ރަސޫލު ﷺ ދެކެ ލޯބިވުމަކީ، އެކަލޭގެފާނުގެ ސުންނަތުގައި ނުވާ، ކަންތައްތަކެއް ކުރުމެއް ނޫން ކަމަށް މަޝްހޫރު ދީނީ ޢިލްމުވެރިޔާ އައްޝައިޚް ހަސަން މޫސާ ފިކުރީ ވިދާޅުވެއްޖެއެވެ. 

ރަސޫލާ ﷺ ގެ ޢީދު މީލާދު ފާހަގަ ކުރުމަކީ ބިދުޢައެއް ކަމުގައި ޢިލްމުވެރިން ތަކުރާރުކޮށް ނަސޭހަތް ތެރިވަމުން ދިޔަ ނަމަވެސް، އެ ދުވަސް ފާހަގަކުރުމަށް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަދި އެނޫންވެސް ފަރާތްތަކުން ވަނީ ތަހުނިޔާގެ މެސެޖު ފޮނުއްވާފައެވެ. 

އެކަމާއި ގުޅިގެން ޝެއިޚް ފިކުރީ ކުރެއްވި ޓުވީޓެއްގައި ވިދާޅުވީ، ރަސޫލާ ﷺ ދެކެ ލޯބިވުމަކީ އެކަލޭގެފާނު އުޅުއަްވިގޮތަށް އުޅުން ކަމަށެވެ. އަދި  ދިރިއުޅުމުގެ ހުރިހާ ކަމެއްގައި އެކަލޭގެފާނަކީ ނަމޫނާ ކަމުގައި ބެލުން ކަމަށެވެ. 

Advertisement

"އަހަރަަކު އެންމެ ދުވަހެއްގައި އެކަލޭގެފާނުގެ ހަނދާން ކުރުމޭކިޔާފައި، އެކަލޭގެފާނުގެ ސުންނަތުގައި ނުވާ، ކަންތައްތަކެއް ކުރުމެއް ނޫނެވެ." ޝެއިޚް ފިކުރީ ވިދާޅުވިއެވެ. 

ޢިލްމުވެރިން ވިދާޅުވާ ގޮތުގައި ނަބިއްޔާ ﷺ ގެ ޢީދު މީލާދަކީ ބާޠިނީ، ފާޠިމީން ދީނަށް އަލަށް ވެއްދި ބިދުޢައެކެވެ. އެހެންކަމުން މި ދުވަސް ފާހަގަކުރުމަކީ ހުއްދަ ކަމެއް ނޫނެވެ. އެހެނީ، ރަސޫލާ އަވަހާރަވެވަޑައިގެންނެވި ފަހުން ހަތަރު ޤަރުނު ވަންދެން އެކަލޭގެފާނުގެ ޢީދު މީލާދު ފާހަގަ ކުރެވިފައެއް ނުވެއެވެ. އަދި އެކަލޭގެފާނުގެ އަނބިއަނބި ކަނބަލުންނާއި ދަރިކަލަކު ނުވަތަ ދަރިކަނބަލަކު ވެސް އެ ދުވަސް ފާހަގަ ކުރައްވާފައެއް ނުވެއެވެ. އަދި އަޞްޙާބު ބޭކަލުންނާއި ތާބިޢީންނާއި އަތްބާޢުއްތާބިޢީންނާއި އުއްމަތުގެ އެންމެ މަޝްހޫރު ހަތަރު އިމާމުން ވެސް (އިމާމް އަބޫ ޙަނީފާ، މާލިކް، ޝާފިޢީ އަދި އަޙުމަދު ބިން ޙަންބަލް) އެ ދުވަސް ފާހަގަ ކުރައްވާފައެއް ނުވެއެވެ.