ޢަރަބިއްޔާ ސުކޫލުގެ އައު ޢިމާރާތް އެޅުމަށް ދިން ބިމުގައި އިތުރު ސުކޫލެއް އަޅާކަމަށް ސަރުކާރުން ހާމަކުރުމާއި ގުޅިގެން ޖަމިއްޔަތުއް ސަލަފުގެ ރައީސް އައްޝައިޚް އަބްދުﷲ ބިން މުހައްމަދު ސަރުކާރަށް ފާޑުވިދާޅުވެއްޖެއެވެ. 

މީގެ 8 އަހަރު ކުރިން ބޭނުންކުރަން ފެށި އަރަބިއްޔާ ސުކޫލުގެ އިމާރާތުގެ ތަނބުތަކުގައި ރެނދު އަޅައި، އެ އިމާރާތް ބޭނުންކުރުން ނުރައްކަލަަކަށްވާ މިންވަރަށް އިމާރާތަށް ގެއްލުން ލިބުމާ ގުޅިގެން އެ އިމާރާތުގައި އަރަބިއްޔާ ދަރިވަރުން ކިޔެވުންވަނީ ހުއްޓާލާފައެވެ.

މިހާރު ވަގުތީ ގޮތުން އަރަބިއްޔާގައި ކިޔަވަމުންދާ 800 އެއްހައި ދަރިވަރުން ކިޔެވުން ކުރިއަށްގެންދަނީ ކުރިން ފޮރިން މިނިސްޓްރީ ހިންގި އިމާރާތުގައެވެ.

Advertisement

އަދި އަރަބިއްޔާގެ ދަރިވަރުންނަށް ދާއިމީ ހައްލެއް ހޯދައިދެއްވާނެކަމަށް ރައީސް އިބްރާހިމް މުޙައްމަދު ޞާލިޙު، އަދި އެޑިއެކޭޝަން މިނިސްޓަރު ޑރ.ޢާއިޝަތު އަލީ ވައުދުވެވަޑައިގެންފައިވާއިރު، އެ ދަރިވަރުންނަށް ހައްލެއް ހޯދައިދިނުމުގެ ގޮތުން މާލޭގައި އަރަބިއްޔާ ސުކޫލުގެ އައު އިމާރާތް އަޅާނެ ބިމެއްގެ ގޮތުގައި ބާ ޖަމާލުއްދީން ބިން ކަނޑައަޅާފައިވާ ކަމަށް ސަރުކާރުން ވަނީ މިދިޔަ މާރިޗު މަސްތެރޭ ހާމަކޮށްފައެވެ. 

އެހެން ނަމަވެސް، ނިމިދިޔަ ސެޕްޓެމްބަރު މަހުގެ 29 ވަނަ ދުވަހު، ބާ ޖަމާލުއްދީންގެ އިމާރާތުގައި ސުކޫލު އެޅުމަށް ކޮންޓްރެކްޓަރާއި ހަވާލު ކުރެވުނު އިރު ހަވާލުކޮށްފައި ވަނީ، އަރަބިއްޔާގެ ސުކޫލުގެ އިތުރުން ޖަމާލުއްދީން ސްކޫލުގެ އެނެކްސް އިމާރާތްވެސް އެތަނުގައި އަޅާށެވެ. 

އެކަމަށް ފާޑުވިދާޅުވެ، ޝެއިޚް އަބްދުﷲ ކުރެއްވި ޓުވީޓެއްގައި ވިދާޅުވީ، ބައުޖަމާލުއްދީންގެ ބިން، ޢަރަބިއްޔާގެ އައު ޢިމާރާތް އެޅުމަށްޓަކައި ދެއްވި ޚަބަރު އަޑުއެހިތާ އަދި އަހަރެއްވެސް ނުވަނީސް، ފެނިގެން މި ދިޔައީ އެބިމުގައި 2 ސްކޫލް އެޅުމުގެ ވާހަކަ ކަމަށެވެ. 

"ދެން އިވޭނީ އެއަރޕޯޓް އަޅާވާހަކަ ތޯއްޗެކެވެ!" ޝެއިޚް އަބްދުﷲ ވިދާޅުވިއެވެ. 

ނާ ޖަމާލުއްދީން ގައި އަރަބިއްޔާ އައު އިމާރާތާއި، ޖަމާލުއްދީން އެނެކްސް އެޅުމުގެ މަޝްރޫއުގެ އަގަކީ 168.53 މިލިއަން ރުފިޔާއެވެ. އެ ދެ ސުކޫލުގެ މަސައްކަތް އަމިން ކޮންސްޓްރަކްޝަންއާ ހަވާލުކުރީ 420 ދުވަހުގެ ތެރޭގައި ނިންމުމަށެވެ.

ވުމާއެކު އަހަރުގެ ޑިސެމްބަރު މަހުގެ ފަހުކޮޅު އިމާރާތުގެ މަސައްކަތް ނިންމައި 2024ގެ ދެވަނަ ޓާމް ކިޔެވުން ފެށޭއިރު އިމާރާތް ބޭނުންކުރެވޭނެ ކަމަށް އުއްމީދުކުރާ ކަމަށް މިނިސްޓްރީން ބުނެއެވެ. 

މި ޕްރޮޖެކްޓްގެ ދަށުން އަރަބިއްޔާގެ އައު އިމާރާތުގައި 40 ކްލާސްރޫމް، މަލްޓިޕާޕަސް ހޯލް، ހަތަރު ލިފްޓް އަދި ވައްޒަފުން ޕާކުކުރާނެ ޕާކިން އޭރިއާއެއް ހުންނާނެ ކަމަށް މިނިސްޓްރީން ބުނެއެވެ.