ބޮޑެތި ސިއްރުތައް ދަންނަ ސިޔާސީ ބޭފުޅަކަށް ވެގެން، ކުޑަކުޑަ ފައިސާކޮޅަކަށް މުޅި ޤައުމު ފަނާކޮށްލާފައިވާ ކަމަށް ބުނެ ޖަމިއްޔަތުއްސަލަފްގެ ޗީފް މާކެޓިންގ އޮފިސަރ، ޢަލީ ރަމީޒު ޢަދާލަތު ޕާޓީގެ ރައީސް އަދި ހޯމް މިނިސްޓަރ ޢިމްރާން އަށް ނުސީދާގޮތެއްގައި ބަހުގެ ހަމަލާތަކެއް ދެއްވައިފިއެވެ.
ވަކި މީހެއްގެ ނަން ހާމަނުކޮށް ނުސީދާކޮށް މިނިސްޓަރު ޢިމްރާން އަށް އަމާޒުކޮށް ޢަލީ ރަމީޒު މިއަދު ކުރެއްވި ޓުވީޓެއްގައި ވިދާޅުވީ، ތިމާ ނޫން އެހެން އެއްވެސް މީހަކަށް ނޭނގޭ، އަދި އެހެން މީހެއްގެ ގާތު ބުނުން ހުއްދަ ނުވާ، އެވާހަކައެއް ބުނެފިނަމަ ދުނިޔެވެސް ފަނާވެދާވަރުގެ ކަންކަން ދަންނަ ސިޔާސީ މީކަށް ވެގެން، މުޅި ޤައުމު ފަނާކޮށްލީ، ކުޑަކުޑަ ފައިސާކޮޅަކަށް ކަމަށެވެ.
ޢަލީ ރަމީޒު މިފަދައިން ވިދާޅުވެ ބަހުގެ ހަމަލާއެއް ޢިމްރާން އަށް ދެއްވާފައި މިވަނީ، އަފްރާޝީމްގެ މަރުގެ ހަގީގަތް ޔާމީނަށް އެނގެނޭ ކަމަށާއި ޑޮކިއުމެންޓްތައް އަތުގައި އެބަހުރި ކަމަށް 1 މެއި 2015ގައި އޭރުގެ އިދިކޮޅު އިއްތިހާދުން ބޭއްވި ބޮޑު އެއްވުމުގައި އިމްރާން ވިދާޅުވި ވިދާޅުވުމަށް ގުޅުވައިގެން ކަމަށް ބެލެވެއެވެ.
"[އަފްރާޝިމް އަވަހާރަކޮށްލުމުގައި އަމަލީ ގޮތުން ބައިވެރިވިކަން ސާބިތުވެ މަރަން ހުކުމްކޮށްފައިވާ] ހުމާމު ބުނީ ތެދެއް. ހުމާމު ބުނީ ޑރ. އަފްރަޝީމް ޝަހީދުކުރި މީހުން އެންމެ ރަނގަޅަށް އެނގޭނީ ރައީސް ޔާމީނާއި އަހުމަދު އަދީބާ ދެ މީހުންނަށޭ. އެ ދެ މީހުންނަށް އެނގޭނެ. އާދެ، މި ގައުމުގައި ތިބި އެންމެ ބޮޑު ދެ އަނިޔާވެރިން އެ ދެ މީހުންނަކީ. އަޅުގަނޑުމެން އެއްވެ މި ތިބީ މި އަނިޔާވެރިކަމާ ދެކޮޅަށް، މި އަނިޔާވެރިކަން ނިންމަން،"
"އަފްރާޝީމް[ގެ މަރާ] ގުޅިގެން ގާތްގަނޑަކަށް ހަތް މީހުން މަރާލާފައި މި ބިންމައްޗަށް ވެއްޓުނީ. ކޮބާތޯ ޔާމީނަށް އެނގޭ ހަގީގަތް... މި ހުރީ އަޅުގަނޑު އަތުގައި ހުރި ޑޮކުމަންޓްތައް މިއަދު ވަގުތު ނެތް [ތަފްސީލަށް ދާން]. ދިވެހި ލޮބުވެތި ރައްޔިތުން، މި ހުރީ އަޅުގަނޑު އަތުގައި ޑޮކުމެންޓްތައް." މެއި ޑޭގެ މުޒާހާރާގައި ޢިމްރާން ވިދާޅުވެފައިވެއެވެ.
ޢިމްރާން އެފަދައިން ވިދާޅުވި ނަމަވެސް އޭނާ ހޯމް މިނިސްޓަރ ކަމުގެ މަގާމުގައި ހުރެމެ، އެ ސިއްރުތައް އަދި އަދަށް ދާންދެންވެސް ރައްޔިތުންނާއި ހަމައަށް ފޯރުކޮށްދެއްވާފައެއް ނުވެއެވެ. އެކަމާއި ގުޅިގެން ގިނަ ބައެއްގެ ފާޑުކިޔުންތައް އޭނާއަށް މީގެ ކުރިން ވެސް ވަނީ އަމާޒުވެފައެވެ.
Advertisement
This content is created and paid for by advertisers and does not involve Voice Journalists
