މި އަހަރުގެ ޖޫން މަހުގެ ފަހުކޮޅުން ފެށިގެން ޕާކިސްތާނަށް ކުރި ގަދަ ވިއްސާރައިގައި އެ ގައުމުގެ ބޮޑު ސަރަހައްދެއްގައި ފެން ބޮޑުވުމުގެ ސަބަބުން ހާލުގައި ޖެހުނު މީހުންނަށް އެހީވުމަށް ބޭއްވި ޓެލެތޯންގެ އެހީގައި ޕާކިސްތާން އެހީ ފަންޑަށް 3.8 މިލިއަނަށްވުރެ ގިނަ ރުފިޔާ ލިބިއްޖެއެވެ.

"ޕާކިސްތާނު މޯލްޑިވްސް ފްރެންޑްޝިޕް އެސޯސިއޭޝަން" (ޕީއެމްއެފްއޭ) އިން އިސްނަގައިގެން ރާއްޖޭގައި ހަރަކާތްތެރިވާ ގިނަ މީޑިއާތަކަކާއި އެކު ކުރިއަށްގެންދިޔަ މި ހަރަކާތް ފަށާފައިވަނީ އިއްޔެ ހެނދުނު 8:00 ގައެވެ. އަދި މި ޓެލެތޯން ރޭ 12:00 އާ ހަމައަށް ކުރިއަށް ގެންގޮސްފައިވާއިރު، މާލޭގައި ބެހެއްޓިފައި ހުރި ފަންޑު ފޮށިތަކުންވެސް ޖުމުލަ 2 ލައްކައަށްވުރެ ގިނަ ރުފިޔާ ލިބިފައިވާ ކަމަށް ޕާކިސްތާނު މޯލްޑިވްސް ފްރެންޑްޝިޕް އެސޯސިއޭޝަންގެ ފަރާތުން މައުލޫމާތު ދެއެވެ. 

އިއްޔެ ކުރިއަށްދިޔަ މި ޓެލެތޯން މާލޭގެ އިތުރުން ރާއްޖޭގެ އެކި ކަންކޮޅުތަކުގައިވެސް ކުރިއަށް ދިޔައިރު، އޭގެތެރެއިން ބައެއް ރަށްރަށުން ފަންޑަށް ލިބުނު ފައިސާ އެކި ސަބަބުތަކާއިހުރެ ފޮނުވިފައި ނުވާ ކަމަށްވެސް އެ އެސޯސިއޭޝަނުން ބުނެއެވެ. އަދި އެފައިސާ ނުލައިވެސް  ޓެލެތޮންގެ 18 ގަޑިއިރުތެރޭގައި 3.8 މިލިއަން އަށްވުރެ ގިނަ ރުފިޔާ ލިބިފައިވާ ކަމަށް ޕީއެމްއެފްއޭގެ ރައީސް މަސްއޫދު އިމާދު ކުރެއްވި ޓުވީޓެއްގައި ވިދާޅުވެފައި ވެއެވެ. 

ޕާކިސްތާނަށް އެހީވާން ބޭނުން ފަރާތްތަކަށް އަދިވެސް އެ ފުރުސަތު އެބައޮތެވެ. މިގޮތުން ހަބީބް ބޭންކުގައި ހުޅުވާފައިހުރި އެކައުންޓަކަށް ފައިސާ ފޮނުވައިގެން އެހީތެރިވެވޭނެއެވެ.

އެކައުންޓް ނަން: ޕްރައިމް މިނިސްޓަރސް ފްލަޑް ރިލީފް ފަންޑް 2022

އެކައުންޓް ނަމްބަރު: 007000500303-2050

މި އަހަރުގެ ޖޫން މަހުގެ ފަހުކޮޅުން ފެށިގެން ޕާކިސްތާނަށް ކުރި ގަދަ ވިއްސާރައިގައި އެ ގައުމުގެ ބޮޑު ސަރަހައްދެއްގައި ފެން ބޮޑުވެ އެތައް ބަޔަކު ހާލުގައި ޖެހިފައިވާއިރު، އެގައުމުގައި ނުރައްކާތެރި ބަލިތައް މިވަނީ ފެތުރެން ފަށާފައެވެ.

އެގޮތުން ބޭރަށް ހިންގުމާއި، ކޮލެރާއާއި، ހަމުގެ ބަލިތަކާއި، މެލޭރިއާ ފަދަ އެތައް ބަލިތަކެއް މިހާރު ވަނީ ފެތުރެން ފަށާފައެވެ.