ބައި ކިލޯއެއްހާ ޑްރަގް ގެންގުޅުނު މީހަކާއެކު ހެދި އިއުތިރާފްގެ އެއްބަސްވުމުގެ ސަބަބުން އުމުރު ދުވަހުގެ ޖަލު ހުކުމުގެ އަދަބު 12 އަހަރުގެ ޖަލު ހުކުމަކަށް ކުޑަކޮށްފި އެވެ.

މި މައްސަލާގައި އަދަބު ލުއި ކޮށްފައިވަނި ހއ. ކެލާ/ ސަންޝައިން އާދަމް ސަމޫހު ނަމަކަށް ކިޔާ މީހެއްގެއެވެ. 

އޭނާގެ މައްޗަށް ދައުވާ ހުށަހަޅަމުން ދައުލަތުން ބުނެފައިވަނީ, 29 އޮކްޓޫބަރު، 2020 ގައި، ސަމޫހު ދިރިއުޅޭ، ކ.މާލޭ ގ.ހޭވަންގޭގެ ފަސްވަނަ ފްލޯގައި އޭނާ މަސްތުވާތަކެތި ގެންގުޅެ، ބޭނުންކޮށް އޭގެ ވިޔަފާރި ކުރާކަމަށް ފުލުހުންނަށް ލިބިގެން ކޯޓު އަމުރެއްގެ ދަށުން އޭނާ ހައްޔަރު ކޮށްފައިވާ ކަމަށެވެ.

އަދި ފުލުހުން، އޭނާ ގަޔާއި، ދިރިއުޅުނު ގޭގެ އެކި ތަންތަނުން ޖުމުލަ ބައި ކިލޯއެއްހާ މަސްތުވާތަކެތީގެ ބާވަތެއް ކަމަށްވާ ކެނަބިސް ހޯދާފައިވާކަމަށް، އޭނާގެ ކުޑަ ކަމުދާ ތަކެތި ތަހުލީލު ކުރި އިރު އެވެސް ކެނަބިސް އަށް ޕޮޒިޓިވް ވެފައިވާ ކަމަށް ދައުވާ ގައި ބުނެފައިވާއިރު ދައުލަތުން އޭނާގެ މައްޗަށް ވަނީ ކެނަބިސް ޓްރެފިކް ކުރުމުގެ ދައުވާ އުފުލާފައެވެ.

މަސްތުވާތަކެތި ޓްރެފިކް ކުރުމުގެ ކުށަށް ގާނޫނުގައި އޮންނަ އެންމެ ލުއި އަދަބަކީ ވެސް އުމުރަށް ޖަލަށްލުމާ އެކު 100،000ރ. އިން ޖޫރިމަނާ ކުރުމެވެ.

އެހެން ނަމަވެސް އާދަމް ސަމޫހަށް އަދަބު އެއަށް ވުރެ ލުއިވީ އޭނާ ކުށަށް އިއުތިރާފްވުމުން އޭނާގެ އަދަބު 12 އަހަރަށް ލުއިކުރަން ދައުލަތުން އެއްބަސްވުމެއް ހެދުމުންނެވެ. އަދި އެއްބަސްވުމާ އެއްގޮތަށް ކޯޓުގައި އޭނާ ކުށަށް އިއުތިރާފްވި އެވެ.

އެއްބަސްވުމުގައިވާ ގޮތަށް މިދިޔަ ހޯމަ ދުވަހު ކްރިމިނަލް ކޯޓުން ހުކުމްކުރީ އޭނާ 12 އަހަރާއި ހަ މަހަށް ޖަލަށްލުމެވެ. އެކަމަކު އޭނާ އެއް އަހަރާއި 11 މަސް ބަންދުގައި ހޭދަކޮށްފައިވާތީ އޭނާ ތަންފީޒު ކުރަން ޖެހެނީ 10 އަހަރުގެ ޖަލު ހުކުމެކެވެ.

ޖަލު ހުކުމުގެ އަދަބު ކުޑަކުރިޔަސް، ޖޫރިމަނާގެ އަދަބު ލުޔެއް ނުކުރެ އެވެ. އެހެންވެ، ގާނޫނުގައި އޮންނަ 100،000ރ. އިން އޭނާ ވަނީ ޖޫރިމަނާކޮށްފަ އެވެ.