ސަރުކާރުގެ ހަރަދުތައް ހަމަޖެއްސުމަށް ޓީޖީއެސްޓީ އާއި ޖީއެސްޓީ ބޮޑުކުރުމަށް ސަރުކާރުން ހުށަހަޅާފައިވާ އިސްލާހު ފާސްކުރަން ވޯޓު ނުދެއްވައިގެން ފިޔަވަޅު އެޅުއްވި ނަމަވެސް އެ ބިލަށް ތާއީދު ނުކުރައްވާނެ ކަމަށް ރައްޔިތުން މަޖިލިހުގެ މައްޗަންގޯޅި އުތުރު ދާއިރާ މެންބަރު މުހައްމަދު ރަޝީދު (ބޯދިގު) ވިދާޅުވެއްޖެއެވެ.
މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނަށް ސަރުކާރުން ގެންނަން ބޭނުންވާ އިސްލާހްތައް ގެނައުމުގެ ބިލް މަޖިލީހަށް ހުށަހެޅީ އޮގަސްޓް 28 ވަނަ ދުވަހުއެވެ. އަދި އެބިލް ފާސްކުރުމަށް ސަރުކާރު ހިންގާ، އެމްޑީޕީގެ ޕާލިމަންޓްރީ ގްރޫޕުން ވަނީ ތްރީލައިން ވިޕެއް ނެރެފައެވެ. އަދި އެވިޕާއި ހިލާފަށް ވޯޓު ދެއްވާ މެންބަރުންނާއި މެދު ގަވާއިދުގައިވާގޮތުގެ މަތިން ފިޔަވަޅު އަޅާނެކަމަށް އެމްޑީޕީގެ ޕާލަމެންޓްރީ ގުރޫޕްގެ ލީޑަރ މުހައްމަދު އަސްލަމް ވަނީ ވިދާޅުވެފައެވެ.
އެކަމާއި ގުޅިގެން ބޯދިގު ކުރެއްވި ޓްވީޓެއްގައި، އެމްޑީޕީގެ މެންބަރުންގެ ކިބައިން މާފަށް އެދި ވިދާޅުވީ އޭނާ ޓެކްސް ތްރީލައިން ވިޕާ ހިލާފުވާނެކަމަށެވެ.
އަދި އެކަމާއި ގުޅިގެން ފިޔަވަޅު އަޅަންވީކަމަށާއި ނަމަވެސް މިފަދަ ނާޒުކު ދަނޑިވަޅެއްގައި ޓެކްސް އިތުރުކުރުމަށް އޭނާ ތާއީދު ނުކުރައްވާކަންވެސް ބޯދިގުގެ ޓްވީޓުގައި ހާމަކުރައްވާފައިވެއެވެ.
ޓެކްސް ބޮޑުކުރުމާއި ގުޅިގެން ތްރީލައިން ވިޕް ނެރުމާއި ގުޅިގެން މެދު ހެންވޭރު ދާއިރާގެ މަޖިލީސް މެންބަރު އަލީ އާޒިމްވެސް ވަނީ ކަންބޮޑުވުން ފާޅުކުރައްވައިފައެވެ. އެގޮތުން އާޒިމް ވިދާޅުވީ އެކަމާ ގުޅިގެން ކޮމެޓީން ޓޫރިޒަމް ސެކްޓަރާއި، ވިޔަފާރިވެރިންނާއި އަދި ފިނޭންސް މިނިސްޓަރާއެކުގައި ވެސް މަޝްވަރާ ކުރުމުގެ ކުރިން ތްރީލައިން ވިޕެއް ނެރުމަކީ ކަންބޮޑުވާ ކަމެއް ކަމަށެވެ.
ސަރުކާރުން ނިންމާފައި ވަނީ އަންނަ އަހަރުގެ ޖެނުއަރީން ފެށިގެން ޓީޖީއެސްޓީ އާއި ޖީއެސްޓީ ބޮޑުކުރާށެެވެ. އެގޮތުން ޓެކްސް ބޮޑުކުރުމަށް ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ އިސްލާހުގައި ވަނީ:
• ޖީއެސްޓީ- %6 އިން %8 އަށް ބޮޑުކުރުމަށް
• ޓީޖީއެސްޓީ- %12 އިން %16 އަށް ބޮޑުކުރުމަށް
ޓެކްސް ބޮޑު ކުރަން ސަރުކާރުން ނިންމިއިރު ރާއްޖޭގެ ޖީއެސްޓީ އާއި ޓީޖީއެސްޓީ ބޮޑުކުރަން އެންމެ ރަނގަޅީ 2024 ވަނަ އަހަރު ކަމަށާއި އެ އަހަރު ވެސް ޓެކްސް ބޮޑުކުރަން ވާނީ މިހާރު ކުރިމަތިވެފައިވާ އިންފްލޭޝަންގެ ހާލަތު ހަމައަކަށް އެޅުމުން ކަމަށް އިންޓަނޭޝަނަލް މަނިޓަރީ ފަންޑު (އައިއެމްއެފް) އިން ބުނެފައި ވެއެވެ.
Advertisement
This content is created and paid for by advertisers and does not involve Voice Journalists
