މިއަހަރު ރާއްޖޭގައި މުޅިން އަލަށް 10 ރިސޯޓް ހުޅުވިގެންދާނެކަމަށާ މީގެތެރެއިން 3 ރިސޯޓް މިހާރު ވަނީ ހުޅުވިފައި ކަމަށް ޓޫރިޒަމް މިނިސްޓަރ ޑރ. މައުސޫމް ވިދާޅުވެއްޖެއެވެ.

ޑރ. މައުސޫމް މިފަދައިން ވިދާޅުވީ ޒޫމް މެދުވެރިކޮށް ކުރިއަށް ދިޔަ އޭޝިއަން ޑިވެލޮޕްމަންޓް ބޭންކްގެ 55 ވަނަ ބޯޑް ގަވަނާރސް ބައްދަލުވުމުގެ ސެމިނާރގައި ވާހަކަފުޅުދައްކަވަމުންނެވެ.

"ރީއިމޭޖިނިންގ ޓޫރިޒަމް: ކަމިންގ ބެކް ފްރޮމް ދަ ބްރިންކް" މިމައުޟޫއަށް ކުރިއަށް ދިޔަ މި ސެމިނަރ ގައި ވާހަކަދައްކަވަމުން މިނިސްޓަރު ވިދާޅުވީ، ރާއްޖޭގެ ފަތުރުވެރިކަމަކީ ޤައުމުގެ ޖީޑީޕީގެ %47 ކަމަށްވާއިރު، ދައުލަތައް ލިބޭ އާމްދަނީގެ %46 އަކީ ފަތުރުވެރިކަމުން ލިބޭ އާމްދަނީކަމަށެވެ. އެހެންކަމުން ކޯވިޑް-19 ޕެންޑަމިކްގެ ސަބަބުން އެންމެ ބޮޑަށް އަސަރުކުރި ޤައުމުތަކުގެ ތެރޭގައި ރާއްޖެ ހިމެނޭކަން މިނިސްޓަރ ފާހަގަކުރެއްވިއެވެ.

Advertisement

އެގޮތުން ކޮވިޑް-19 އާއި ގުޅިގެން ރާއްޖޭގެ ބޯޑަރު ބަންދު ކުރުމާއި ގުޅިގެން ފަތުރުވެރިކަމަށް ބޮޑު ގެއްލުމެއް ވެގެން ދިޔައިރު، ބޯޑަރު ހުޅުވި ފަހުންވެސް ދުވަސްތަކެއްވަންދެން ފަތުރުވެރިކަން އޮތީ ވަރަށް ދަށުގައި ކަން މިނިސްޓަރު ފާހަގަކުރެއްވިއެވެ. އެހެންނަމަވެސް، އެހެން ގައުމު ތަކުގެ ބޯޑަރުތައް ހުޅުވި، 2021 ވަނަ އަހަރާއި ހަމައަށް އައި އިރު ރާއްޖޭގެ ފަތުރުވެރިކަން ހަމައަކަށް އެޅިގެން ދިޔަ ކަމަށް މިނިސްޓަރު ވިދާޅުވިއެވެ. 

މީގެ އިތުރުން، ދިވެހިރާއްޖޭގައި ފަތުރުވެރިކަން ކުރިއެރުވުމަށް ކުރެވެމުންދާ މަސައްކަތްތަކާއި ގުޅިގެން ވާހަކަދައްކަވަމުން މިނިސްޓަރު ވިދާޅުވީ، މިއަހަރު ރާއްޖޭގައި މުޅިން އަލަށް 10 ރިސޯޓް ހުޅުވިގެންދާނެކަމަށެވެ. އަދި މީގެތެރެއިން 3 ރިސޯޓް މިހާރު ހުޅުވިފައި ވާއިރު، އަންދާޒާއަކީ މީގެފަހުން ކޮންމެ އަހަރަކު ފަތުރުވެރިކަމަށް 8000 އެނދު ނެރުން ކަމަށެވެ. 

މިއާއެކު މިނިސްޓަރ ވަނީ ރާއްޖެ އަންނަ އަހަރާއި ކުރިމަތިލާނީ 5 ވަނަ ޓޫރިޒަމް މާސްޓަރ ޕްލޭންއާއި އެކުގައިކަމަށާ، މި މާސްޓަރ ޕްލޭންގެ ތެރެއިން ކުރިއަށް އޮތް 5 އަހަރު ދުވަހުގެ ތެރޭގައި ފަތުރުވެރިކަމުން ހާސިލްކުރަން ބޭނުންވާ ކަންކަމަށް އަލިއަޅުވާލެވިގެން ދާނެކަމަށެވެ.