އަހަރަށްވުރެ ގިނަ ދުވަސް ވަންދެން ހުސްކޮށް އޮތް ނެޝަނަލް ޑްރަގް އޭޖެންސީ (އެން.ޑީ.އޭ) ގެ ސީއީއޯގެ މަގާމަށް ކުރީގެ ސްޓޭޓް މިނިސްޓު އިމާދު ސޯލިހު ހަމަޖައްސަވައިފިއެވެ. 

އެންޑީއޭގެ ސީއީއޯގެ މަގާމަށް އިމާދު ސޯލިހު ހަމަޖައްސަވާފައި ވާކަން އެ އިދާރާއިން އަންގާފައިވަނީ މިއަދު ބޭއްވި ނޫސްވެރިންގެ ބައްދަލުވުމެއްގައި މައުލޫމާތުދެއްވަމުންނެވެ. 

އޭނާ އެމަގާމަށް އައްޔަންކޮށްފައިވަނީ އެންޑީއޭގެ ކުރީގެ ސީއީއޯ މަގާމުން އިސްތިއުފާދެއްވިތާ އަހަރަށްވުރެ ގިނަ ދުވަސް ފަހުންނެވެ. 

އެކަމާއި ގުޅޭގޮތުން މައުލޫމާތު ދެއްވަމުން އެންޑީއީގެ ބޯޑުން ބުނީ އިމާދު އެ މަގާމަށް އައްޔަންކޮށްފައިވަނީ އެ މަގާމަށް ކުރިމަތިލި މީހުންގެ އިންޓަވިއުކުރުމަށްފަހު މިހާރު އެ އިދާރާ އޮތް ހާލަތަށް ބަލައި، އެ މަގާމު އަދާކުރެވޭނެ އެންމެ ގާބިލް ފަރާތަކީ އިމާދު ސޯލިހު ކަމުގައި ޔަގީންކުރެވޭތީކަމަށެވެ. 

ސީއީއޯގެ މަގާމަށް މީހަކު އައްޔަންކުރުމަށް ދިގު ޕްރޮސެސްއެއް ކަނޑައްތުކޮށްފައިވާކަން ނޫސްވެރިންގެ ބައްދަލުވުމުގައި މައުލޫމާތުދެއްވަމުން އެންޑީއޭގެ ބޯޑު މެމްބަރުން ވަނީ ވިދާޅުވެފައެވެ. 

އިމާދު ސޯލިހަކީ ކުރީގެ ބަންޑާރަ ނައިބު ޑރ. ހަސަން ސައީދު އުފެއްދެވި ގައުމީ ޕާޓީގައި އިސްކޮށް އުޅުއްވި ބޭފުޅެކެވެ. ގާނޫނުއަސާސީ އެކުލަވާލި ރައްޔިތުންގެ ހާއްސަ މަޖިލީހުގެ މެމްބަރުކަން ކުރެއްވި އިމާދަކީ އެޑިއުކޭޝަން މިނިސްޓްރީގެ ސްޓޭޓް މިނިސްޓަރުކަން ކުރެއްވި ބޭފުޅެކެވެ.

އެންޑީއޭގެ ސީއީއޯކަމުގެ މަގާމާއި ހަވާލުވެވަޑައިގެން، އެ އިދާރާއާއި މަތިވެފައިވާ ޒިންމާތައް އަދާކުރައްވާ ޑްރަގް ގެ ވަބާއިން ދިވެހި މުޖުތަމައު ސަލާމަތްކުރުމަށް އެންޑީއޭގެ މެންޑޭޓުގައި ހިމެނޭ ކަންކަން ތަންފީޒުކުރުމަށް ކެނޑިނޭޅި މަސައްކަތް ކުރައްވާނެކަމުގެ ޔަގީންކަން އިމާދު ސޯލިހު ވަނީ ދެއްވާފައެވެ.