އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގެ މާބަނޑުމީހުންނާ ތުއްތު ކުދިންނަށް ޚާއްސަ އިމާރާތުގެ (ހިޔަލަ ވިންގް) ގެ ބައެއް ޚިދުމަތްތައް ވަގުތީގޮތުން ދަރުމަވަންތަ ހޮސްޕިޓަލަށް ބަދަލުކުރަން ނިންމައިފިއެވެ.

އައިޖީއެމްއެޗް އިން ނެރުނު ނޫސް ބަޔާނެއްގައި ބުނީ، ހިޔަލަ ވިންގް ގައި ބަލިމީހުން އަރާ ފޭބުމަށް ބޭނުންކުރާ ލިފްޓަށް ދިމާވި ޓެކްނިކަލް މައްސަލައަކާގުޅިގެން އެ އިމާރާތުން ދެމުން ގެންދާ ބައެއް ޚިދުމަތްތައް ވަގުތީގޮތުން ދަރުމަވަންތަ ހޮސްޕިޓަލުގެ 12، 16 އަދި 17 ވަނަ ފަންގިފިލާއަށް ބަދަލުކުރުމަށް ހަމަޖެހިފައިވާ ކަމަށެވެ.

• ހިޔަލަ ވިންގްގެ 2 ވަނަ ފަންގިފިލާއިން ދެމުންގެންދާ އިމަރޖެންސީ ޚިދުމަތްތައް ހޮސްޕިޓަލުގެ ޓްރޯމާ އެންޑް އިމަރޖެންސީ ޑިޕާޓްމަންޓުގެ (އަވަސްފަރުވާގެ ހިދުމަތްދޭ ތަން) އައިސޮލޭޝަން އޭރިއާއަށް ވަގުތީ ގޮތުން ބަދަލުކުރުން.

• ހިޔަލަ ވިންގުގެ އެހެން ފަންގިފިލާތަކުގައި އެޑްމިޓް ކުރެވޭ ބަލިމީހުން ވަގުތީ ގޮތުން ދަރުމަވަންތަ ބިލްޑިންގެ 12، 16 އަދި 17 ވަނަ ފަންގިފިލާގައި އެޑްމިޓް ކުރުން.

• ހިޔަލަވިންގުގެ ފުރަތަމަ ފަންގި ފިލާއިން މިހާރު ދެމުންގެންދާ އޯޕީޑީގެ ހިދުމަތްތަކަށް ބަދަލެއް ނައިސް މިހާރެކޭ އެއްފަދައިން ހިޔަލަ ވިންގުން ދިނުން.

• ހިޔަލަ ވިންގުގެ 10 ވަނަ ފަންގިފިލާއިން ދެމުންގެންދާ ނިއޯނޭޓަލް އިންޓެންސިވް ކެއަރ ޔުނިޓް (އެން.އައި.ސީ.ޔޫ)ގެ ހިދުމަތްތައް ބަދަލެއް ނައިސް މިހާރެކޭ އެއްފަދައިން ހިޔަލަ ވިންގުން ދިނުން.

މި ބަދަލާއެކު ބެޑްކެޕޭސިޓީ ދަށްވެ، އެނދުމަތިކުރެވޭ ބަލިމީހުންގެ އަދަދު މަދުކުރެވުމާ ގުޅިގެން ބައެއް ޚިދުމަތްތައް ދިނުމަށް ބުރޫ އެރުމަކީ އެކަށިގެންވާކަމެއް ކަން ފާހަގަ ކޮށް އައިޖީއެމްއެޗް އިން ބުނީ، އެކަމާއި ގުޅިގެން ދުރާލާ ޝެޑިއުލްކޮށްފައިވާ ބައެއް ސަރޖަރީތައް ވަގުތީގޮތުން މަޑުޖައްސާލެވިގެންދާނެ ކަމަށެވެ.  

އަދި ހިޔަލަ ވިންގުގެ ބަލިމީހުން ބޭނުންކުރާ ލިފްޓަށް ދިމާވި މައްސަލަ ވީހާވެސް އަވަހަށް ހައްލުކުރުމަށް އެ ހޮސްޕިޓަލުން މަސައްކަތް ކުރަމުންދާ ކަމަށްވެސް އެ ބަޔާނުގައި ވެއެވެ.

އަދި މައްސަލަ ހައްލުކުރެވުނުހާ އަވަހަކަށް ހިޔަލަ ވިންގުން ދެމުންގެންދިޔަ ޚިދުމަތްތައް އަލުން އެ އިމާރާތަށް ބަދަލު ކުރެވިގެންދާނެ ކަން ފާހަގަ ކޮށް އެހޮސްޕިޓަލުން ވަނީ މިކަމުގެ ސަބަބުން މި އިމާރާތުން ޚިދުމަތް ހޯއްދަވާ ފަރާތްތަކަށް ދިމާވެދާނެ ދަތިތަކަށް އާއްމުންގެ ފަރާތުން މައާފަށް އެދިފައެވެ.