އަންނަ ނޮވެމްބަރު މަހު 20 ވަނަ ދުވަހު ޤަތަރުގައި ފެށުމަށް ހަމަޖެހިފައިވާ ފީފާ ވޯލްޑް ކަޕް މުބާރާތާއި ގުޅިގެން ޗައިނާގެ ފަރާތުން ޤަތަރުއަށް ބޮޑު ބިޔަ ދެ ޕެންޑާ ހަދިޔާ ކުރުމަށް ހަމަޖެހިއްޖެއެވެ. 

ޗައިނާއިން ޤަތަރު އަށް ކަނޑައަޅާފައި ހުންނަ ސަފީރު ޒޯ ޖިއާން ވިދާޅުވެފައިވާ ގޮތުގައި "ސުހައިލް" އަދި "ސުރައިޔާ" ނަމަކަށް ކިޔާ މި ދެ ޕެންޑާ އަންނަ މަހު ޤަތަރު އަށް އަންނާނެ ކަމަށެވެ. 

"މިއީ ޗައިނާގެ 1.4 ބިލިއަން މީހުންގެ ފަރާތުން ޤަތަރުގައި ބާއްވާ ވޯލްޑް ކަޕް އަށް ދިން ހަދިޔާއެއް. އަދި މިއީ ޗައިނާ އާއި ޤަތަރު އާއި ދެމެދު އުފެދިފައިވާ އެކުވެރިކަމުގެ ގުޅުމުގެ އައު ރަމްޒަކަށް ވެގެންދާނެކަން ޔަގީން" ޒޯ ޖިއާން ވިދާޅުވި އެވެ. 

Advertisement

ސުހައިލް އަކީ ގަލްފު ސަރަހައްދަށް ފެންނަން ހުންނަ ތަރިތަކުގެ ތެރެއިން އެންމެ އަލިގަދަ ތަރިއަށް ދެވިފައިވާ ނަމަށް ވާއިރު، ސުރައިޔާ އަކީ ތަރީގެ ކްލަސްޓަރ އެއް ކަމަށް ޕްލައިއަޑީޒް ކްލަސްޓަރ އަށް ދެވިފައިވާ ނަމެކެވެ. 

ފީފާ ވޯލްޑް ކަޕް އަށް ޗައިނާ ކޮލިފައި ނުވި ނަމަވެސް، އެގައުމުގެ ކުންފުނި ތަކުން އަންނަނީ އެ މުބާރާތަށް ތައްޔާރުވުމަށް ކުރިއަށް ގެންދާ ބޮޑެތި ޕްރޮޖެކްޓް ތަކުގައި ބައިވެރިވަމުންނެވެ. 

ޤަތަރުގެ އަމީރު ޝެއިޚް ތަމީމް ބިން ހަމަދު އަލް-ޘާނީ ޗައިނާގައި ކުރިއަށް ދިޔަ ވިންޓާ އޮލިމްޕިކްސްގައި ބައިވެރިވެވަޑައިގެންނެވި ފަހުން، މެދު އިރުމައްޗާއިއެކު ޕެންޑާ ކޯޕަރޭޝަން އިފްތިތާހުކުރުމަށް ތައްޔާރު ކަމަށް ޗައިނާގެ ރައީސް ޝީ ޖިންޕިންގ ވަނީ ވިދާޅުވެފައެވެ.