ގެމްބިއާގެ ތުއްތު ކުދިންތަކެއް ކިޑްނީ މައްސަލަ ތަކެއް ކުރިމަތި ވުމަށްފަހު ނިޔާވީ އިންޑިޔާގެ ކުންފުންޏަކުން އުފައްދާފައިވާ ކޯފް ސިރަޕް އެއް ރާއްޖެ އެތެރެވުމުގެ ފުރުސަތު އޮތުމުން، އެކަމަށް ސަމާލުވުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މިއަދު އިލްތިމާސްކޮށްފި އެވެ.
އެ އިދާރާއިން މިއަދު ނެރުނު ބަޔާނެއްގައި ބުނީ އިންޑިއާގެ ހަރިޔާނާ ސްޓޭޓުގައި ހުންނަ މެއިޑެން ފާމަސޫޓިކަލް ލިމިޓެޑުން އުފައްދާ، ކުޑަކުދިންނަށް ދޭ ކޯފް ސިރަޕެއްގައި ހިމެނޭ، ޑައެތުލީން ގްލައިކޯލް އާއި އެތެލީން ގްލައިކޯލް ކިޔާ މާއްދާތަކެއްގެ ސަބަބުން އެ ބޭސްތައް ތަގައްޔަރުވެފައިވާ ކަމަށް ގެންބިއާ އިން ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯ އަށް ރިޕޯޓް ކޮށްފައިވާ ކަމަށެވެ.
އެހެންކުން މިބޭސްތަކުގެ ދެނެގަނެވިފައިވާ ބެޗްތަކުގެ ރައްކާތެރިކަން ކަށަވަރުނުވާތީ، މިބޭސްތަކުގެ ބެޗްތައް ބޭނުން ނުކުރުމަށް އެއެލާޓުގައި ވަނީ ބުނެފައެވެ.
އަދި މިބޭހަކީ ރާއްޖެއަށް އިމްޕޯޓުކުރުމަށާއި، ވިއްކުމަށް ހުއްދަކުރާ ބޭހުގެ ލިސްޓްގައި ހިމެނޭ ބޭހެެއް ނޫނެވެ. އެހެން ނަމަވެސް ބޭސްސިޓީއަށް ނުވަތަ އެނޫންވެސް ގޮތަކުން ރާއްޖެއަށް މިބޭސް އިމްޕޯޓުވުމުގެ ފުރުސަތު އޮތްކަމަށް ވާތީ މިކަމަށް ސަމާލުވާނެ އެމްއެފްޑީއޭއިން ވަނީ އެދިފައެވެ.
އަދި ރައްކާތެރިކަމުގެ ފިޔަވަޅެއްގެ ގޮތުން ބޭސް ސިޓީ އަށް ބޭސް އެތެރެކުރާއިރު، ހާއްސަ ސަމާލުކަމެއް ދީގެން ޕޯޓުތަކުގައި ބަލައިފާސްކުރުމުން ގެންދާނެ ކަމަށްވެސް އެއިދާރާއިން ވަނީ ބުނެފައެވެ.
މިއަހަރުގެ ޖުލައި މަހުގައި ގެމްބިއާގެ ފަސް އަހަރުން ދަށުގެ ތުއްތު ކުދިންތަކަކަަށް ކިޑްނީ މައްސަލަ ތަކެއް ކުރިމަތިވެ ނިޔާވުމާއި ގުޅިގެން އެ ސަރަހައްދުގެ ސިއްހަތާބެހޭ އިދާރާތަކުން ވަނީ އެކަން ސަމާލުކަމަށް ގެނެސްފައެވެ. އަދި އެގޮތުން ކިޑްނީ މައްސަލަ ދިމާވި ކުދިންތައް ނިޔާވެފައިވާއިރު، އެކުދިންނަށް އެ މައްސަލަ ތައް ކުރިމަތިވީ, އެ ސަރަހައްދުގައި ވިއްކަން ހުރި ރޯގާ ބޭހެއް ބޭނުންކުރިތާ 4 ނުވަތަ 5 ދުވަސް ފަހުންކަން އޭރުވަނީ ފާހަގަކުރެވިފައެވެ
Advertisement
This content is created and paid for by advertisers and does not involve Voice Journalists
