ހުޅުމާލޭ ދެވަނަ ފިޔަވަހީގައި އިތުރު ދެ ތަނަކަށް ބަސް ހުއްޓާ ގޮތަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ހަމަޖައްސައިފި އެވެ.

އެމްޓީސީސީން ބުނީ ރާއްޖޭގެ ޓްރާންސްޕޯޓް ލިންކް (އާރްޓީއެލް) ގްރޭޓަރ މާލޭ ސަރަހައްދުގެ ބަސް ރޫޓްތަކުގެ ތެރެއިން ފޭސް ދޭއްގެ ބަސް ރޫޓަށް އިތުރު ދެ ބަސްހުއްޓިއެއް މިއަދުން ފެށިގެން އިތުރު ކޮށްފައިވާ ކަމަށެވެ.

އެގޮތުން ބަސް ހުއްޓި އިތުރު ކޮށްފައިވަނީ، ހުޅުމާލެ ފޭސް ދޭއް އިން ހުޅުމާލެ ފޭސް އެކެއްގެ ރޫޓާއި، ހުޅުމާލެ ފޭސް ދޭއް އިން މާލޭގެ ވެސްޓް ޕާކް ބަސް ރޫޓާއި، ހުޅުމާލެ ފޭސް ދޭއް އިން މާލޭގެ ކާނިވަލް ބަސް ރޫޓްގެ އިތުރުން، ހުޅުމާލެ ފޭސް ދޭއް އިން ވޭލާނާ އިންޓަނޭޝަނަލް އެއާޕޯޓް ބަސް ރޫޓަށެވެ. 

Advertisement

މި ރޫޓް ތަކަށް އިތުރު ކޮށްފައިވާ ދެ ބަސް ހުއްޓި އަކީ، މަސްޖިދުލް އަމީރް ޖަމީލް ބަސް ހުއްޓި (ހުޅުމާލެ ފޭސް ދޭއް ނިރޮޅު މަގު) އާއި ސްޓެލްކޯ ފްލެޓް ބަސް ހުއްޓި (ހުޅުމާލެ ފޭސް - ހިތިގަސް މަގު) ކަމަށްވެސް އެ ކުންފުނިން ބުނެއެވެ. 

މިނީ ބަހުގެ ޚިދުމަތް ކޮންމެ ދުވަހަކު ހެނދުނު 5:45 އިން ރޭގަނޑު 00:15 އަށް ފޯރުކޮށްދެއެވެ. އެގޮތުން ކޮންމެ 10 މިނެޓަކާއި 15 މިނެޓާއި ދޭތެރޭ ވަގުތެއްގައި ކޮންމެ ބަސް ސްޓޮޕަކުންވެސް އެ ޚިދުމަތް ލިބޭއިރު މި ޙިދުމަތަށް ކަނޑައަޅާފައިވާ އަގަކީ -/7 ރުފިޔާއެވެ.

އަދި 65 އަހަރުން މަތީގެ މީހުންނަށާއި، 3 އަހަރުން ދަށުގެ ކުޑަކުދިންނަށް އައި.ޑީ. ކާޑު ދެއްކުމުން ހިލޭ މިނީ ބަހުގައި ދަތުރުކުރެވޭނެއެވެ. އަދި ޙާއްސަ އެހީއަށް ބޭނުންވާ ފަރާތްތަކުން ނޭޝަނަލް ސޯޝަލް ޕްރޮޓެކްޝަން (އެންސްޕާ) އިން ދީފައިވާ ކާޑު ދެއްކުމުން ހިލޭ ދަތުރުކުރެވޭނެއެވެ. މީގެ އިތުރުން، ޔުނިފޯރމްގައި ތިބޭ ސްކޫލް ކުދިންނަށްވެސް ބަހުގައި ހިލޭ ދަތުރުކުރެވޭނެއެވެ.

އާރް.ޓީ.އެލް. މާލޭ ބަހުގެ ރޫޓް މެޕް އާރް.ޓީ.އެލް. ވެބްސައިޓް އަދި ޓްރެވަލް އެޕް މެދުވެރިކޮށް ކަސްޓަމަރުންނަށް ބެލެން ހުންނާނެއެވެ.