މާލެ ސަރަހައްދުން ބިންވެރިޔާ ސްކީމްގެ ދަށުން ގޯތި އަދި ގެދޮރުވެރިޔާ ސްކީމްގެ ދަށުން ފްލެޓަށް އެދިފައިވާ ފަރާތްތައް އިވެލުއޭޓް ކޮށް ނިމެން ދެތިން މަސް ނަގާނެ ކަމަށް ޕްލޭނިން މިނިސްޓްރީގެ ސްޓޭޓް މިނިސްޓަރު އަކުރަމް ކަމާލުއްދީން ވިދާޅުވެއްޖެއެވެ. 

ސަރުކާރުން ކުރިއަށްގެންދާ ބޯހިޔާވަހިކަމުގެ މަޝްރޫޢުގެ ދަށުން "ބިންވެރިޔާ ސްކީމް" އާއި "ގެދޮރުވެރިޔާ" ސްކީމަށް އެދި ހުށަހެޅުމުގެ ފުރުސަތު މިމަހު 15 ވަނަ ދުވަހު ވަނީ ހަމަވެފައެވެ. 

އަދި ސުންގަޑި ހަމަވިއިރު 35861 ފޯމް ލިބިފައިވާކަމަށް ޕްލޭނިން މިނިސްޓްރީން ވަނީ ހާމަކޮށްފައެވެ. މީގެ ތެރޭގައި ބިންވެރިޔާ ސްކީމަށް 15،164 ފޯމު ހުށައަޅާފައިވެއެވެ. އަދި ގެދޮރުވެރިޔާ ސްކީމްގެ ދަށުން 3 ކޮޓަރީގެ އެޕާޓްމަންޓަށް 14،489 ފޯމް ހުށައަޅާފައިވާއިރު، މިސްކީމްގެ ދަށުން 2 ކޮޓަރީގެ އެޕާޓްމަންޓަށް އެދި 6208 ފޯމް ވަނީ ހުށައަޅާފައެވެ.

އެ ފޯމް ހުށަހެޅި ފަރާތްތައް އިވެލުއޭޓް ކޮށް، ޝޯޓްލިސްޓު ކުރެވުނު ފަރާތްތައް ޢިއުލާން ކުރެވޭނެ އިރަކާއި ގުޅޭގޮތުން "ވޮއިސް" އިން ކުރި ސުވާލަކަށް ޖަވާބުދެއްވަމުން އަކްރަމް ވިދާޅުވީ، ފޯމު ހުށަހެޅުނު ފަރާތްތައް އިވެލުއޭޓް ކުރުމުގެ މަސައްކަތް މި ހަފްތާ ތެރޭގައި ފެށޭނެކަމަށެވެ. 

"އެ މަސައްކަތް އެއްކޮށް ނިންމާލައި، ފައިނަލް ލިސްޓް އާއްމު ކުރަން ދެތިން މަހެއް ނަގާނެ ކަމަށް އަޅުގަނޑުމެން މި ބަލަނީ." އަކްރަމް ވިދާޅުވިއެވެ. 

ސަރުކާރުން ކުރިއަށްގެންދާ ބޯހިޔާވަހިކަމުގެ މަޝްރޫޢުގެ ދަށުން "ބިންވެރިޔާ ސްކީމް" އާއި "ގެދޮރުވެރިޔާ" ސްކީމުގެ ދަށުން ގޯއްޗާއި ފްލެޓް ދޫކުރުމަށް ހަމަޖެހިފައިވަނީ ހުޅުމާލެއާއި ގުޅީފަޅުންނެވެ. މިޕްރޮގްރާމްގެ ދަށުން ހުޅުވާލާފައިވަނީ 4000 ފްލެޓާއި، 3000 ގޯއްޗަށް ކުރިމަތިލުމަށެވެ. މީގެތެރެއިން 1000 ގޯއްޗާއި، 4000 ފްލެޓް ދޫކުރުމަށް ހަމަޖެހިފައިވަނީ ހުޅުމާލެއިންނެވެ. އަދި ބާކީ 2000 ގޯތި ދޫކުރުމަށް ނިންމާފައި ވަނީ ގުޅީފަޅުންނެވެ