ކޮމަންޑޫ ދާއިރާގެ މަޖިލިސް މެމްބަރު ހޮވުމަށް ބޭއްވި ބައި-އިލެކްޝަނަށް ސަރުކާރުން 350 މިލިއަން ރުފިޔާ ޚަރަދުކޮށްފައިވާކަމަށާއި، އެކަމުން ނެރެދެވުނު ނަތީޖާއެއް ނެތްކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ވިދާޅުވެއްޖެއެވެ. 

ތާރިގު މިފަދައިން ވިދާޅުވެފައިވަނީ ދައުލަތުގެ މާލިއްޔާއިން ސަރުކާރުން އިސްރާފުކުރަމުންދާއިރު، ސަރުކާރުގެ ޚަރަދުތައް ފޫބެއްދުމަށް ރައްޔިތުން އަތުން ނަގާ ޓެކްސް ބޮޑު ކުރުމަށް ހުށައެޅުމުން ނުރުހުން ފާޅުކުރައްވާ މަޖިލީހުގައި ވާހަކަދައްކަވަމުންނެވެ. 

ކޯވިޑް ނަވާރައިގެ ދުވަސް ވަރުގައި ކޮމަންޑޫގެ ބައި-އިލެކްޝަނަށް ސަރުކާރުން 350 މިލިއަން ޚަރަދުކޮށްފައިވާަމަށް ތާރިގު ވިދާޅުވިއެވެ. އެހެން ނަމަވެސް އެހާ ބޮޑު ޙަރަދެއް ކޮށްފައިވާއިރު، ކޮމަންޑޫ ދާއިރާއަށް ވީ ވައުދުތައް މިހާތަނަށްވެސް ފުއްދާދެވިފައި ނުވާކަން ތާރިގުގެ ވާހަކައިގައި ފާހަގަކުރެއްވިއެވެ. 

Advertisement

ތާރިގު ވިދާޅުވީ މިއީ ކޮވިޑުގެ ހާލަތުގައި އެއް ދާއިރާއަކަށް ސަރުކާރުން ކުރި ޚަރަދުކަމަށެވެ. 

އެ ގޮނޑި ހޯދުމަށް ސަރުކާރުން އެހާ ބޮޑު ޚަރަދެއް ކޮށްފައިވަނީ އެމްޑީޕީގެ ސުޕަރ މެޖޯރިޓީ އެމްޑީޕީގެ އަތުގައި އޮތްވާ ކަމަށް ތާރިގު ވަނީ ފާހަގަކުރައްވާފައެވެ. 

ސިޔާސީ މަގްސަދުތައް ހާސިލުކުރުމަށް ޚަރަދުކުރަންވީމާ ސަރުކާރުން އެއްވެސް ވަރަކަށް ބަލާ ނުލާއިރު، ރައްޔިތުންގެ އަތުން ޓެކްސް ނެގުމަށް ހުށައެޅުމަކީ ބަލައިގަނެވޭނެ ވާހަކައެއް ނޫންކަމަށް ތާރިގު ވަނީ ވިދާޅުވެފައެވެ. އަދި އެ ބިލު ބޭރުކުރުމަށްވެސް އޭނާ ވަނީ ގޮވާލައްވާފައެވެ.