ޕާކިސްތާނަށް ބޯކޮށް ވާރޭވެހި ފެންބޮޑުވުމުގެ ސަބަބުން ހާލުގައި ޖެހުނު މީހުންނަށް އެހީވާން ދިވެހި މީޑިއާތައް ގުޅިގެން ބޭއްވި ޓެލެތޯނުން ލިބުނު 3.8 މިލިއަނަށްވުރެ ގިނަ ރުފިޔާ ޕާކިސްތާނާ ހަވާލުކޮށްފިއެވެ.
"ޕާކިސްތާނު މޯލްޑިވްސް ފްރެންޑްޝިޕް އެސޯސިއޭޝަން" (ޕީއެމްއެފްއޭ) އިން އިސްނަގައިގެން ރާއްޖޭގައި ހަރަކާތްތެރިވާ ގިނަ މީޑިއާތަކަކާއި އެކު ކުރިއަށްގެންދިޔަ މި ޓެލެތޯނުން ލިބުނު 3.8 މިލިއަން ރުފިޔާ ނުވަތަ 54 މިލިޔަން ޕާކިސްތާން ރުޕީސްއާ ޕާކިސްތާނުގެ ފަރާތުން ރަމްޒީކޮށް ހަވާލުވެވަޑައިގެންނެވީ މާލޭގައި ހުންނަވާ ޕާކިސްތާނު ހައި ކޮމިޝަނަރު ވައިސް އެޑްމިރަލް ރިޓަޔަރޑް އަތެރް މުޚްތަރްއެވެ.
ޕާކިސްތާނަށް އެހީވުމުގެ ގޮތުން ބޭއްވި ޓެލެތޯނުން ލިބުނު ފައިސާ ހަވާލުކުރުމަށް ރޭ ބޭއްވި ޚާއްސަ ހަފްލާގައި ޕާކިސްތާނު ސަފީރުވަނީ ދިވެހިންގެ ފަރާތުން ލިބުނު އެއްބާރުލެއްވުމަށް ޝުކުރު އަދާކުރައްވާފައެވެ.
މި އަހަރުގެ ޖޫން މަހުގެ ފަހުކޮޅުން ފެށިގެން ޕާކިސްތާނަށް ކުރި ގަދަ ވިއްސާރައިގައި އެ ގައުމުގެ ބޮޑު ސަރަހައްދެއްގައި ފެން ބޮޑުވެ އެތައް ބަޔަކު ހާލުގައި ޖެހިފައިވާއިރު، އެގައުމުގައި ނުރައްކާތެރި ބަލިތައް މިވަނީ ފެތުރެން ފަށާފައެވެ.
އެގޮތުން ބޭރަށް ހިންގުމާއި، ކޮލެރާއާއި، ހަމުގެ ބަލިތަކާއި، މެލޭރިއާ ފަދަ އެތައް ބަލިތަކެއް މިހާރު ވަނީ ފެތުރެން ފަށާފައެވެ.
Advertisement
This content is created and paid for by advertisers and does not involve Voice Journalists
