2023 ވަނަ އަހަރު ދިވެހިރާއްޖެއަށް އަންނާނެކަމަށް އަންދާޒާކުރެވޭ ފަތުރުވެރިންގެ އަދަދާއި ގުޅިގެން ފިނޭންސް މިނިސްޓަރު އިބްރާހިމް އަމީރު ހާމަކުރެއްވި އަންދާޒީ ހިސާބުތަކާއި ޓުއަރިޒަމް މިނިސްޓަރު ޑރ މައުސޫމު ހާމަކުރެއްވި ހިސާބުތަކާއި ދިމާނުވާކަން ހާމަވެއްޖެއެވެ. 

ޓުއަރިޒަމް މިނިސްޓްރީއިން ހާމަކޮށްފައިވާ ތަފާސް ހިސާބުގައި ވާ ގޮތުން ނަމަ އަންނަ އަހަރު ދިވެހިރާއްޖެއަށް 2 މިލިއަން ޓުއަރިސްޓުން އަންނާނެކަމަށް ވަނީ އަންދާޒާކޮށްފައެވެ. 

އެހެން ނަމަވެސް އެ އަދަދަށް ދިވެހިރާއްޖެއަށް ފަތުރުވެރިން ނުގެނެވޭނެކަމަށް އެންމެ ފަހުން ފިނޭންސް މިނިސްޓަރު އިބްރާހިމް އަމީރު ދެއްވި ޕްރެސްކޮންފަރެންސްގައި ހާމަކުރެއްވި އަންދާޒީ ހިސާބުތަކުން ވަނީ ފެނިގެން ގޮށްފައެވެ. 

އެ ޕްރެސް ކޮންފަރެންސްގައި ރާއްޖޭގެ އިގްތިސާދާއި ފަތުރުވެރިކަމުގެ ސިނާއަތާއި ގުޅޭގޮތުން މައުލޫމާތު ދެއްވަމުން ފިނޭންސް މިނިސްޓަރު އަމީރު ވިދާޅުވީ މިހާރު ދިވެހިރާއްޖޭގެ އިގްތިސާދު ހުރީ މޮޑެރޭޓް ލެވެލްއެއްގައިކަމަށެވެ. އަދި މި ގޮތަށް އިގްތިސާދު އޮތްކަމަށް ވާނަމަ ދިވެހިރާއްޖެއަށް އަންނާނެކަމަށް ލަފާކުރެވެނީ 1.8 މިލިއަން ފަތުރުވެރިންކަމަށް މިނިސްޓަރު ވިދާޅުވިއެވެ. 

އިގްތިސާދު އެންމެ ރަނގަޅު ހާލަތުގައިވެސް އަންނާނީ 1.9 މިލިއަން ޓުއަރިސްޓުންކަމަށް އަމީރު ވިދާޅުވިއެވެ. އަދި މިހާރަށްވުރެ އިގްތިސާދު ގޯސްވެއްޖެ ހާލަތެއްގައި ނަމަ ރާއްޖެއަށް އަންނާނީ 1.7 މިލިއަން ޓުއަރިސްޓުންކަމަށް ފިނޭންސް މިނިސްޓަރު ވަނީ ވިދާޅުވެފައެވެ. 

ފިނޭންސް މިނިސްޓަރު އިތުރަށް ވިދާޅުވީ އަންނަ އަހަރު ފަތުރުވެރިކަމުގެ ސިނާއަތު ކުރިއަރާނެކަމަށް ބެލެވެނީ 9.3 އިންސައްތަކަމަށެވެ. 

ފިނޭންސް މިނިސްޓްރީއިން ހާމަކޮށްފައިވާ އަންދާޒީ ހިސާބުތަކަށް ބަލާއިރު، ޓުއަރިޒަމް މިނިސްޓްރީއިން އަންނަ އަހަރު 2 މިލިއަން ފަތުރުވެރިން ރާއްޖެ ޒިޔާރަތްކުރާނެކަމަށް ބުނެފައި އޮތް ނަމަވެސް އެ އަދަދަށް ފަތުރުވެރިން އަންނާނެކަމަށް ލަފައެއް ނުކުރެވެއެވެ. 

ފިނޭންސް މިނިސްޓްރީއިން ހާމަކުރި ރިޕޯޓުގައި ވާގޮތުން ރާއްޖޭގެ ފަތުރުވެރިކަމަށް އަންނަ އަހަރުވެސް ކުރިމަތިވާނެ އެންމެ ބޮޑު ގޮންޖެހުމަކީ ރަޝީޔާ-ޔޫކުރެއިން ހަނގުރާމައެވެ. އެހެންކަމުން، ފަތުރުވެރިކަން ރަނގަޅުކުރުމަށް އާ މާކެޓުތަށް ހޯދަން ޖެހޭކަންވެސް އެ ރިޕޯޓުގައި ވަނީ ފާހަގަކޮށްފައެވެ.