ހައްދުފަހަނަޅާފައިވާ އިސްރާޢީލުގެ ސިފައިން ފަލަސްތީނުގެ ހުޅަނގު އައްސޭރީގެ އަވަށެއް ކަމަށްވާ ޖަނީން އަށް އަރައި ހިންގި އުދުވާންތަކެއްގައި ފަލަސްޠީނުގެ ދެ މީހުން ޝަހީދުކޮށްލައި އިތުރު ބަޔަކު ޒަޚަމް ކޮށްލައިފިއެވެ. 

ޖަނީންގައި ދިރިއުޅޭ އިސްލާމިކް ޖިހާދު ޖަމާޢަތަށް ނިސްބަތްވާ 25 އަހަރުގެ މީހަކު ހޯދައި، ހައްޔަރު ކުރުމަށް ކަމަށްބުނެ، ފުރިހަމަ އަސްކަރީ ބާރާއި، ހެލިކޮޕްޓަރުތަކާއި ބަރު ހަތިޔާރާ އެކުގައި، އިސްރާއީލުން ގަދަކަމުން ވެރިވެގަނެ އަޅުވެތި ކޮށްފައިވާ ފަލަސްތީނުގެ ޖަނީނަށް އަރާ ޔަހޫދީ އިސްރާޢީލުގެ ސިފައިން ދިން ހަމަލާތަކުގައި ފަލަސްޠީނުގެ ދެމީހަކު މަރާލައި އިތުރު 11 މީހަކު ވަނީ ޒަޚަމްކޮށްލާފައެވެ. އެގޮތުން ޒަޚަމްވި މީހުންގެ ތެރެއިން ތިން މީހެއްގެ ހާލު ސީރިޔަސް ކަމުގައި ފަލަސްޠީނުގެ ޞިއްޙީ ވުޒާރާއިން ބުނެއެވެ.

ހަރުކަށި ޔަހޫދީ ސިފައިން ޖަނީނަށް އަރައި ހިންގި މި ޖަރީމާ ދިފާއުކޮށް އެމީހުން ބުނެފައި ވަނީ، އެމީހުން ދިޔައީ އެތަނުގައި ދިރިއުޅޭ އިސްލާމިކް ޖިހާދު ޖަމާޢަތަށް ނިސްބަތްވާ 25 އަހަރުގެ މީހަކު ހޯދައި، ހައްޔަރު ކުރުމަށް ކަމަށާ ފަލަސްޠީނުގެ ރައްޔިތުންނަށް ހަމަލާދީފައި ވަނީ ސިފައިންނަށް ހުރަސް އެޅުމުން ކަމަށެވެ. 

ފަލަސްޠީނުގެ މީޑިޔާއެއް ކަމުގައިވާ ވަފާއިން ރިޕޯޓް ކޮށްފައިވާ ގޮތުގައި،  ޔަހޫދީންގެ މި ޖަރީމާތައް ކަވަރ ކުރަމުންދިޔަ  ނޫސްވެރިންނަަށްވެސް އެމީހުންވަނީ ބަޑިޖަހައި ހަމަލާދީފައެވެ. އަދި އޮކްޓޫބަރު 5ވަނަ ދުވަހު ވެސް ޔަހޫދީ ސިފައިން ވަނީ، އެ މީހުން ހިންގަމުންދިޔަ އޮޕަރޭޝަނެއް ކަވަރު ކުރަމުން ދިޔަ ނޫސްވެރިންތަކަކަށް ބަޑިން ހަމަލާ ދީފައެވެ. އެގޮތުން ހުޅަނގު އައްސޭރީގެ ނާބުލުސްގައި ދިން މި ހަމަލާތަކުގައި ފަލަސްޠީނުގެ އިތުރު ޒުވާނެއް ޝަހީދު ކޮށްލާފައި ވާއިރު، ދެ ނޫސްވެރިއަކު ޒަޚަމުވިއެވެ.

މީގެ އިތުރުން އޮކްޓޫބަރު 7ވަނަ ދުވަހު ވެސް ޔަހޫދީން ސިފައިން ވަނީ ފަލަސްޠީނުގެ ދެ ޒުވާނަކު ޝަހީދު ކޮށްލާފައެވެ. އޭގެ ތެރެއިން އެއް ކުއްޖަކީ 14 އަހަރުގެ ކުއްޖެކެވެ. އެ ކުއްޖާ ޝަހީދު ކޮށްލާފައި ވަނީ ހުޅަނގު އައްސޭރީގެ އުތުރުގައިވާ ޤަލްޤިލްޔާގައެވެ. މި މަރުތަކަކީ ގަތުލުތަކެއްގެ ގޮތުގައި ފަލަސްޠީނުގެ ޚާރިޖީ ވުޒާރާއިން ސިފަ ކުރެއެވެ.

ފަލަސްޠީނުގެ ރައްޔިތުންނަށް އިންސާނީ އެހީތެރިކަން ފޯރުކޮށްދޭން މަސައްކަތް ކުރާ އ.ދ.ގެ އޮފީހުން ބުނީ، ޖަނަވަރީ 1އިން ފެށިގެން ސެޕްޓެންބަރު 20އާ ދެމެދު ޔަހޫދީ އިސްރާޢީލުގެ ސިފައިން ދީފައިވާ ތަފާތު ހަމަލާތަކުގައި ޝަހީދު ކޮށްލާފައިވާ ފަލަސްޠީނުގެ ރައްޔިތުންގެ އަދަދު މިހާރު 84 އަށް އަރާ ކަމުގައެވެ.