"މަގޭ ދަރިފުޅާ" ޕްރޮގްރާމާއެކު، ޖަމިއްޔަތުއްސަލަފުން ކުރިއަށް ގެންދާ އެންމެ ބޮޑު، ދީނީ، އިޖުތިމާޢީ ހަރަކާތް ’ސަލަފް ރިޙްލާ‘ މިރޭ ރ. އަތޮޅުގައި އިފްތިތާޙުކޮށްފިއެވެ. 

ރ. އުނގޫފާރު އިސްލާމީ މަރުކަޒުގެ ކުރިމަތީގައި ކުރިއަށް ދިޔަ މި ޕްރޮގްރާމްގައި، ރާއްޖޭގެ ފުންނާބު އުސް ދީނީ އިލްމުވެރިއެއް ކަމަށްވާ އައްޝައިޚް ޢަލީ ޒާހިރު ބިން ސަޢީދު ޤާސިމް އާއި، އަލް ޤާރީ މުހައްމަދު ތައުފީގުގެ އިތުރުން ޖަމިއްޔަތުއް ސަލަފުގެ ޗީފް މާކެޓިންގ އޮފިސަރ ޢަލީ ރަމީޒު ވަނީ ބައިވެރިވެވަޑައިގެންފައެވެ. ދަރިން ތަރުބިއްޔަތުކުރުމާއި ގުޅުންހުރި މުހިންމު މަޢުލޫމާތު ތަކެއް ހިއްސާ ކުރެވިގެން ދިޔަ މި ޕްރޮގްރާމް އަޑުއެހުމަށް ގިނަ އަދަދެއްގެ އާއްމުން ވަނީ އިސްލާމީ މަރުކަޒު ސަރަހައްދަށް އެއްވެފައެވެ. 

އުނގޫފާރުގައި ކުރިއަށް ދިޔަ މި ޕްރޮގްރާމްގެ އިތުރުން މިރޭ ރ. މަޑުއްވަރީގައި ޝައިޚް އަޙްމަދު ސަމީރުގެ ބޮޑު ދަރުސް ”ދޫ ރައްކާތެރި ކުރުން“ އަދި ރ. ހުޅުދުއްފާރުގައި ”ރުޤްޔާ ފޯރަމް“ އެއް ވެސް ވަނީ ކުރިއަށް ގެންގޮސްފައެވެ.

Advertisement

ރާއްޖޭގައި ދަޢުވަތުގެ މައިދާނުގައި އެންމެ އިސްކޮށް ހަރަކާތްތެރިވާ ޖަމްޢިއްޔަތުއް ސަލަފްއާއި ރ. އަތޮޅުގެ އެކި ރަށްތަކުގެ ކުލަބު ޖަމްޢިއްޔާތަކާއި މުއައްސަސާތައް ގުޅިގެން ކުރިއަށް ގެންދާ މި ޕްރޮގުރާމުގެ ތެރެއިން ރ. އަތޮޅުގެ ހުރިހާ ރަށެއްގައިވެސް އެކި ހަރަކާތްތައް ކުރިއަށް ގެންދާ ގޮތަށް ވަނީ ހަމަޖެހިފައިއެވެ. އެގޮތުން އެކި ރަށްތަކުގައި ދީނީ ދަރުސްތަކުގެ އިތުރުން، އެކި ކަހަލަ ކުރު ކޭމްޕުތައް އޮންނާނެއެވެ.

ސަލަފު ރިޙްލާ އަކީ ދީނީ ޢިލްމުވެރިންނާއި ރާއްޖޭގެ ފާހަގަކުރެވޭ ޑޮކްޓަރުންނާއި އަދި އެކިއެކި ފަންނުތަކުގެ ތަޖުރިބާކާރު މާހިރުން ބައިވެރިވެގެން މުޅި އަތޮޅަށް ހުޅުވާލެވިގެން ބާއްވަމުން އަންނަ ދިނީ، ސީއްޙީ އަދި އިޖްތިމާޢީ ހޭލުންތެރިކަމުގެ ޕްރޮގްރާމެކެވެ. 2009 ވަނަ އަހަރު ފެށި މި ޕްރޮގްރާމު، ކޮވިޑް19 ގެ ބަލިމަޑުކަމުގެ ސަބަބުން މެދުކެނޑިފައި އޮތުމަށްފަހު އަލުން މިވަނީ ފެށިފައެވެ.