ޖުޑީޝަލް ސަރވިސް ކޮމިޝަން (ޖޭއެސްސީ) އެކުލާވާލާފައިވާ ގޮތް އިސްލާހުކުރުމާ ގުޅޭގޮތުން އާންމުންގެ ހިޔާލު ހޯދުމަށް ހުޅުވާލައިފި އެވެ.

އެޓާނީ ޖެނެރަލްގެ އޮފީހުން މިއަދު ނެރުނު ނޫސް ބަޔާނެއްގައި ބުނީ، ޖުޑީޝަލް ސަރވިސް ކޮމިޝަން އެކުލެވިގެންވާ ގޮތް އިޞްލާޙުކުރުމަށްޓަކައި ޤާނޫނުއަސާސީއަށް ގެންނަންޖެހޭ އިޞްލާޙުތައް ގެނައުމަށްޓަކައި ތަޢާރުފުކުރަންެޖެހޭ ޤާނޫނު އެކުލަވާލުމަށް ބޭނުންވާ މަޝްވަރާއާއި ޚިޔާލު ހޯދުމުގެ މަސައްކަތް އެ އޮފީހުން މިހާރު ފަށާފައިވާ ކަމަށެވެ.

އަދި އެ ބިލު އެކުލަވާލުމުގައި، ޝަރުޢީ ދާއިރާއާއި ކަމާބެހޭ އެނޫންވެސް ފަރާތްތަކާ މަޝްވަރާކުރުމުގެ އިތުރުން، ރައްޔިތުންގެ ޚިޔާލު ހޯދުމަކީ މުހިންމު ކަމެއް ކަމުގައި ފެންނާތީ، ކަމާގުޅޭގޮތުން ޢާންމުންގެ ޚިޔާލު ހޯދުމަށްޓަކައި، އެ ފުރުޞަތު ޢާންމުކޮށް ހުޅުވާލާ ކަމަށްވެސް އެ ބަޔާނުގައި ބުނެފައިވެއެވެ. 

Advertisement

އެގޮތުން، އެކަމަށްޓަކައި އެކުލަވާލާފައިވާ ފޯމު މެދުވެރިކޮށް ޚިޔާލު ހުށަހެޅުއްވުމަށް މި ލިންކް https://tinyurl.com/mwj3mkm7 މެދުވެރިކޮށް ޚިޔާލު ހުށަހެޅުމަށް ނުވަތަ އީ-މެއިލްގެ ޛަރީޢާއިން ޚިޔާލު ހުށަހަޅުއްވަން ބޭނުންފުޅުވާ ފަރާތްތަކަށް [email protected] އަށް އީ-މެއިލްކުރެއްވުމުގެ ފުރުޞަތުވެސް ހުޅުވާލެވިފައިވާ ކަމަށް ބުނެފައި ވެއެވެ.

އަދި އާއްމުންނަށް ޚިޔާލު ހުށަހެޅުމުގެ މުއްދަތަކީ، މިއަދުން ފެށިގެން 20 އޮކްޓޫބަރު 2022 (ބުރާސްފަތި) ގެ ނިޔަލަށް ކަމަށްވެސް އެ ބަޔާނުގައި ބުނެފައިވެއެވެ.

މީގެ އިތުރުން، ޖޭ.އެސް.ސީ އިޞްލާޙުކުރުމާއި ގުޅޭ މަޝްވަރާގައި ބައިވެރިވުމަށް ބޭނުންވާ މަދަނީ ޖަމިއްޔާތަކަށް އެ ރަޖިސްޓްރީވުމުގެ ފުރުސަތުވެސް މިހާރު ވަނީ ޅުވާލާފައެވެ. އަދި އެގޮތުން ބައިވެރިވާން ބޭނުންވާ ފަރާތްތަކުން ޖޭއެސްސީން އާންމުކޮށްފައިވާ އޮންލައިން ފޯމެއް މެދުވެރިކޮށް މިހާރު ރަޖިސްޓްރީ ވެވޭނެކަމަށާ މި ފުރުސަތު ހުޅުވާލާފައި ވަނީ މި މަހުގެ 11 ވަނަ ދުވަހުގެ ނިޔަލަށް ކަމަށް އެ އޮފީހުން ބުނެފައިވެއެވެ. 

ޖުޑީޝަލް ސަރވިސް ކޮމިޝަން އެކުލެވިގެންވާ ގޮތް އިޞްލާޙުކުރުމަށްޓަކާ ކުރިއަށް ގެންދާ މަޝްވަރާތައް އޮކްޓޯބަރ 2 ވަނަ ދުވަހު އެ އޮފީހުން ފަށާފައިވާއިރު އެފަދަ މަޝްވަރާތަކެއް ދިވެހިރާއްޖޭގެ ސުޕްރީމް ކޯޓާއި އަދި ޖޭއެސްސީއާއެކު ކުރެވިފައިވާ ކަމަށް އެ އޮފީހުން ބުނެފައިވެއެވެ. 

ޖުޑީޝަލް ސަރވިސް ކޮމިޝަން (ޖޭއެސްސީ) އަކީ ސިޔާސީ ނުފޫޒުން އެއްކިބާވެފައިވާ ތަނަކަށް ހެދުމަށްޓަކައި އެ ކޮމިޝަން އެކުލެވިގެންވާ ގޮތް އިސްލާހު ކުރުމަށްޓަކައި ގާނޫނު އަސާސީއަށް ގެންނަން ޖެހޭ އިސްލާހުތައް އެކުލެވޭ ބިލު އެކުލަވާލައި މަޖިލީހަށް ހުށަހެޅުމަށް ނިންމާފައިވާ ކަމަަށް އެޓާނީ ޖެނެރަލްގެ އޮފީހުން ބުނީ މިދިޔަ މަހުގެ 29 ވަނަ ދުވަހުއެވެ.

އެކަން އަންގައި އޭޖީ އޮފީހުން ނެރުނު ނޫސްބަޔާނެއްގައި ބުނެފައިވަނީ އޭޖީ އޮފީހުން ނެރުނު ނޫސްބަޔާނެއްގައި ބުނީ، ޖޭއެސްސީ އަކީ ސިޔާސީ ނުފޫޒުން އެއްކިބާވެފައިވާ ތަނަކަށް ހެދުމަށްޓަކައި ކަމާބެހޭ ބައިނަލްއަގުވާމީ ހަމަތަކާއި އުސޫލުތަކަށް ރިއާޔަތްކުރުމަށް ފަހު އެ ކޮމިޝަން އެކުލެވިގެންވާ ގޮތް އިސްލާހު ކުރުމަށްޓަކައި ގާނޫނުއަސާސީގެ 158 ވަނަ މާއްދާ އަށް ގެންނަން ޖެހޭ އިސްލާހުތައް އެކުލެވޭ ބިލު އެކުލަވާލައި، މި ދައުރުގެ މަޖިލިހަށް ހުށަހެޅުމަށް ގަސްތުކޮށްފައިވާ ކަމަށެވެ.

އަދި އެ ބިލު އެކުލަވާލުމަށް ބޭނުންވާ މަޝްވަރާ ހޯދުމަށްޓަކައި ދިވެހިރާއްޖޭގެ ސްޕްރީމްކޯޓާއި، ހައިކޯޓާއި އަދި ދަށު ކޯޓުތަކާއި، ޖޭއެސްސީ އާއި، އެނޫން ވެސް ކަމާބެހޭ ފަރާތްތަކާ އެކު ބައްދަލުވުންތައް އަންނަ ހަފްތާ އިން ފެށިގެން ބޭއްވުމަށް ނިންމާފައިވާ ކަމަށް ވެސް އެ އޮފީހުން ބުންޏެވެ.

މިހާރު ޖޭއެސްސީ އެކުލެވިގެންވާ ގޮތް މުރާޖަޢާ ކޮށް، އެތަން ސިޔާސީ ނުފޫޒުން އެތަން އެއްކިބާ ކުރުމަށް، ގާނޫނު އަސާސީއަށް އިސްލާހް ގެނައުމަކީ ދިވެހިރާއްޖޭގެ ޝަރުޢީ ދާއިރާ އިސްލާހުކުރުމަށް، ރައީސް އިބްރާހީމް މުހައްމަދު ސޯލިހުގެ މި ސަރުކާރުން ވެފައިވ ރިޔާސީ ވައުދުތަކުގެ ތެރެއިން މުހިންމު އެއް ވައުދެކެވެ.

އެހެން ނަމަވެސް މި ސަރުކާރުގެ ދައުރު ނިމޭއިރުވެސް އެކަން ނުކުރެވޭ ކަމަށް ބުނެ، ޖޭއެސްސީ އަށް މެންބަރުން އައްޔަނުކުރާ ގޮތް ބަދަލުކުރުމަށް އެދި ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަހްމަދު ތޯރިގު ވަނީ ތިން ފަހަރެއްގެ މަތިން އިސްލާހު ހުށަހަޅުއްވައިފައެވެ. އިދިކޮޅު ކޯލިޝަންގެ ފަރާތުން ޠާރިގު ހުށަހެޅުއްވި އެ އިސްލާހު ތިން ފަހަރެއްގެ މަތިން އެމްޑީޕީ މެޖޯރިޓީ އޮންނަ މަޖިލީހުން ބޭރުކޮށްލާފައިވާއިރު، ދެވަނަ ފަހަރަށް ތޯރިގު އެ އިސްލާހު ހުށަހެޅުއްވުމުން މަޖިލިހަށް ބަލައިގަނެ، އިބްތިދާއީ ބަހުސް ވެސް ކުރިއަށް ގެންގޮސްފައިވެއެވެ.