ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ ސަރުކާރުން މަސްވެރިންނަށް ވެފައިވާ ވައުދުތައް ފުއްދަމުން ނުދާ ކަމަށްބުނެ، މަސްވެރިންގެ ހައްގުގައި އަޑު އުފުލުމަށް އިދިކޮޅު ޕީޕީއެމް/ޕީއެންސީން މަސްމާރުކޭޓު ސަރަހައްދުގައި އިއްޔެ ކުރި މުޒާހަރާ ރޫޅައިލައި ފުލުހުން ހާލަތާ ނުބައްދަލު ބާރު ބޭނުންކޮށްފައިވާ ކަމަށް ބުނެ ރައްޔިތުންގެ މަޖިލީހަށް މިއަދު ހުށަހެޅުއްވި ކުއްލި މައްސަލަ ބޭރުކޮށްލައިފިއެވެ.

މި ސަރުކާރުން މަސްވެރިންނަށް ވެފައިވާ ވަޢުދުތައް ނުފުއްދައި މަސްވެރިންނަށް އިހުމާލުވެފައިވާތީ މަސްވެރިންގެ ކަންބޮޑުވުންތައް ސަރުކާރަށް އަޑު އިއްވުމުގެ ގޮތުން އިއްޔެ ހަވީރު މުޒާހަރާ ކޮށްފައިވަނީ އެމްއެމްއޭ ސަރަހައްދުގައެވެ. މުޒާހަރާ ފެށިތާ ގިނަ އިރެއް ނުވަނީސް ބާރުގެ ބޭނުން ކޮށްގެން ފުލުހުން ވަނީ މުޒާހަރާ ރޫޅައިލާފައެވެ. އަދި އެ މުޒާހަރާގެ ތެރެއިން 10 މީހަކު ވެސް ވަނީ ހައްޔަރުކޮށްފައެވެ.

އެ މީހުން ދޫކޮށްލުމަށް ގޮވާލައި އެ މައްސަލަ މަޖިލީހަށް ހުށަހެޅުއްވީ ފަރެސްމާތޮޑާ ދާއިރާގެ މެންބަރު ޙުސައިން މުޙައްމަދު ލަޠީފް (ސެމްބެ) އެވެ. 

ސެމްބެ ހުށަހެޅުއްވި ކުއްލި މައްސަލައިގައި ބުނެފައިވަނީ މަސްވެރިންގެ ޙައްޤުގައި އިދިކޮޅު ޕާޓީތަކުން އަޑު އުފުލުމުން ފުލުހުން ހާލަތާ ނުބައްދަލު ބާރު ބޭނުންކޮށްގެން 10 މީހަކު ހައްޔަރުކޮށްފައިވާ ކަމަށާއި އެއީ ޤާނޫނުއަސާސީން ލިބިދޭ ޚިޔާލުފާޅުކުރުމާއި, އެއްވެ އުޅުމުގެ ޙައްޤަށް ހުރަސް އެޅުން ކަމަށެވެ.

އެގޮތުން ޚިޔާލު ފާޅުކުރުމުގެ މިނިވަންކަމަކީ ޤާނޫނު އަސާސީގެ 27 ވަނަ މާއްދާ އާއި 32 ވަނަ މާއްދާ އިން ރައްޔިތުންނަށްލިބިދީފައިވާ އަސާސީ ޙައްގު ތަކަށްވާއިރު އެ ހައްގު ހަނިކޮށް ރައްޔިތުން ހައްގުތަކުން މަހުރޫމްކުރަމުންދާތީއާއި، އިހްތިޖާޖުގައި ބައިވެރިވި ކަނބަލުންގެ ކަރާމާތް ފުލުހުން ނަގާލާފައިވާތީއާއި އަދި މިއީ ފުލުހުންގެ ކޯޑް އޮފް ކޮންޑަކްޓާއި ފުލުހުންގެ ގާނޫނާއިވެސް ހިލާފު ކަމެއް ކަމަށް އެ މައްސަލާގައި ބުނެފައިވެއެވެ. 

އަދި މުޒާހަރާ ރޫޅާލުމުގައި ހާލަތާއި ނުބައްދަލު ބާރުގެ ބޭނުންކޮށް އިހްތިޖާޖުގެބައިވެރިންނަށް އަނިޔާވާގޮތަށް ފުލުހުންގެ ޢަމަލު ކުރުމަކީ ޑިމޮކްރަސީގެ އަސާސްތަކާއި ހިލާފަށްއިދިކޮޅު ޕާޓީގެ ހައްގުތަކާއި ޒިއްމާތަކަށް ހުރަސްއެޅުމަށް ސަރުކާރުން އަންގައިގެން ފުލުހުން ލައްވާ ހިންގާ ގައިރު ގާނޫނީ އަމަލެއް ކަމަށްވެސް ސެމްބެ ވިދާޅުވިއެވެ.

އެހެންކަމުން އެފަދަ އަމަލުތައް ނުހިންގުމަށާއި، އެއްވެ އުޅުމާއި ހިޔާލުފާޅުކުރުމުގެ މިނިވަންކަމަށް ހުރަސް ނޭޅުމަށާއި، އިހްތިޖާޖުގެ ތެރެއިން ހައްޔަރުކޮށްފައިތިބި މީހުން ދޫކޮށްލުމަށާއި، ކަނބަލުންގެ ކަރާމާތަށް އަރައިގަނެފައިވާ މައްސަލަ ސީރިއަސް މައްސަލައެއްގެ ގޮތުގައި ތަހުގީގުކުރުމަށް ސަރުކާރުގެ ކަމާބެހޭ މުއައްސަސާތަކަށް އޭނާ ގޮވާލެއްވި އެވެ.

މި މައްސަލައިގައި ޙުސައިން ގޮވައިލެއްވީ ޚިޔާލު ފާޅުކުރުމުގެ ޙައްޤަށް ހުރަސް އަޅައި, އަންހެނުންގެ ކަރާމާތަށް އަރައިގަނެފައިވާ މައްސަލަ ސީރިއަސް މައްސަލައެއްގެ ގޮތުގައި ތަޙްޤީޤުކޮށް ދިނުމަށެވެ. ނަމަވެސް މައްސަލަ ބަލައިގަތުމަށް ވޯޓު ދެއްވީ 08 މެންބަރުންނެވެ. ނުފެންނަ ކަމަށް 23 އަދި ވަކި ކޮޅަކަށް އެއް މެމްބަރަކު ވޯޓެއް ނުދެއްވި އެވެ. ވުމާއެކު އެ މައްސަލަ ވަނީ މަޖިލީހުން ބޭރުކޮށްލައިފައެވެ.