ކުރީގެ ރައީސް ޔާމީން އަބްދުލްގައްޔޫމްގެ ވެރިކަމުގައި ވެލާނާ އިންޓަނޭޝަނަލް އެއާޕޯޓުގައި ތަރައްގީކުރި އައު ރަންވޭއިން ރަމްޒު ކޮށްދެނީ ރައީސް ޔާމީން އަކީ ޒަމާނީ ތަރައްގީގެ ބާނީކަން ކަމަށް އެމަނިކުފާނުގެ ފުރަތަމަ ނައިބު ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ. 

ރައީސް ޔާމީންގެ ވެރިކަމުގައި، ޗައިނާގެ ބީޔޫސީޖީ ކުންފުންޏާ ހަވާލުކޮށްގެން ތަރައްގީކުރިމުގެ މަސައްކަތުގެ ބޮޑުބައި ނިމި، ޓެސްޓް ފްލައިޓް ވެސް ޖައްސާފައިވަނިކޮށް، ވެރިކަން ބަދަލު ވުމުގެ ސަބަބުން އެ ރަންވޭ ރަސްމީކޮށް ހުޅުވުން މިހާތަނަށް ލަސްވެފައި ވާއިރު، މިއަދު ހެނދުނު އެތަން ވަނީ ރަސްމީކޮށް ހުޅުވާފައެވެ. 

އެކަމާއި ގުޅިގެން ޑރ. ޖަމީލް ކުރެއްވި ޓްވީޓެއްގައި ވިދާޅުވީ، އެއްވެސް ބަހުސެއް ނެތް ގޮތުގައި، ވީއައިއޭގެ އައު ރަންވޭ ކަށަވަރުކޮށްދެނީ ރައިީސް ‎ޔާމީން އަކީ ޒަމާނީ ތަރައްޤީގެ ބާނީކަންކަމަށެވެ.

Advertisement

އަދި ކުރީގެ ރައީސް އިބްރާހިމް ނާސިރު އާއި ރައީސް ޔާމީން އަކީ އެހެން ލީގެއްގެ ވެރިން ކަމަށާ، އެހެންނަމަވެސް، މިހާރުގެ ރަައީސުލްޖުމްހުރިއްޔާ އިބްރާހީމް މުހައްމަދު ޞާލިހު ހަރު ކޮންނަވަނީ އެމަނިކުފާނުގެ މިންވަރުން ކަމަށް ވިދާޅުވެ ޖަމީލް ވަނީ ރައީސް ޞާލިހަށް ފާޑުވިދާޅުވެފައެވެ.

"މިހާރުގެ ވެރިމީހާ ހަރުކޮންނަނީ އެބޭފުޅާގެ މިންވަރުން. ކްލާސްރޫމް، ބަސްހުއްޓި، އިންޖީނުގެ، ރީބްރޭންްޑްކުރުން." ޑރ. ޖަމީލް ވިދާޅުވިއެވެ. 

ޖަމީލް އިތުރަށް ވިދާޅުވީ ކުރިއަށް އޮތް 2023 ވަނަ އަހަރުގައި، ވެރިކަމަށް ރައީސް ޔާމީން އިންތިޚާބުކުރަން ދިވެހިން ބޭނުންވަނީ އެމަނިކުފާނަކީ ވިޝަނަރީ، ކެރުންތެރި، ދިވެހިންނަކީ އެހެން ގައުމުތަކަށްވުރެ ދަށް، އިންފީރިއަރ ބައެއްކަމަށް ގަބޫނުކުރައްވާ ބޭފުޅަކަށް ވާތީކަމަށެވެ.

"އާރަންވޭ އަކީ މިދިޔަ 60 އަހަރުތެރޭގައި އިގްތިޞާދަށް ވެރިޔަކު ކުރެއްވި އެންމެ ބޮޑު އެއް މަސައްކަތް." ޑރ. ޖަމީލް ވިދާޅުވި އެވެ. 

ކުރީގެ ރައީސް ޔާމީން އަބްދުލްގައްޔޫމްގެ ވެރިކަމުގައި ތަރައްގީކުރި އާ ރަންވޭ އެޅުމުގެ މަސައްކަތް 2017 ވަނަ އަހަރު ފެށިއިރު، 2018 ވަނަ އަހަރު ރަންވޭގެ މަސައްކަތް ނިންމައި އެ އަހަރުގެ ސެޕްޓެމްބަރުމަހުގެ 18 ވަނަ ދުވަހު ވަނީ ޓެސްޓް ފްލައިޓް ޖައްސާފައެވެ. 

އައު ރަންވޭ ތަރައްގީކުރުމުގެ މަޝްރޫއަށް ގާތްގަނޑަކަށް 373 މިލިއަން ޑޮލަރު ނުވަތަ 5.7 ބިލިއަން ރުފިޔާ ވަނީ ޚަރަދުވެފައެވެ. ދިގުމިނުގައި 3400 މީޓަރު އަދި ފުޅާމިނުގައި 65 މީޓަރުގެ ކޯޑް-އެފްގެ މިންގަނޑަށް ފެތޭ ގޮތަށް އަޅާފައިވާ ރަންވޭއެކެވެ. މިރަންވޭ މިއަދު ބޭނުން ކުރަން ފެށުމާއި އެކު ވެލާނާ އިންޓަރނޭޝަނަލް އެއާޕޯޓަށް ގަޑިއެއްގެ އިރުގެ ތެރޭގައި ޖައްސައި އަދި ފުރާ ފުލައިޓްތަކުގެ އަދަދު 8 އިން 20ށް ވުރެ މަތިވާނެއެވެ. އަދި މަތިންދާ ބޯޓު ޖެއްސުމަށްފަހުގައި ރަންވޭ ހުސްކުރުމަށް ހޭދަވާ 10 ވަރަކަށް މިނެޓް 2 މިނިޓަށް ކުރުވެ، ފްލައިޓް ޑިލޭވުމަށްވެސް ހައްލެއް ލިބިގެންދާނެއެވެ.