ރީބްރޯޑްކާސްޓް ކުރުމުގެ ޚިދުމަތް މޮނޮޕޮލައިޒްކޮށް، ރައްޔިތުންނަށް ހެޔޮ އަގުގައި ޓީވީ ބަލާލުމުގެ ފުރުޞަތު ގެއްލުވާލަން މަސައްކަތް ނުކުރުމަށް ތުލުސްދޫ ދާއިރާގެ މެމްބަރު އިބްރާހިމް ނަސީމް ބްރޯޑްކޮމް ކޮމިޝަނަށް ގޮވާލައްވައިފިއެވެ.
ނަސީމް މިފަދައިން ގޮވައިލެއްވީ، ދިވެހިރާއްޖޭގައި ރީ ބްރޯޑްކާސްޓިންގ ހިދުމަތްދޭ ހުރިހާ ފަރާތްތަކަށް ތަފާތުކުރުމެއްނެތި އިންސާފުވެރިކަމާއި ވާދަވެރިކަމާއިއެކު ވިޔަފާރިކުރެވޭނެ މާހައުލެއް ގާއިމްކޮށްދީ، ވަކިބައެއްގެ ނުފޫޒުން ކުދި އޮޕަރޭޓަރުންގެ ވިޔަފާރިތައް ހަލާކުކޮށްލުމަށް ދައުލަތުގެ މުއައްސަސާތައް މެދުވެރިކޮށް އަޅާފައިވާ ހުރަސްތައް ނައްތާލުމަށް ސަރުކާރަށް ގޮވާލައި މަޖިލީހުގެ ނައިފަރު ދާއިރާގެ މެންބަރު އަހުމަދު ޝިޔާމް ހުށަހެޅުއްވި ގަރާރަށް ބަހުސް ކުރައްވަމުންނެވެ.
ޝިޔާމް ގެ ގަރާރަށް ބަހުސް ކުރައްވަމުން ނަސީމް ވިދާޅުވީ، ފުޅާ ދާއިރާއެއްގައި ރީބްރޯޑްކާސްޓް ކުރުމަކީ ކުޑައަގެއްގައި ކުރެވޭނެ ކަމެއް ކަމަށް ގަބޫލު ނުކުރައްވާ ކަމަށެވެ.
"އެހެން ކަމުން ރީބްރޯޑްކާސްޓް ކުރުމުގެ ފުރުސަތު ގިނަ ފަރާތްތަކަށް ދީގެން، ރައްޔިތުންނަށް ދެވޭ ޚިދުމަތުގެ ފެންވަރު ރަނގަޅުކޮށް، ވާދަވެރިން އުފައްދައިގެން ޚިދުމަތުގެ އަގު ތިރިކުރަން މަސައްކަތް ކުރުމުގެ ބަދަލުގައި، ނުލަފާ ދޮން ބަފައެއްގެ ރޯލު އަދާކޮށް، ގާނޫނީ އިމުން ބޭރުން ފާޑު ފާޑުގެ ގަވާއިދުތައް ހަދައި، މިޚިދުމަތް މޮނޮޕޮލައިޒްކޮށްގެން ތިބެ، ރައްޔިތުންނަށް ހެޔޮ އަގުގައި ޓީވީ ބަލާލުމުގެ ފުރުޞަތު ގެއްލުވާލަން މަސައްކަތް ނުކުރުމަށް އަޅުގަނޑު ބްރޯޑްކޮމް އަށް ނަސޭހަތްތެރިވަން"
ތުލުސްދޫ ދާއިރާގެ މެމްބަރު އިބްރާހިމް ނަސީމް
މިއާއެކު ނަސީމް ވަނީ ބްރޯޑްކޮމް ގަވާއިދުގައި ހިމެނޭ ގާނޫނާއި ތަޢާރުޒުވާ މާއްދާތައް އުވާލުމަށް ގޮވާލާފައި އެ ގަވާއިދަކީ ވިޔަފާރިތައް ހަލާކު ކޮށްލާ ގަވާއިދެއް ކަމަށް ވިދާޅުވެފައެވެ. އަދި އެއީ އިންވެސްޓަރުންގެ އިތުބާރު ގެއްލުވާލައި ރާއްޖޭގެ އަގު ވައްޓާލާ ގޮތަށް ހަދާފައިވާ ގަވާއިދެއް ކަމަށްވެސް އޭނާ ވިދާޅުވިއެވެ.
ނަސީމް ވިދާޅުވީ ދިވެހިރާއްޖޭގައި ބްރޯޑްކާސްޓްކުރުމުގެ ހުއްދަ ދީފައިވާ ކުންފުންޏެއް ކަމަށްވާ ދިރާގަށް، އެ ދެވިފައިވާ ހުއްދަ އައު ނުކުރާނެ ކަމަށް އަންގާފައިވާ ކަމަށެވެ. އަދި ދިރާގު ޓީވީގެ ޚިދުމަތް ހޯދަމުންދާ 80 ވަރަކަށް ރަށް ރާއްޖޭގައި އޮތް އިރު އެއީ 15000 އެއްހާ ކަސްޓަމަރުން ކަންވެސް ނަސީމް ފާހަގަކުރެއްވިއެވެ.
"ދިރާގުން ރީބްރޯޑްކާސްޓިންހެ ޚިދުމަތް ފެށީ ތިރީހަކަށް މިލިއަން ޑޮލަރު ޚަރަދު ކޮށްގެން ކަމަށްވޭ. ރަނގަޅު ވާހަކައެއް. ދިރާގުގެ 52 ޕަސެންޓް ހިއްސާ އޮތީ ބަޓަލަކޯގައި. އެއީ ބޭރުގެ ކުންފުންޏެއް. މިއަދު ދިރާގު ވެރިން އެ ތިބީ ބްރޯޑްކާސްޓިން ކޮމިޝަންގެ މިގަވާއިދާ ގުޅޭގޮތުން ބަޓަލްކޯއާއި މިވާހަކަ ހިއްސާ ކުރަން ނުކެރިފައި. ކީއްވެގެންތޯ؟ އިންވެސްޓާ ކޮންފަރެންސް ރާއްޖެއާއި މެދު ގެއްލިދާނެތީ."
ތުލުސްދޫ ދާއިރާގެ މެމްބަރު އިބްރާހިމް ނަސީމް
ނަސީމް ވިދާޅުވީ ބްރޯޑްކާސްޓިން ކޮމިޝަންގައި ތިބީ ދިވެހި ރައްޔިތުންދެކެ ލޯބިވާ ބައެއްކަމާއިމެދު ސުވާލު އުފެދޭ ކަމަށެވެ. އެހެނީ، ދިރާގަކީ 14,000 ދިވެހި ރައްޔިތުންގެ ހިއްސާ އޮތް ކުންފުންޏެއް ކަމަށާ، އަދި ދައުލަތަަށްވެސް ޓެކްސް ގެ ގޮތުގައި އެންމެ ބޮޑު އެއްޗެއް ދައްކަނީ ދިރާގުން ކަމަށް ނަސީމް ފާހަގަކުރެއްވިއެވެ. ކަން މިހެން އޮއްވައި، ގާނޫނާއި ޚިލާފަށް ހެދިފައިވާ ގަވާއިދަކުން ދިރާގު "ކޮށައި އަޅާލުމަކީ" ދިވެހި ރައްޔިތުން ޔަރައްގީއަށް ކުރާ އުއްމީދު ފުނޑު ފުނޑު ކޮށްލުން ކަމަށެވެ. ދިވެހިރާއްޖޭގެ ތަރައްގީގެ މަޝްރޫއުތައް ހިންގޭނީ ދިރާގު ފަދަ ބޮޑު ޑިވިޑެންޓް ކުންފުނިތައް ވުޖޫދުގައި އޮވެގެން ކަމަށްވެސް އޭނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
