އެއް ޖިންސުން ގުޅުން ހިންގުމުގެ ކުށުގައި ވަކީލް ނާޒިމް ސައްތާރުގެ މައްޗަށް ކަނޑައެޅި އަދަބުގެ ބައި ދައުލަތުން ހައިކޯޓުގައި އިސްތިއުނާފްކޮށްފި އެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ކޮށްކޮ ނާޒިމް އާއި އަލަމްގިރި އާއި އެކު އެއްޖިންސުން ގުޅުން ހިންގާ މަންޒަރު ފެންނަ ވީޑިއޯއެއް އާންމުވި މައްސަލައިގައި އޭނާ ހައްޔަރު ކޮށްފައިވަނީ މިދިޔަ ޖުލައި މަހުގެ 28 ވަނަ ދުވަހުއެވެ.

ނާޒިމްގެ ބަންދަށް ދެ ފަހަރު ކޯޓުން މުއްދަތު ޖެހުމަށްފަހު ފުލުހުން އޭނާ އޮގަސްޓް 11 ވަނަ ދުވަހު އޭނާާ ދޫކޮށްލާފައިވަނީ މައްސަލާގެ ތަހުގީގު ނިންމައި, ނާޒިމްގެ މައްޗަށް ދައުވާ ކުރުމާމެދު މަޝްވަރާ ކުރުމަށް ޕްރޮސިކިއުޓާ ޖެނަރަލްގެ އޮފީހަށް ހުށަހެޅުމަށްފަހު އިތުރަށް އޭނާ ބަންދުގައި ބެހެއްޓުމަށް ނުފެންނާތީ ކަމަށް ފުލުހުން ބުނެފައިވެއެވެ.

އެ މައްސަލާގައި ނާޒިމްއަށް ހުކުމް ކުރަން އޮތް ދުވަހު (15 ސެޕްޓެމްބަރު) ކުށަށް އިއުތިރާފްވެ މާފަށް އެދިފައިވާ އިރު، ކްރިމިނަލް ކޯޓުން އޭނާއަށް އިއްވީ ތިން މަހާއި 26 ދުވަހުގެ ގޭ ބަންދުގެ އަދަބެކެވެ.

ކްރިމިނަލް ކޯޓުން ނާޒިމްގެ މައްޗަށް ކަނޑައެޅި އަދަބުގެ ބައި އިސްތިއުނާފްކުރަން ދައުލަތުން ހައި ކޯޓަށް އިއްޔެ ހުށަހަޅާފައިވާއިރު އެ މައްސަލަ ބަލައިގަތުމާ މެދު އެ ކޯޓުން އަދި ގޮތެއް ނުނިންމަ އެވެ.

ނާޒިމްގެ އިތުރުން އަލަމްގީރާ އެކު އެއް ޖިންސުން ގުޅުން ހިންގި ފުލުހެއް ކަމަށްވާ އަބްދުއްރަހްމާން ރަފީއުގެ މައްޗަށް ކްރިމިނަލް ކޯޓުން އިއްވީ އެއް އަހަރުގެ ޖަލު ހުކުމެކެވެ. އެ އަދަބު މާ ބޮޑު ކަމަށް ބުނެ އެ މައްސަލަ ވެސް ދައުލަތުން އޮތީ އިސްތިއުނާފް ކުރަން ނިންމައިފަ އެވެ.

ގާނޫނުލްއުގޫބާތުގެ 1106 ވަނަ މާއްދާގައިވާ ގޮތުން، ކުށްވެރިޔާ ކުށާ މެދު ދެރަވާކަން އާންމުންގެ ތެރޭގައި ފާޅުކުރުމުން، އަދަބުގެ ދަރަޖަ ދަށްވެއެވެ. އެގޮތުން ދައުވާކުރުމުގެ ކުރިންނަމަ، 2 ދަރަޖަ، އަދި ދައުވާ ކުރި ފަހުންނަމަ، 1 ދަރަޖައެވެ. އަދި ކުށް ސާބިތުވާކަމަށް ކަނޑައެޅި ނަމަވެސް، އަދަބު ދިނުމުގައި އިސްވެދެންނެވި އުސޫލާ ޚިލާފު ނަމަ، އެ ނުކުތާ ވަކިން އިސްތިއުނާފު ކުރަންޖެހޭ ކަމަށްވެސް ގާނޫނުގައި ވެއެވެ. ނާޒިމްގެ މައްސަލާގައި އިސްތިއުނާފު ކުރަން ދައުލަތުން ނިންމީ މި ސަބަބާ ހުރެ ކަމަށް ބެލެވެއެވެ.