އެއްވެސް ސިޔާސީ ޕާޓީއަކަށް ދައުލަތުން ލާރި ދޭން ނުޖެހޭކަމަށާއި، ސިޔާސީ ޕާޓީތަކުން ލާރި ހޯދަންވާނީ މެމްބަރުން އަތުން ޗަންދާ ނަގައިގެންކަމަށް މަޖިލީހުގެ އިނގުރައިދޫ ދާއިރާގެ މެމްބަރު ހަސަން އަހުމަދު (ހަސަންޓޭ) ވިދާޅުވެއްޖެއެވެ.
ހަސަންޓޭ މިފަދައިން ވިދާޅުވެފައިވަނީ ސިޔާސީ ޕާޓީތަކަށް މީހުން ވެއްދުމާއި ވަކި ކުރުމުގައި އަމަލުކުރަމުންދާ އުސޫލާއި ގުޅިގެން އާންމުންނާއި ސިޔާސީ ޕާޓީތަކުގެ ކަންބޮޑުވުންތަކާއި ގުޅޭގޮތުން ހުށައެޅިފައިވާ މައްސަލަ މިނިވަން މުއައްސަސާތަކާއި ބެހޭ ކޮމެޓީއިން ދިރާސާކޮށް ނިންމި ގޮތުގެ ރިޕޯޓާއި ގުޅޭގޮތުން މަޖިލީހުގައި ވާހަކަދައްކަވަމުންނެވެ.
ހަސަންޓޭ ވިދާޅުވީ ސިޔާސީ ޕާޓީތަކަށް ދައުލަތުން ޚަރަދުކުރުމަކީ ދުނިޔޭގެ މަދު ގައުމެއްގައި ނޫނީ ކޮށް އުޅޭ ކަމެއް ނޫންކަމަށެވެ. އެހެންކަމުން މިހާރު ސިޔާސީ ޕާޓީތަކަށް ޚަރަދުކުރާ ގޮތަށް ދައުލަތުން ފައިސާ ދޭން ޖެހޭކަމަށް ގަބޫލު ނުކުރައްވާކަމަށް އޭނާ ވިދާޅުވިއެވެ.
"އަޅުގަނޑު ދެކޭގޮތުގައި ސިޔާސީ ޕާޓީތަކަށް ހަގީގަތުގައި ލާރިވެސް ދޭކަށް ނުޖެހޭ. ސިޔާސީ ޕާޓީތަކުން ލާރި ހޯދާނީ އެ ސިޔާސީ ޕާޓީތަކުގެ މެމްބަރުން އަތުން ނަގާ ޗަންދާއިން"
އިނގުރައިދޫ ދާއިރާގެ މެމްބަރު ހަސަން އަހުމަދު (ހަސަންޓޭ)
ހަސަންޓޭ އިތުރަށް ވިދާޅުވީ ސިޔާސީ ޕާޓީތަކަށް ކޮންމެހެން ލާރި ދޭނަމަ އެކަން ކުރައްވާނީ އިންތިޚާބު ތަކުގައި ސިޔާސީ ޕާޓީތަކުން ބައިވެރިވެ ހޯދާ ނަތީޖާތަކުގެ މައްޗަށްކަމަށް އޭނާ ވިދާޅުވިއެވެ.
ސިޔާސީ ޕާޓީތަކަށް ދައުލަތުން ބޮޑެތި ޚަރަދުތައް ކުރާއިރު، އެ ޚަރަދުތަކާއި އެއްވަރު މަސައްކަތްތަކެއްވެސް ސިޔާސީ ޕާޓީތަކުން ކުރަން ޖެހޭކަން އޭނާ ފާހަގަކުރެއްވިއެވެ. އެހެން ނަމަވެސް އެއްވެސް އިންތިޚާބެއްގައި ބައިވެރި ނުވިނަމަވެސް، ނުވަތަ ސިޔާސީ ހަރަކާތްތައް ކުރިއަށް ނުގެންދިޔަނަމަވެސް، ހަސަންޓޭ ވިދާޅުވީ ބަރާބަރަށް ދައުލަތުން ސިޔާސީ ޕާޓީތަކަށް ޚަރަދު ކުރަމުންދާކަމަށެވެ.
އެީ ބަދަލުވާން ޖެހޭ ކަމެއްކަމަށާއި، އެ އުސޫލުން އަމަލުކޮށްގެން ނޫނީ ސިޔާސީ ޕާޓީތައްވެސް ޒިންމާދާރު ކުރެވިދާނެކަމަށް ގަބޫލު ނުކުރައްވާކަމަށް ހަސަންޓޭގެ ވާހަކައިގައި ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
