ދިވެހިރާއްޖޭގެ އަންނަން އޮތް ޖީލުތައް ހައްދު ފަހަނައަޅައި ދިޔުމުން ސަލާމަތް ކުރުމަށް އެންމެ ބޮޑު ބާރެއް އޮތީ ޓީޗަރުންގެ އަތްމަތީގައި ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ. 

މިއަދު ފާހަގަކުރަމުންދާ ބައިނަލްއަގުވާމީ ޓީޗަރުންގެ ދުވަހުގެ ތަހުނިޔާ އަރިސްކުރައްވައި ރައީސް ނަޝީދު ކުރެއްވި ޓުވީޓެއްގައި ވިދާޅުވީ، ކުއްޖެއްގެ ހަޔާތުގެ ތަޞައްރަފް ފުދި އެކުއްޖާ ބޮޑު މީހަކަށް ވާންދެން ކުއްޖާގެ ގިނަ ވަގުތު ހޭދަ ކުރެވިގެން ދަނީ ޓީޗަރުންނާއި އެކުގައި ކަމަށެވެ. 

ވުމާއެކު، ރާއްޖޭގެ އަންނަން އޮތް ޖީލުތައް ހައްދު ފަހަނައެޅި ވިސްނުމަށް ދޫނުކުރުމަށް އެޅެން އޮތް އެންމެ ބޮޑު ބާރެއް އެޅެވޭނީ ޓީޗަރުންނަށް ކަމަށް ވެސް ރައީސް ނަޝީދު ވިދާޅުވިއެވެ. 

Advertisement

ރައީސް ނަޝީދަކީ ދިވެހިރާއްޖޭގައި ހައްދުފަހަނަޅާފައިވާ ފިކުރު އޮތް ކަމަށާ ނައްތާލަންޖެހޭ ކަމަށް ތަކުރާރުކޮށް އެކި ތަންތަނުގައި ވާހަކަދައްކަވަމުން ބޭފުޅެކެވެ. އެފަދަ ވާހަކަ ތަކުގައި އެމަނިކުފާނު "ހައްދުފަހަނަ އެޅުން" މާނަ ކުރައްވާ ގޮތުގެ ސަބަބުން ގިނަ ޢިލްމުވެރިންނާއި، އާއްމުންގެ ނުރުހުންވެސް އެމަނިކުފާނަށް އަންނަނީ އަމާޒުވަމުންނެވެ.