ސުކޫލުތައް ނިންމާ މޮޅެތި ކުދިން ތަޢުލީމީ ދާއިރާއަށް ޝައުވެރި ނުވާ ބައެއް ސަބަބުތައް ޓީޗާސް އެސޯސިއޭޝަން އޮފް މޯލްޑިވްސް (ޓީއޭއެމް) އިން ހާމަކޮށްފިއެވެ. 

މިއަދު ފާހަގަކުރަމުންދާ ބައިނަލްއަގުވާމީ ޓީޗަރުންގެ ދުވަހާއި ގުޅިގެން ޓީއޭއެމް އިން ނެރުނު ބަޔާނެއްގައި ވަނީ ދިމާވާ އެކިއެކި ބޮޑެތި ގޮންޖެހުންތަކާ ވެސް ކެރިގެން ޓީޗަރުން ކުރިމަތިލާ ކަން ފާހަގަކޮށް ޓީޗަރުންގެ ބުރަ މަސައްކަތްތަކަށް، ދިވެހި ގައުމީ ބަތަލުންގެ ދަރަޖަ ޓީޗަރުންނަށް އަރުވަންޖެހޭ ކަމަށް ގަބޫލު ކުރާ ކަމަށް ބުނެފައެވެ. 

މިއާއެކު އެ އެސޯސިއޭޝަންގެ ބަޔާނުގައި ބުނީ، ތައުލީމީ ދާއިރާ އަށް މިއަދު ކުރިމަތިވެފައިވާ އެންމެ ބޮޑު ގޮންޖެހުމަކީ، ސުކޫލުތައް ނިންމާ މޮޅެތި ދަރިވަރުން ތައުލީމީ ދާއިރާއަށް ޝައުގުވެރިކަން ނެތްކަން ކަމަށެވެ. 

Advertisement

"މިއެސޯސިއޭޝަނުން ހޯދު ހޯދުންތަކުން ފާހަގަވި އެއްކަމަކީ، ސުކޫލުތައް ނިންމާ މޮޅެތި ދަރިވަރުން މި ދާއިރާއަށް ޝައުގުވެރިނުވާ މައިގަނޑު އެއް ސަބަބަކީ ޓީޗަރުން ލައްވާ "އަން ސްކިލްޑް" މަސައްކަތް ކުރުވާތީއެވެ. އަނެއް ކަމެއްގެ ގޮތުގައި ފާހަގަވި ކަމަކީ، ޓީޗަރުންނަކީ ހުކުރު ހޮނިހިރު ނާންނަ، ދިރިއުޅޭ ގެއަކީވެސް ސުކޫލު ކަމަށް ހަދައިގެން އުޅެންޖެހިފައިވާ ބަޔަކަށް ވުމެވެ." ރަން ވަނަ ހޯދާ ދަރިވަރުން ތައުލީމީ ދާއިރާއަށް ޝައުގުވެރި ނުވާ ސަބަބު ހާމަކުރަމުން ޓީއޭއެމް އިން ބުނެފައިވެއެވެ. 

ޓީޗަރުން ޝަރަފުވެރި ބަޔަކަށް ހެދުމަކީ އެމީހުންގެ މާލީ ފުދުންތެރިކަން އިތުރު ކުރުމުން ކަމަށް ބައެއް މީހުންނަށް ހީވެފައި އޮތް ނަމަވެސް، އެ ފުދުންތެރިކަމާއި އެކީ މަސައްކަތް ކުރެވޭނެ މާހައުލާއި ވަސީލަތްތައް ވެސް ލިބެންޖެހޭ ކަމަށް އެ ބަޔާނުގައި ފާހަގަކޮށްފައިވެއެވެ. އާދި އެއާއެކު ފަންނީ މަސައްކަތް ކުރެވޭނެ ފުރުސަތު ވެސް ޓީޗަރުންނަށް ތަނަވަސްވާންޖެހޭ ކަމަށް އެ ބަޔާނުގައި ބުނެފައިވެއެވެ. 

"ގައުމެއް ބިނާ ކުރުމުގެ ބިންގާ އެޅޭ ހިސާބަކީ ތައުލީމި ނިޒާމް ކަމަށް ވީ ހިނދު, އެކަން ކޮށްދެއްވަން ތިބި ބަޔަކީ ޓީޗަރުންނެވެ. ޓީޗަރުންނަކީ ކަމަށް ގާބިލު ބަޔަކަށް ވުމާއި، އެމީހުންގެ ފަންނިއްޔާތު ކުރިއެރުވޭނެ ފުރުސަތު ރަނގަޅަށް ލިބިގެން މެނުވީ، ގައުމެއްގެ ކުރިމަގު އުޖާލާ ވުމެއް ނެތެވެ." ޓީއޭއެމްގެ ބަޔާނުގައި ވެއެވެ. 

ވުމާއެކު ކުދިންގެ ވިސްނުމާއި ހުނަރުތައް ތަރައްގީ ކުރުމަށް ފަންނީ ގޮތެއްގައި މަސައްކަތް ކުރެވޭނެ ފަހިމަގު ޓީޗަރުންނަށް ފަހިކޮށްދީގެން މެނުވީ އުޖާލާ މާދަމާއެއް ނުލިބޭނެ ކަމަށްވެސް ޓީއޭއެމްއިން ފާހަގަކޮށްފައިވެއެވެ.