ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވެސް ހުންނެވީ "ނަގޫ ފިތިފައި" ކަމަށް ވިދާޅުވެ ކުރީގެ ރައީސް ޔާމީން އެމަނިކުފާނަށް ފާޑުވިދާޅުވެއްޖެއެވެ. 

ހއ.ދިއްދޫ ގައި ރޭ ކުރިއަށް ދިޔަ ޕީޕީއެމްގެ ޖަލްސާގައި ވާހަކަފުޅުދައްކަވަމުން ރައީސް ޔާމީން ވިދާޅުވީ، ރައީސް ނަޝީދަކީ، އަމިއްލަ ފުޅަށް ޑިމޮކްރަސީ ގެ ޗެންޕިއަންކަމަށް ދައުވާ ކުރައްވާ ބޭފުޅެއްކަމަށެވެ. އެހެން ނަމަވެސް ޕީޕީއެމް އިން ރައްޔިތުންގެ މަޖިލީހަށް ފޮނުވި ސިޓީތަކެއްގެ ލެޓަހެޑްގައި "އިންޑިއާ އައުޓް" ޖަހާފައި ހުރުމުން މަޖިލީހުން އެ ސިޓީ ބަލައި ނުގަތް ކަމަށެވެ.

"މަޖިލީހުން އަޅުގަނޑުމެންނަށް ލިބުނު ދައުވަތަކަށް އަޅުގަނޑުމެން ނަންތަކެއް ހުށަހެޅީ. އެކަމަކު އަޅުގަނޑުމެންގެ ހުރިހާ ލެޓަހެޑެއްގައި އިންޑިއާ އައުޓް ޖަހާފައި އޮންނާނެ. މިއީ ރާއްޖެއިން ބޭރަށް އދ.އަށް ދިޔަސް އެހެން ތަނަކަށް ދިޔަސް އަދި އިންޑިއާއަށް ދިޔަސް މިހެން ޖެހިފައި އޮންނާނެ. މިސިޓީތައް މިހާތަނަށް އެއްވެސް ތަނަކުން ބަލައި ނުގެންފައެއް ނެތް. އެކަމަކު ހިތާމައަކީ ދެރަވަނީ ލަދުގަންނަނީ ލަދުވެތި ވަނީ އެމްޑީޕީގެ ރައީސް، ޑިމޮކްރަސީގެ ޗެމްލިއަން ކަމަށް ދައުވާ ކުރައްވާފައި މިއަދު އެސިޓީ ބަލައި ގަންނާކަށް ނުކެރުނޭ. އެއީ އިންޑިއާ އައުޓް ޖަހާފައި އޮތީމަ. ދެން ރައީސް ނަޝީދުގެ ބަހުން ނޫންތޯ މިވާހަކަ ދަންނަވަންވީ. ތިވަރަކަށް ނޫންތޯ ރައީސް ނަޝީދުގެ ނަގޫ ފިތޭނީ." ޔާމީން ވިދާޅުވިއެވެ.

ޔާމީން އިތުރަށް ވިދާޅުވީ، ނަޝީދަކީ އަމިއްލަފުޅަށް ނެލްސަން މަންޑޭލާއަށް ވެވަޑައިގެން އެގޮތުގައި މަޝްހޫރުކަން ހޯއްދަވަން މަސައްކަތް ކުރައްވާ ބޭފުޅެއް ކަމަށާއި، ރައީސް މައުމޫނުގެ ވެރިކަމުގައި ހިޔާލު ފާޅުކުރުމުގެ މިނިވަންކަމާއި އެއްވެ އުޅުމުގެ މިވަންކަން ދޭން ނުކެރެނީ ނަގޫ ފިތިގެން ކަމަށް ވިދާޅުވެ އެމުހާވިރާ ދިވެހިންގެ ތެރެއަށް ގެނެސްދެއްވި ބޭފުޅަކީ ނަޝީދު ކަމަށެވެ. އެހެންނަމަވެސް މިއަދު ރައްޔިތުން ކައިރީ ނަޝީދު ދައްކަވަން އޮތީ ކޮން ވާހަކައެއްތޯ ޔާމީން ސުވާލު ކުރެއްވިއެވެ.