ދީނަށް އުޅެ ދީން މަތިވެރި ކުރުމަށް އަދާލަތުޕާޓީއަށް ވަންނަ ނަމަ މާތް ރަސްކަލާނގެ އިރާދަފުޅުން އެމީހަކު ދިންނަވާ ނަސީބު ލިބޭ މީހަކަށް ވާނެ ކަމަށް ވިދާޅުވެ އެޕާޓީގެ ރައީސް އަދި ހޯމް މިނިސްޓަރ ޢިމްރާން ކުރީގެ ރައީސް އަދި އިދިކޮޅު ޕީޕީއެމްގެ ރިޔާސީ ކެނޑިޑޭޓް ޔާމީން އަބްދުލްގައްޔޫމް އަށް ރައްދުދެއްވައިފިއެވެ. 

ޢިމްރާން މިފަދައިން ވިދާޅުވީ، ސަރުކާރު ހިންގާ ކޯލިޝަންގައި ހިމެނޭ އަދާލަތު ޕާޓީއަށް ވަދެގެން މާތް ﷲގެ ދިންނެވުމާއި ފުއްސެވުމެއް ނުލިބޭނެ ކަމަށާއި އެޕާޓީން އެހާވަރަށް ސިޔާސީ ކަންކަން ރައްޔިތުންނަށް އޮޅުވާލަމުންދާ ކަމަށް ކުރީގެ ރައީސް އަދި އިދިކޮޅު ޕީޕީއެމްގެ ރިޔާސީ ކެނޑިޑޭޓް ޔާމީން އަބްދުލްގައްޔޫމް ވިދާޅުވުމާއި ގުޅިގެންނެވެ. 

ޔާމީންގެ ވާހަކަ އަށް ރައްދު ދެއްވައި ޢިމްރާން ކުރެއްވި ޓުވީޓެއްގައި ވިދާޅުވީ، އަދާލަތަށް ވަންނަނީ މީހުންނަށް އަނިޔާ ކުރުމާއި، ވައްކަން ކުރުމަށް ނަމަ، ރައީސް ޔާމީން ވިދާޅުވީ ރަނގަޅަށް ކަމަށެވެ. 

އެހެންނަމަވެސް، އަދާލަތުޕާޓީއަށް ވަންނަނީ މާތް ﷲގެ ދީނަށް އުޅެ، ދީން މަތިވެރި ކޮށް، ހެޔޮލަފާ މުއުމިނަކަށް ވުމުގެ ނިޔަތުގައި ނަމަ، ﷲގެ އިރާދަފުޅާއި އެކު އެމީހަކީ ދިންނަވާ ނަސީބު ލިބޭ މީހަކަށް ވާނެ ކަމަށް ޢިމްރާން ވިދާޅުވިއެވެ. 

ރޭ ހއ. އިހަވަންދޫގައި ބޭއްވި ޖަލްސާއެއްގައި ވާހަކަދައްކަވަމުން ރައީސް ޔާމީން ވަނީ އަދާލަތު ޕާޓީއާއި އެޕާޓީގެ އިލްމުވެރިންނަށް މި ސަރުކާރުން ކުރާ އެއްވެސް ގޯސްކަމެއް ނުފެންނަ ކަމަށް ވިދާޅުވެ އެޕާޓީއަށް ވަރަށް ބޮޑަށް ފާޑު ވިދާޅުވެފައެވެ.

"ކީއްވެގެންތޯ އަދާލަތު ޕާޓީ އުފެދުނީ. އަޅުގަނޑުމެންނަށް އޭރު ހީވި، އަދާލަތު ޕާޓީއަށް ވަދެގެން ނޫނީ ﷲގެ ދިންނެވުމާއި ފުއްސެވުމެއް ނުލިބޭނޭ. މިއަދު އެކަމު އަޅުގަނޑަށް ހީވަނީ އޭގެ އަނެއްކޮޅަށް. ﷲގެ ދިންނެވުމާއި ފުއްސެވުން ނުލިބޭނީ އަދާލަތު ޕާޓީއަށް ވަދެއްޖިއްޔާ." ޔާމީން ވިދާޅުވިއެވެ.