އިސްލާމްދީނަށް ހޭލުންތެރިކަން އިތުރުކުރުމާއި، ދީނަށް ޚިދުމަތްކުރުމާއި، ދީނީ ޢިލްމު އުނގަންނައިދިނުމުގެ ދާއިރާއިން؛ ދީނީ ރޮނގުން ޚިދުމަތްކުރުމާއި، ހޭލުންތެރިކަން އިތުރުކުރުމުގެ ރޮނގުން ހިތްވަރު ދިނުމުގެ ގައުމީ އިނާމު, އައްޝައިޚް ޑރ.ޢަލީ ޒާހިރު އަށް ދެއްވައިފިއެވެ. 

ރޭ ގައުމީ އިނާމު ދެއްވުމަށް ބޭއްވި ރަސްމީ ޖަލްސާގައި ޑރ. ޢަލީ ޒާހިރަށް އިނާމު ހަވާލުކޮށްދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހެވެ.

ޑރ. ޢަލީ ޒާހިރާ ގުޅޭ ގޮތުން ރައީސުލްޖުމްހޫރިއްޔާގެ އޮފީހުން ތައްޔާރު ކުރެއްވި ރިޕޯޓްގައި ވަނީ، ދީނީ ރޮގުން ޢާއްމުން ހޭލުން ތެރިކުރުވުމަށް ޑރ. ޢަލީ ޒާހިރު ކުރައްވަމުން ގެންދަވާ މަސައްކަތްތަށް ފާހަގަކުރައްވާފައެވެ. އެގޮތުން، ދީނީ ދަރުސްތަކާއި، މިނިސްޓްރީ އޮފް އިސްލާމިކު އެފެއާޒް އާއި އަމިއްލަ ފަރާތްތަކާއި ގުޅިގެން ރަށްރަށަށް ވަޑައިގެންވެސް ދީނީ ވޯކްޝޮޕް ތަކާއި ފޯރަމް ތައް ހިންގަވަމުން ގެންދަވާކަން ރައީސް އޮފީހުން ވަނީ ފާހަގަކުރައްވާފައެވެ. 

މީގެ އިތުރުން، ރައީސް އޮފީހުން ބުނީ، ޑރ. ޢަލީ ޒާހިރަކީ ޢާއިލީ މައްސަލަތާއި އެހެނިހެން މައްސަލަތަކުގައި ވެސް ކައުސިލިން ގެންދަވަމުން ގެންދަވާ ބޭފުޅެއް ކަމަށާ، އަދި ހަމައެހެންމެ މީސްމީޑިއާ މެދުވެރިކޮށްވެސް މައުލޫމާތުތައް ފޯރުކޮށްދިނުމުގެ މަސައްކަތް ކުރައްވަމުންދާ ބޭފުޅެއް ކަމަށެވެ.

ޑރ. ޢަކީ ޒާހިރަށް މި އިނާމް ލިބުމާއި ގުޅިގެން އޭނާ ވަނީ، އިސްލާމިކް މިނިސްޓްރީން ގައުމީ އިނާމަށް އޭނާގެ ނަން ހުށަހެޅުއްވި ކަމަށްޓަކައި އިސްލާމިކް މިނިސްޓްރީ އަށާއި އެ މިނިސްޓްރީގެ ޓީމަށް ޝުކުރު އަދާކުރައްވާފައެވެ.