ކުރީގެ ރައީސް ޔާމީން އަބްދުލްގައްޔޫމް ދައްކަވަނީ ކުޑަކުދިން ދައްކާ ކަހަލަ ބޯ ހަމަނުޖެހޭ ވާހަކަ ކަމަށް ހޯމް މިނިސްޓަރ އަދި އަދާލަތުޕާޓީގެ ރައީސް އިމްރާން ވިދާޅުވެއްޖެއެވެ.
ޢިމްރާން އެފަދައިން ވިދާޅުވެފައި ވަނީ، އިއްޔެ ހއ. ބާރަށުގައި އިދިކޮޅު ޕީޕީއެމް/ޕީއެންސީގެ ކޯލިޝަނުން ބޭއްވި ޖަލްސާގައި ވާހަކަ ދައްކަވަމުން ރައީސް ޔާމީން ދެއްކެވި ވާހަކާފުޅަކާއި ގުޅިގެންނެވެ. އެގޮތުން އެ ޖަލްސާގައި ރައީސް ޔާމީން ވަނީ, ރައީސް އޮފީހުގެ ޗީފް އޮފް ސްޓާފް ޢަލީ ޒާހިރު، އެމަނިކުފާނުގެ ޝަރީއަތް ހިނގަމުންދާ ގޮތް އިރު އިރުކޮޅާ ބައްލަވާ ކަމަށް ތުހުމަތުކުރައްވާފައެވެ. އަދި އޭނާ އެގޮތަށް ކަންތައް ކުރައްވަނީ ކީއްވެތޯވެސް ޔާމީން ވަނީ ސުވާލު ކުރައްވާފައެވެ.
ޔާމީންގެ ވި ވާހަކަތަކަށް ރައްދު ދެއްވައި ޢިމްރާން ކުރެއްވި ޓުވީޓެއްގައި ވަނީ، ރާއްޖޭގެ ރައީސްކަން ކުރެއްވި ބޭފުޅަކު، ކުޑަކުދިން ދައްކާ ކަހަލަ ހަމަ ނުޖެހޭ ވާހަކަ ދައްކަވާތީ ހައިރާންވާ ކަމަށް ވިދާޅުވެ ފާޑުވިދާޅުވެފައެވެ.
ރައީސް ޔާމީންގެ ޝރީޢަތާއި ގުޅޭ ކަންކަން އަލީ ޒާހިރު ބައްލަވާ ކަމަށް އެމަނިކުފާނު ވިދާޅުވި ނަމަވެސް އަލީ ޒާހިރު ވަނީ އެކަން ދޮގު ކުރައްވާފައެވެ. އެގޮތުން ޢަލީ ޒާހިރު ވިދާޅުވީ، ރައީސް ޔާމީނާއި މެދު ނެތް ޝައުގެއް ރައީސް ޔާމީންގެ ޝަރީއަތާއި މެދުވެސް އަމުދުން ނެތް ކަމަށެވެ. އަދި ރައީސް ޔާމީންގެ ޝަރީޢަތް ހިނގަމުންދާ ގޮތް ޔޫޓިއުބުން ފެންނައިރުވެސް ބަލާލާނެ ވަގުތު ނުވާ ކަމަށް އޭނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
