިއްޔާގެ ބޮޑުވަޒީރު ކަމުގެ މަގާމަށް ރަސްގެފާނު ސަލްމާން ގެ ދަރިކަލުން އަދި ސައުދީ ވަލީއަހުދު މުހައްމަދު ބިން ސަލްމާން އައްޔަންކުރައްވައިފިއެވެ. 

ސައުދީގެ މީޑިއާ ތަކުން ރިޕޯޓް ކޮށްފައިވާ ގޮތުގައި ސައުދީ ވަލީއަހުދު މުހައްމަދު ބިން ސަލްމާން ބޮޑުވަޒީރުގެ މަގާމަށް އައްޔަން ކުރެއްވުމަށް ރަސްގެފާނު ސަލްމާން އަންގަވާފައިވަނީ މިއަދުގެ ވަގުތެއްގައެވެ. އަދި މީގެ އިތުރުން، ސައުދީ މިނިސްޓަރުންގެ ކައުންސިލް ވެސް އައު ބޮޑު ވަޒީރު މުހައްމަދު ބިން ސަލްމާންގެ ދަށުން މަސައްކަތްކުރައްވާ ގޮތަށް މިނިސްޓަރުންގެ ކައުންސިލް ގެ އޮނިގަނޑު ވެސް ރަސްގެފާނު ވަނީ ބަދަލު ކުރައްވާފައެވެ. 

އަދި މީގެ އިތުރުން ސައުދީ އަރަބިއްޔާގެ ޑިފެންސް މިނިސްޓަރު ގެ ނާއިބުގެ މަގާމުގައި ހުންނެވި ޕްރިންސް ޚާލިދު ބިން ސަލްމާން، ޑިފެންސް މިނިސްޓަރު ކަމަށް އައްޔަން ކުރެއްވުމަށްވެސް ރަސްގެފާނު ވަނީ އަންގަވާފައެވެ.

Advertisement

މީގެ ކުރިން ސައުދީ އަރަބިއްޔާގެ ބޮޑުވަޒީރަކީ ވެސް ރަސްގެފާން ސަލްމާން ބިން އަބްދުލްއަޒީޒް އަލް ސައުދު އެވެ.