ބައިނަލްއަގުވާމީ ޔޯގާ ދުވަސް ފާހަގަކުރުމަށް ގަލޮޅު ދަނޑުގައި ބޭއްވި ހަރަކާތް ހުއްޓުވުމުގެ ތެރެއިން ހިނގި ހަމަނުޖެހުމާ ގުޅިގެން ހައްޔަރުކުރި މީހުނއގެ ތެރެއިން ދައުވާ އުފުލާފައިވާ މީހެއް، ވަކީލަކު ހަމަޖައްސާނެ މާލީ ތަނަވަސްކަން ނެތި، އާއްމުންގެ އެހީއަށް އެދިފައިވަނިކޮށް އޭނާއަށް ހިލޭ ވަކާލާތު ކޮށްދޭނެ ކަމަށް ވަކީލު އަލީ ޝާހު ވިދާޅުވެއްޖެެއެވެ. 

21 ޖޫން 2022 ވަނަ ދުވަހު ބައިނަލްއަގުވާމީ ޔޯގާ ދުވަސް ފާހަގަކުރުމަށް ގަލޮޅު ދަނޑުގައި ކުރިއަށް ގެންދިޔަ ހަރަކާތަށް ހުރަސް އަޅައި، ޓެރަރިޒަމްގެ އަމަލުތައް ހިންގި ކަމުގެ ތުހުމަތު ކުރެވުނު މައްސަލާގައި ދައުވާ ކުރުމަށް މިމަހު ދެވަނަ ދުވަހު ދައުލަތުން ކްރިމިނަލް ކޯޓަށް ވަނީ ހުށަހަޅާފައެވެ. 

އެގޮތުން ދައުވާ އުފުލި މީހުންގެ ތެރެއިން .ތ. ތިމަރަފުށި، ނަރުގިސްވިލާ، ރިފާޢު ވަނީ އޭނާގެ މައްޗަށް ދައުލަތުން އުފުލާފައިވާ ދައުވާ އާއި ގުޅިގެން، އޭނާގެ ފަރާތުން ވަކީލަކު ހަމަޖެއްސުމަށް ކްރިމިނަލް ކޯޓުން 10 ދުވަސް ދީފައިވާ ކަމަށް ބުނެފައެވެ. އެހެންނަމަވެސް، އޭނާގެ މާކީ ތަނަވަސްކަން ހުރި ގޮތުން އެފަދަ ބޮޑު ޚަރަދެއް ކުރެވެން ނެތް ކަން ފާހަގަކޮށް އޭނާ ވަނީ އެކަމުގައި އާއްމުންގެ އެހީތެރިކަމަށް އެދިފައެވެ. 

Advertisement

ރިފާއު އާއްމުންގެ އެހީއަށް އެދި ކުރި ޓުވީޓަށް ވަކީލު އަލީ ޝާހު ކުރެއްވި ކޮމެންޓެއްގައި ވަނީ، އެއްވެސް އަގަކާއި ނުލައި އެ މައްސަލާގައި އޭނާއަށް އެހީތެރިވާން ތައްޔާރަށް ހުންނެވިކަމަށް ވިދާޅުވެފައެވެ. 

ޔޯގާ ހަމަނުޖެހުމާއި ގުޅިގެން ރިފާޢުގެ މައްޗަށް ޖުމުލަ ހަތަރު ދައުވާއެއް ދައުލަތުން ވަނީ އުފުލާފައެވެ. އެގޮތުން އުފުލާފައިވާ ދައުވާ ތަކަކީ؛

1) ޓެރަރިޒަމްގެ ޢަމަލެއްކުރުމުގެ ދަޢުވާ: އަދަބަކީ 20 އަހަރާއި 25 އަހަރާ ދެމެދުގެ މުއްދަތަކަށް ޖަލަށްލުން.

2) ޓެރަރިސްޓް ޖަމާޢަތަކަށް ތާއީދުކުރާ މީހެއްކަން ދޭހަވާފަދަ ލިޔުމެއް ގެންގުޅުމުގެ ދަޢުވާ: އަދަބަކީ 1 އަހަރާއި 3 އަހަރާ ދެމެދުގެ މުއްދަތަ ކަށް ޖަލަށްލުން.

3) ހަތިޔާރެއް ބޭނުންކޮށްގެން މާރާމާރީ ހިންގަން އުޅުމުގެ ދަޢުވާ: އަދަބަކީ 3 އަހަރާއި 5 އަހަރާ ދެމެދުގެ މުއްދަތަ ކަށް ޖަލަށްލުން.

4) ޤާނޫނު ތަންފީޒުކުރާ މުވައްޒަފެއްގެ މަސައްކަތަށް ގަސްދުގައި ހުރަސްއެޅުމުގެ ދަޢުވާ: އަސާސީ އަދަބަކީ 4 މަހައި 24 ދުވަހަށް ޖަލަށްލުން.

މިހުރިހާ ދައުވާއެއް އޭނާގެ މައްޗަށް ސާބިތުވެއްޖެނަމަ ޖުމުލަ 35 އަހަރުގެ ޖަލުހުކުމެއް އަންނާނެއެވެ. 

ގާނޫނީ ވަކީލު ޢަލީ ޝާހު އަކީ ޔޯގާ ހަމަނުޖެހުމުގެ މައްސަލާގައި ހައްޔަރު ކުރި، ޕީޕީއެމްގެ ހަރަކާތު ކޮމިޓީގެ ރައީސް މުހައްމަދު އިސްމާއިލް ގެވެސް ވަކީލުންގެ ޓީމުގައި ހިމެނޭ ކުޅަދާނަ ވަކީލެކެވެ.