ކޮވިޑް-19 އާއި ގުޅިގެން ފްރޮންޓް ލައިންގައި މަސައްކަތް ކުރި ފަރާތްތަކަށް  2020 ވަނަ އަހަރު ދޫކުރި އެލަވަންސް ގެ ތެރެއިން އެންމެ ބޮޑު އިންސައްތަ އެއް ހިއްސާކުރަނީ ސަލާމަތީ ބާރުތަކާއި ޕޮލިސް ކޮންސްޓިބިއުލަރީ އަށް ކަން ހާމަވެއްޖެއެވެ.

މިކަން ހާމަވެފައިވަނީ، ދައުލަތުގެ އެކިއެކި މުއައްސަސާތަކުން ކޮވިޑާއި ގުޅިގެން ކޮށްފައިވާ ޚަރަދުތައް ކޮށްފައިވަނީ ދައުލަތުގެ މާލިއްޔަތު ގާނޫނާއި ދައުލަތުގެ މާލިއްޔަތު ގަވާއިދާއި، ކޮވިޑް-19 އާއި ގުޅިގެން މިނިސްޓްރީ އޮފް ފިނޭންސް އިން ނެރެފައިވާ ސާކިއުލާތަކާއި، އެކަމާއި ގުޅުންހުރި އެހެނިހެން ގަވައިދުތަކާއި އެއްގޮތަށްތޯ ބެލުމަށް އޮޑިޓް ގާނޫނުގެ ދަށުން އޮޑިޓަރ ޖެނެރަލްގެ އޮފީހުން ނެރުނު "ކޮވިޑް 19 އާއި ގުޅިގެން ފްރޮންޓް ލައިންގައި މަސައްކަތް ކުރި ފަރާތްތަކަށް ދިން އެލަވަންސްގެ ކޮމްޕްލަޔަންސް އޮޑިޓް ރިޕޯޓް" އިން ނެވެ.

އެގޮތުން އޮޑިޓަރ ޖެނެރަލްގެ އެ ރިޕޯޓުގައި ހިމަނާފައިވަނީ، ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ، މޯލްޑިވްސް ޕޮލިސް ސަރވިސް، އަދި މޯލްޑިވްސް ނޭޝަނަލް ޑިފެންސް ފޯސްގެ އޮޑިޓްތަކުވައި ފްރޮންޓްލައިން އެލަވަންސް އާއި ގުޅޭގޮތުން ފާހަގަކުރެވުނު ކަންކަން ކަމަށްވާއިރު، ފްރޮންޓްައިން އެލަވަންސް ގެ ގޮތުގައި ދޫކުރެވުނު ފައިސާގެ އިންސައްތަ އާއި، މުއައްސަސާތަކުން ޚަރަދު ކުރި ޖުމުލަ ފައިސާގެ އަދަދު އެ ރިޕޯޓުގައި ވެއެވެ.

އޮޑިޓަރ ޖެނެރަލްގެ އޮފީހުގެ އެ ރިޕޯޓުން ދައްކާ ގޮތުން، 01 ޖަނަވަރީ 2020 ވަނަ ދުވަހުން ފެށިގެން 31  ޑިސެމްބަރު 2020 އަށް ފްރޮންޓް ލައިންގައި މަސައްކަތް ކުރި ފަރާތްތަކަށް މޯލްޑިވްސް ޕޮލިސް ސަރވިސް އިން ޖުމުލަ 27,419,004 (ހަތާވީސް މިލިއަން ހަތަރު ސަތޭކަ ނަވާރަ ހާސް، ހަތަރު ރުފިޔާ) ޚަރަދުކޮށްފައިވާއިރު، އެ މުއްދަތުގެ ތެރޭގައި މޯލްޑިވްސް ނޭޝަނަލް ޑިފެންސް ފޯސް އިން ޖުމުލަ 24,000,000 (ސައުވީސް މިލިއަން ރުފިޔާ) ފްރޮންޓް ލައިން އެލަވަންސް ގެ ގޮތުގައި ޚަރަދުކޮށްފައިވެއެވެ. ވުމާއެކު މިދެ މުައައްސަސާއަށް އެކަނިވެސް 51 މިލިއަނަށްވުރެ ގިނަ ރުފިޔާ ވަނީ 2020 ވަނަ އަހަރު ޚަރަދު ކުރެވިފައެވެ. އަދި މީގެ އިތުރުން، ހަމަ މި އަހަރު ތެރޭގައި ނެޝަނަލް ޑިޒާސްޓާ މެނޭޖްމަންޓް އޮތޯރިޓީން ވަނީ 35,966,200 (ތިރީސް ފަސް މިލިއަން ނުވަސަތޭކަ ފަސްދޮޅަސް ހަހާސް ދުއިސައްތަ ރުފިޔާ) ފްރޮންޓްލައިން އެލަވަންސް އަށް ޚަރަދުކޮށްފައެވެ.

• ސަލާމަތީ ބާރުތަކަށް -- %57

• ސިއްޙީ ދާއިރާ އަށް -- %30

• ތަޢުލީމީ ދާއިރާއަށް -- %1

• އެހެނިހެން -- %12

• ސަލާމަތީ ބާރުތަކާއި ޕޮލިސް ކޮންސްޓިބިއުލަރީ -- %53

• ސަލާމަތީ ބާރުތަކުގެ ތެރޭގައި ހިމެނޭ އެހެނިހެން މުވައްޒަފުން --%3

• މެޑިކަލް މުވައްޒަފުން -- %15

• ޖެނަރަލް ސަޕޯޓް މުވައްޒަފުން -- %15

• މެޑިކަލް ސަޕޯޓް މުވައްޒަފުން -- %7

• ދަރުމަވެރިން %5

• އެހެނިހެން މުވައްޒަފުން -- %2

ފޮޓޯ-- އޮޑިޓާ ޖެނެރަލްގެ އޮފީސް 

ކޮވިޑް-19 އާއި ގުޅިގެން ފްރަންޓް ލައިންގައި މަސައްކަތް ކުރާ ފަރާތްތަކަށް ޚާއްސަ އެލަވަންސް އެއް ދިނުމަށް ނިންމައި، އެ އެލަވަންސް ދޭންވީގޮތުގެ އުސޫލެއް ކަނޑައަޅައި އެ އުސޫލާއި އެއްގޮތަށް އެލަވަންސް ދިނުމަށް ރައީސުލްޖުމްހޫރިއްޔާގެ އޮފީހުން 5 މެއި 2020 ވަނަ ދުވަހު ފިނޭންސް މިނިސްޓްރީއަށް ވަނީ އަންގާފައެވެ. އަދި މިކަމުގައި އެންމެ އިސްކޮށް މަސައްކަތް ވިލަރެސް ކުރާނެ ފަރާތަކީ އެންޑީއެމްއޭ ކަމަށާއި، އެ އޮތޯރިޓީން މި އެލަވަންސް އާއި ގުޅޭ މަސައްކަތް ތަކުގެ ތަފްސީލް އެނގޭނެހެން ދަފްތަރެއް އެކުލަވައި ލުމަށާއި، އެ އޮތޯރިޓީން މިކަމާއި ގުޅޭގޮތުން އެކި އިދާރާތަކުން މަސައްކަތް ކޮށްފައިވާ ފަރާތްތަކުގެ މައުލޫމާތު އެންޑޯޒް ކުރުމަށްފަހު ފިނޭންސް މިނިސްޓްރީއަށް ފޮނުވުމަށްވެސް އެންޑީއެމްއޭއަށް ވަނީ އަންގާފައެވެ.