ފަނޑިޔާރުންގެ ގާނޫނަށް ފުލުފުލުގައި އިސްލާހުތައް ހުށައަޅަމުންދަނީ، ފަނޑިޔާރު ގެއަކީ ސަރުކާރު ހިންގާ މައި ޕާޓީ އެމްޑީޕީގެ ހަރުގެއަކަށް ހެދުމަށްކަމަށް ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފު (ސެމްބެ) ވިދާޅުވެއްޖެއެވެ.
މެމްބަރު ހުސެއިން މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ 3 ވަނަ ދައުރުގެ 24 ވަނަ ޖަލްސާގައި، ފަނޑިޔާރުންގެ ގާނޫނަށް ހުށައަޅާފައިވާ އިސްލާހަށް ވާހަކަދައްކަވަމުންނެވެ.
އެ އިސްލާހަށް ބަހުސްކުރައްވަމުން ހުސެއިން ވިދާޅުވީ ފަނޑިޔާރުގެ އެމްޑީޕީގެ ހަރުގެއަކަށް ހެދުމަށް ގިނަ މަސައްކަތްތަކެއް ކުރަމުންދާ ވާހަކައަކީ މީގެ ކުރިންވެސް އިދިކޮޅުން ދައްކަމުންދާ ވާހަކަތަކެއްކަމަށެވެ.
އެގޮތަށް ދަންނަވަން ޖެހެނީ ފަނޑިޔާރުންގެ ގާނޫނަށް އިސްލާހުތައް ހުށައަޅާއިރު ސިޔާސީ ނުފޫޒުން ކޯޓުތައް މިނިވަންކުރުމަށް ވީ ވައުދާއި އެއްގޮތަށް ޖުޑިޝަލް ސާރވިސް ކޮމިޝަން އިސްލާހު ކުރުމުގެ މަސައްކަތް ނުކުރާތީކަމަށް ހުސެއިން ވިދާޅުވިއެވެ.
"ޖޭއެސްސީ އިސްލާހުކުރަން، އެއީ މި ސަރުކާރު އައުމުގެ ކުރިން ރައްޔިތުންނާއި ހަމަޔަށް އެންމެ ވަރުގަދަކޮށް ދެއްކި ވާހަކަ. އަދި މެނިފެސްޓޯގައި އެންމެ ވަރުގަދަ އެއް ވައުދުވެސް މެ. އެހެން ނަމަވެސް މި ވައުދު ފުއްދުމަށްޓަކައި، 4 އަހަރަކީ މަދު ދުވަސްތަކެއް ނޫން، މިހާރު ފެށިގެން އެދަނީ ރައްޔިތުންނަށް ދަޅަދެއްކުމަށްޓަކައި އެމްޑީޕީގެ ބޮޑު މަންޒަރު ދެއްކުމަށް ކުރަމުންދާ މަސައްކަތް"
ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފް
އެވާހަކަތަކާއި ގުޅުވާ މެމްބަރު ހުސެއިން ވިދާޅުވީ ރާއްޖޭގެ ޖުޑިޝަރީ އިސްލާހުކުރުމަށް އެމްޑީޕީއިން ވީ ވައުދަކީ އެއްވެސް ދިރާސާއެއް ނެތި، ރައްޔިތުންގެ ވޯޓު ހޯދުމުގެ ނިޔަތުގައި ވީ ވައުދެއްކަން މިހާރު ފެންނަމުންދާކަމަށެވެ.
ރައްޔިތުންގެ މަޖިލީހުންވެސް ކަންކަން ކުރަމުންދާ ގޮތަކީ ސަރުކާރުން ހުށައަޅާ ބިލުތައް ރަބަރު ސްޓޭމްޕު ޖަހާ އުސޫލުން ފާސްކޮށްދިނުންކަމަށް އޭނާ ފާހަގަކުރެއްވިއެވެ. އަދި ވިދާޅުވީ، އެހެންވުމުގެ ސަބަބުން ސަރުކާރު ޖަވާބުދާރީކޮށް ކަންކަން އިސްލާހުކުރުމުގެ މަސައްކަތް މަޖިލީހުގެ ތެރެއިން ކުރުމުގެ ފުރުސަތުވެސް ނޯންނަކަމަށެވެ.
Advertisement
This content is created and paid for by advertisers and does not involve Voice Journalists
