ދައުލަތަށް ކެރިކުޅަދާނަ ވީ މިންވަރަކުން ހުރިހާ ކުޅިވަރެއް ކުރިއަރުވަން ވެސް އެހީވާނެ ކަމަށް ގޫތް މިނިސްޓަރު އަހްމަދު މަހްލޫފް ވިދާޅުވެއްޖެއެވެ.
މަހްލޫފް މިފަދައިން ވިދާޅުވީ، މިހާރު ކުރިއަށްދާ ރައްޔިތުންގެ މަޖިލީހުގެ ޖަލްސާގައި ރޭސިންގް ކުރިއެރުވުމާއި ގުޅޭގޮތުން ސަރުކާރު ގެންގުޅުއްވާ ސިޔާސަތާއި ގުޅޭގޮތުން ކުޅުދުއްފުށި އުތުރު ދާއިރާގެ އެމްޑީޕީގެ މެންބަރު ޔާސިރު އަބްދުއްލަތީފް ކުރެއްވި ސުވާލަށް ޖަވާބުދެއްވަމުންނެވެ.
ޔާސިރު ވިދާޅުވީ ރޭސިން އަކީ ދުނިޔޭގައި ވަރަށް ބޮޑު ކުޅިވަރަކަށްވާއިރު އެ ކުޅިވަރު ރާއްޖޭގައިވެސް ވަރަށް ބާރަށް ކުރިއަރަމުން އަންނަ ކަމަށެވެ. އަދި އެ ކުޅިވަރުން ކުޅުދުއްފުށިންވެސް ރަންވަނަތައް ހޯދަމުން އަންނައިރު، އެ ކުޅިވަރު ކުރިއަރުވަން ވަސީލަތްތައް ގާއިމް ކުރުމަށް ސަރުކާރުގެ ވިސްނުން ހުރިތޯ އާއި، އެ ވަސީލަތްތައް ގާއިމް ކުރެވޭއިރު، އެ ކުޅިވަރުން އެންމެ ކުރިއަރާފައިވާ މީހުން ތިބި ސަރަހައްދު ތަކުގައި ވަސީލަތްތައް ގާއިމް ކުރުމަށް ކިހާ އިސްކަމެއް ދެއްވާނެތޯ ޔާސިރު ސުވާލު ކުރެއްވިއެވެ.
ޔާސިރުގެ ސުވާލަށް ޖަވާބު ދެއްވަމުން މިނިސްޓަރު މަހްލޫފް ވިދާޅުވީ، ދުނިޔޭގައި މީހުން ކުޅެމުންދާ ވަރަށް ގިނަ ކުޅިވަރުތައް ހުރިކަމަށެވެ. އަދި އޭގެ ތެރެއިން ގިނަ ކުޅިވަރުތަކަށް ޝައުގުވެރިވާނެ ގިނަ ޒުވާނުންނެއް ރާއްޖޭގައި އުޅޭނެ ކަމަށެވެ. އެހެންނަމަވެސް، އެކަންކަމަށް އެހީވަމުންދަނީ މިނިސްޓްރީގެ ވަސީލަތްތައް ހުރި މިންވަރަކުން ކަމަށްވެސް މަހްލޫފް ފާހަގަކުރައްވިއެވެ.
އަޅުގަނޑުމެންގެ އެވަރަށް ބިން ހުރިތޯ، ފައިސާ ހުރިތޯ ކިތައް ކުޅިވަރަށްތޯ އަޅުގަނޑުމެންނަށް ނޭޝަނަލް ސްޓޭޓަސް ދެވެނީ. މިހުރިހާ ކަމެއް ހަގީގަތުގައި މިނެ ކިރާފަ، އަޅުގަނޑުމެން ކުރާ ކޮންމެ ކަމެއް ކުރަން މިޖެހެނީ.
މިނިސްޓަރު އަހްމަދު މަހްލޫފް
މިއާއެކު މަހްލޫފް ވިދާޅުވީ، ރޭސިންގް ކުރިއަރުވަން ރޭސިން އެސޯސިއޭޝަނެއް އުފައްދައި އެ އެސޯސިއޭޝަނުންވެސް ވަރަށް ބޮޑު މަސައްކަތްތަކެއް ކުރަމުންދާތާ ވަރަށް ޒަމާން ވެއްޖެކަމަށެވެ. އަދި އެ މަސައްކަތް ތަކުން، ކޮންމެވެސް ވަރެއްގެ އަލިކޮޅެއް މިހާރު ފެންނަމުން ދާކަން ފާހަގަކުރައްވައި މަހްލޫފް ވިދާޅުވީ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވެސް ރޭސިންގް އެސޯސިއޭޝަނާއި ބައްދަލު ކުރައްވައި އެކަމަށް ބޭނުންވާ ޓްރެކްއެއް އަޅާނެ ބިން ހަމަޖައްސަވާނެ ކަމުގެ ޔަގީންކަން މިހާރު ދެއްވާފައިވާކަމަށެވެ.
"ޑްރިފްޓް އެސޯސިއޭޝަނާއި ވެސް އިއްޔެވެސް އަޅުގަނޑު ބައްދަލު ކުރިން. އެމީހުންގެ ޝައުގުވެރިކަމަކީ މުޅިން އެހެން ތަފާތު ކަމެއް. އެމީހުން އެކަން ކުރަންވެސް ތަންތަން އެބަ ބޭނުންވޭ. އެހެންވީމާ ބައިވަރު. ރޯލާ ސްކޭޓް ކުރަން ބޭނުންވާ ކުދިން އަންނާނެ. ކޮންމެސް އެހެން ކުޅިވަރެއް. ރަގްބީ ކުޅެން ބޭނުންވާ ކުދިން އުޅޭ. ބައިވަރު. އިނގޭތޯ. އެހެންވީމާ ދައުލަތައް ކެރިކުޅަދާނަ ވީވަރަކުންނޭ ކިޔާފަ ނޫންތޯ ގާނޫނު އަސާސީގައިވެސް އޮންނަނީ ކަންކަން ކޮށްދޭވާހަކަ. އެހެންވީމާ ކުޅިވަރުގައިވެސް ކެރިކުޅަދާނަ ވީ ވަރަކަކުން ދެވެން އޮތް އެހީތެރިކަމެއް އިރާދަކުރެއްވިޔާ ދޭނަން." މިނިސްޓަރު މަހްލޫފް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
