އިންޑިއާގެ ބޮޑު ވަޒީރު ނަރެންދުރަ މޯދީ، ޢީދު މީލާދުގެ ތަހުނިޔާ ފޮނުވައި ކުރެއްވި ޓުވީޓެއްގައި ޢީދު މުބާރަކް ލިޔުއްވާފައި ވުމުން ގިނަ ބައެއްގެ ފާޑުކިޔުންތައް އަމާޒުވާން ފަށައިފިއެވެ. 

އިންޑިއާގެ ބިދުޢަވެރި ޖަމާޢަތްތަކުން މިއަދު ފާހަގަކުރަމުންދާ، ރަސޫލާ ﷺ ގެ ޢީދު މީލާދު ތަހުނިޔާ އަރިސްކޮށް މިއަދު މޯދީ ކުރެއްވި ޓުވީޓެއްގައި ވަނީ މި މުނާސަބަތަކީ މުޖުތަމައުގައި އެކުވެރިކަމާއި، އަމާންކަން އިތުރަށް ގެނުވާނެ މުނާސަބަތަކަށް ވެގެން ދާނެ ކަމަށް އެދޭކަމަށެވެ. އެއަށްފަހު މޯދީ ވަނީ "ޢީދު މުބާރަކް" މިފަދައިންވެސް އެ ޓުވީޓުގައި ލިޔުއްވާފައެވެ. 

މޯދީގެ މި ޓުވީޓު ރާއްޖޭގައި ހުންނަ އިންޑިއާ ގެ ހައިކޮމިޝަނުން ވެސް ރިޓުވީޓް ކޮށްފައިވާއިރު، އެ ޓުވީޓާއި ގުޅިގެން ގިނަ ބައެއްގެ ފާޑުކިޔުންތައް އެމަނިކުފާނަށް ވަނީ އަމާޒުވެފައެވެ. އެގޮތުން، އެޔަށް ރިޕަލައި ކުރި އެބަޔަކު ވަނީ ޢީދު މީލާދުގައި ޢީދު މުބާރަކް ކިޔައި ތަހުނިޔާ ދެންނެވުމުން މުސްލިމުން ފާހަގަ ކުރަނީ ދެ ޢީދުކަންވެސް މޯދީ އަށް ނޭނގޭ ކަމަށް ބުނެފައެވެ. 

އަދި އެއަަށް ކޮމެންޓު ކުރި ގިނަ ބަޔަކު ވަނީ، މޯދީގެ ބަހާއި ޢަމަލާ ދިމާ ނުވާކަމަށް ބުނެފައެވެ. އެގޮތުން، މުސްލިމުންނަށް އަނިޔާކޮށް، މުސްލިމުންގެ މިސްކިތްތައް ސުންނާފަތި ކުރާ މީހަކު، ޢީދު މީލާދުގެ ނަމުގައި މުސްލިމުންނަށް ތަހުނިޔާ ވިދާޅުވި ނަމަވެސް މުސްލިމުންނަށް ދެމުންގެންދާ އަނިޔާތައް ނުދޭ ކަމަށް ނުވާނެ ކަމަށް ބުނެފައެވެ.  

އިންޑިއާގެ ވެރިކަމަށް ނަރެންދުރަ މޯދީ އައި ފަހުން އެގައުމުގައި މުސްލިމުންނާއި ދެކޮޅަށް ހިންގާ ޖަރީމާތައް ވަނީ ވަރަށް ބޮޑަށް އިތުރުވެފައެވެ. އެގޮތުން އެ ސަރުކާރުންވަނީ މުސްލިމުންގެ ގެތައް ސުންނާފަތިކޮށް، މިސްކިތް އަންދައި، ހަލާކުކޮށް، އެތައް މުސްލިމުންނަށް އަނިޔާކޮށް ހައްޔަރުވެސް ކޮށްފައެވެ. އަދި ސަރުކާރުގެ އެފަދަ އަމަލުތަކަށް މޯދީގެ ޕާޓީ، ބީޖޭޕީ ގެ އިސް ފަރާތްތަކުން އަންނަނީ ތައުރީފްވެސް ކުރަމުންނެވެެ.