ފަރަންސޭސި ވިލާތުގެ ލިޔޯންގައި ހުންނަ އިންޓަޕޯލް ހެޑްކުއާޓަރގައި މަސައްކަތްކުރުމުގެ ފުރުސަތު ދިވެހި ފުލުހުންނަށް ލިބިފައިވާކަން ކަމިޝަނާ އޮފް ޕޮލިސް މުހައްމަދު ހަމީދު ހާމަކުރައްވައިފިއެވެ. 

މިއީ އިންޓަޕޯލުގައި މަސައްކަތް ކުރުމުގެ ފުރުސަތު ދިވެހި ފުލުހުންނަށް ލިބިގެންދިޔަ ފުރަތަމަ ފަހަރެވެ. 

އެކަން ފާހަގަކުރައްވާ ކަމިޝަނާ އޮފް ޕޮލިސް މުހައްމަދު ހަމީދު ކުރެއްވި ޓްވީޓެއްގައި ވިދާޅުވީ ތާރީޚުގައި ފުރަތަމަ ފަހަރަށް ދިވެހި ފުލުހުންގެ ޚިދުމަތަށް ލިބުނު ފުރުސަތުގައި ދިވެހި ފުލުހުންގެ ޗީފް އިންސްޕެކްޓަރެއް، ތިން އަހަރުގެ މުއްދަތަކަށް އިންޓަޕޯލުގައި މަސައްކަތްކުރަން، އެތަނުގެ ހެޑްކުއާޓަރގައި ހުރުމުގެ ފުރުޞަތު ލިބިފައިވާކަމަށެވެ.

Advertisement

އޭނާ މަސައްކަތްކުރަން ހަމަޖެހިފައިވަނީ އިންޓަޕޯލްގެ ކްރައިމް ޔުނީޓުގައިކަމަށްވެސް ސީޕީ ހަމީދު ވިދާޅުވިއެވެ. އަދި ކަނޑައެޅޭ އޮފިސަރު މިހާރުވަނީ ހޮވާފައިކަމަށާ، މިއަހަރު ނިމުމުގެ ކުރިން އޭނާ އިންޓަޕޯލްގެ ހެޑްކުއާޓަރއަށް ފުރާނެކަމަށްވެސް ހަމީދު ވިދާޅުވިއެވެ.

ސީޕީ ވިދާޅުވީ އިންޓަޕޯލް ހެޑްކުއާޓަރގައި މަސައްކަތް ކުރުމުގެ ފުރުޞަތު ރާއްޖެއަށް ލިބިގެން ދިއުމަކީ ކުށްކުރުމާ ދެކޮޅަށް ދިވެހި ފުލުހުންގެ ޚިދުމަތުން ކުރަމުންދާ މަސައްކަތް ބައިނަލްއަޤްވާމީ ފެންވަރުގައި ވެސް ފާހަގަ ކުރެވިގެންދާ ކަމެއްކަމަށެވެ.

އަދި މިއީ ދިވެހި ފުލުހުންގެ ޚިދުމަތުގެ ގާބިލުކަން ތަރައްޤީ ކުރުމަށް ވެސް ލިބިގެންދިޔަ ރަނގަޅު ފުރުސަތެއް ކަމަށް ސީޕީ ވިދާޅުވިއެވެ.

ފުރަތަމަ ފަހަރަށް ދިވެހި ފުލުހުންނަށް އިންޓަޕޯލްގައި މަސައްކަތް ކުރުމުގެ ފުރުސަތު ލިބިފައިވާއިރު، ފްރާންސްގެ ލިޔޯންގައި ހެޑްކުއާޓަރު ހުންނަ މިޖަމްޢިއްޔާއަކީ ދުނިޔޭގެ އެންމެ ބޮޑު ބައިނަލްއަގްވާމީ ފުލުހުންގެ ޖަމިއްޔާއެވެ. ދުނިޔޭގެ އެކި ކަންކޮޅުތަކުގައި މި ޖަމްޢިއްޔާގެ 7 ސަރަހައްދީ ބިއުރޯ ހުރެއެވެ. ޖުމުލަ 195 މެމްބަރު ގައުމެއްގައި ނެޝަނަލް ސެންޓްރަލް ބިއުރޯ ހުރެއެވެ.