އިދިކޮޅު ކޯލިޝަންގެ ރިޔާސީ ކެންޑިޑޭޓް ޕީޕީއެމްގެ ރައީސް، ރައީސް ޔާމީން ހއ.ގެ 5 ރަށަކަށް ދަތުރުކުރެއްވުމަށް ހަމަޖެހިއްޖެއެވެ. 

ޕީޕީއެމް އިން މިއަދު ބުނީ، މިމަހު 12 އިން 15 އަށް ހއ. ކެލާ، ބާރަށް، ދިއްދޫ، އިހަވަންދޫ އަދި ތުރާކުނަށް ރައީސް ޔާމީން ވަޑައިގަންނަވާނެ ކަމަށެވެ. 

ޔާމީންގެ މިދަތުރުފުޅަކީ ޕާޓީގެ މެމްބަރުންނާ ރައްޔިތުންނާ ބައްދަލުކުރައްވައި، ރިޔާސީ އިންތިޚާބުގެ މެނިފެސްޓޯއަށް މައުލޫމާތު އެއްކުރުމާއި ރައްޔިތުން ބޭނުންވާ ކަންކަން ދެނެގަތުން ކަމަށްވެސް އެ ޕާޓީން ބުނެއެވެ. މީގެ އިތުރުން މިއީ، ޕާޓީގެ ހަރަކާތްތައް ރަށްރަށުގައި ވަރުގަދަކޮށް، ރިޔާސީ އިންތިޚާބަށް ވާންޖެހޭ ތައްޔާރީތައް ވުމަށް ކުރެވޭ ދަތުރެއް ކަމަށްވެސް ބުނެފައިވެއެވެ. 

Advertisement

ހއ. އަތޮޅަކީ ރައީސް ޔާމީންގެ ޒައާމަތުގައި ތަރައްގީގެ ގިނަ މަޝްރޫއުތަކެއް ހިންގަވާފައިވާ އަތޮޅެކެވެ. އެގޮތުން ހއ. އިހަވަންދޫގައި 14 ޕްރޮޖެކްޓް ، ކެލާގައި 16 ޕްރޮޖެކްޓް، ދިއްދޫގައި 27 ޕްރޮޖެކްޓް، ބާރަށުގައި 17 ޕްރޮޖެކްޓް، ތުރާކުނުގައި 15 ޕްރޮޖެކްޓް ހިންގާފައިވެއެވެ. މީގެ ތެރެއިން ގިނަ ޕްރޮޖެކްޓްތަކަކީ ރައީސް ޔާމީންގެ ވެރިކަމުގައި ނިންމަވާފައިވާ އަދި މިސަރުކާރު ވެރިކަމަށް އައި އިރު ހިނގަމުންދާ ޕްރޮޖެކްޓްތަކެވެ.

މިމަހު ތެރޭގައި ހއ އަށް ރައީސް ޔާމީން ވަޑައިގަންނަވާ އިރު، މިދިޔަ މަހު އެމަނިކުފާނު ވަނީ ދ.ކުޑަހުވަދޫއަށްވެސް ވަޑައިގެންފައެވެ. އެމަނިކުފާނުގެ އެ ދަތުރުގެ ތެރެއިން ކުޑަހުވަދޫ ރައްޔިތުންނާއި ބައްދަލު ކުރައްވައި އެރަށުގައި ބޭއްވި ޖަލްސާގައި ވާހަކަފުޅު ވެސް ދައްކަވާފައިވެއެވެ.