މުވައްޒަފުންތަކަކަށް ޖިންސީ ގޯނާ ކުރި މައްސަލައިގައި، ދައުލަތުން ކުރީގެ ޓޫރިޒަމް މިނިސްޓަރު އަލީ ވަހީދުގެ މައްޗަށް އުފުލި ދައުވާތައް ކްރިމިނަލް ކޯޓުން އަނބުރާ ފޮނުވާލައިފި އެވެ.

އަލީ ވަހީދުގެ މައްސަލަތައް އަނބުރާ ޕްރޮސެކިއުޓަރ ޖެނެރަލްގެ އޮފީހަށް ފޮނުވީ މައްސަލައިގެ ޝަރީއަތް ކުރިއަށް ގެންދެވޭނެ ގޮތެއް ނުވުމުންނެވެ. އަލީ ވަހީދު ކޯޓަށް ހާޒިރު ކުރުމަކީ ދައުލަތުގެ ޒިންމާއެއް ނަމަވެސް އެޒިންމާ ދައުލަތައް އަދާކުރެވިފައެއް ނުވެއެވެ.

2020 ވަނަ އަހަރު، ޓޫރިޒަމް މިނިސްޓަރު ކަމުގައި ހުންނެވި އިރު އެ މިނިސްޓްރީގެ އަންހެން މުވައްޒަފުންތަކަކަށް ޖިންސީ ގޯނާ ކުރި ކަމަށް ބުނާ މައްސަލަ އަކާއި ގުޅިގެން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވަނީ އަލީ ވަހީދު އެ މަގާމުން ވަކިކުރައްވާފައެވެ. 

އެ މައްސަލަ ފުލުހުން ތަހުގީގުކޮށް ޕީޖީ އޮފީހަށް ފޮނުވުުމުން އަލީ ވަހީދުގެ މައްޗަށް ޖިންސީ ކުށުގެ ތަފާތު ހަތް ދައުވާއެއް އެ އޮފީހުން އުފުލި އެވެ. އެއީ ސާބިތުވެއްޖެ ނަމަ 21 އަހަރަށް އޭނާ ޖަލަށްލެވޭ ވަރުގެ ދައުވާތަކެކެވެ. އެހެންނަމަވެސް، އެ މައްސަލަ ކޯޓުގައި އޮއްވައި އޭނާ ފިއްލަވައިގެން އިނގިރޭސިވިލާތަށް ދިރިއުޅުން ބަދަލުކުރެއްވި ފަހުން އެ މައްސަލައިގެ ޝަރީއަތް ކުރިއަކަށް ނުދެ އެވެ.

ރާއްޖޭން ބޭރަށް އަލީ ވަހީދު ވަޑައިގަތީ ކްރިމިނަލް ކޯޓުން އެ ހުއްދަ ދިނުމުންނެވެ. ނަމަވެސް ހުއްދަ ދިން ހަތަރު މަހުގެ މުއްދަތު ފަހަނައެޅި ފަހުން ވެސް އޭނާ ރާއްޖެ ވަޑައިގެންފައި ނުވެއެވެ. 

އަލީ ވަހީދު ފިއްލެވި ފަހުން އޭނާ ޝަރީއަތްތަކަށް ޗިޓު ފޮނުވުމުން ބައެއް އަޑުއެހުންތަކަށް އޭނާ ހާޒިރެއް ނުވެ އެވެ. އަދި ފަހުން އެއްވެސް ގޮތަކަށް ޗިޓުތަކަށް އިޖާބައެއް ނުދެއްވަ އެވެ. 

އެކަމާ ގުޅިގެން އަލީ ވަހީދު ރާއްޖެ ގެންނަން އިންޓަޕޯލްގެ ރެޑް ނޯޓިސް ނެރެފައިވާ ކަމަށް މިދިޔަ މާޗް މަހުގެ 03 ވަނަ ދުވަހު ދިވެހި ފުލުހުން ބުންޏެވެ. ނަމަވެސް އަދިވެސް އިންޓަޕޯލްގެ ވެބްސައިޓުން އަލީ ވަހީދުގެ ރެޑް ނޯޓިސް ފެންނާކަށް ނެތެވެ.

އަލީ ވަހީދަށް ކުރާ ތުހުމަތުތަކަށް އޭނާ އިންކާރު ކުރައްވައެވެ. އަލީ ވަހީދު ވިދާޅުވަނީ އޭނާ ފްރޭމް ކޮށްފައިވާ ކަމަށެވެ. އެއީ ސީދާ ކޮން ބަޔަކު ކުރިކަމެއް ކަމަށް ވިދާޅުނުވިޔަސް އެމްޑީޕީ ބަޔަކު އަޑީގައި ތިބެގެން ކުރި ކަމެއް ކަމަށް އޭނާ ވިދާޅުވެފައި ވެއެވެ.