މިއަދު މިފެންނަނީ ބައްޔެއް ވެލާއިރަށް ނަމާދު ނުކޮށް ދޫކޮށްލާތަން: ޚުތުބާ

އިސްލާމީ މަރުކަޒުގައި ހުކުރު ނަމާދު ކުރުމަށް ޖަމާއަތް ހަދައިގެން--ފޮޓޯ:އިސްލާމިކް މިނިސްޓްރީ

ކިތަންމެ ބަލި ބޮޑުވިޔަސް، ބަލިމީހާއަށް ވެސް ނަމާދު އެޅުމެއް ނެތް ކަމަށާ އެހެންނަމަވެސް މިއަދު އަހަރެމެންނަށް ފެންނަނީ، މިއާ ޚިލާފު މަންޒަރެއް ކަމުގައި މިއަދުގެ ހުކުރުޚުތުބާގައި ބުނެފިއެވެ.

"ނަމާދަކީ ދީނުގެ ތަނބެވެ" މައުޟޫއަށް މިއަދު އިއްވު ޚުތުބާގައި ބުނީ ނަމާދަކީ, ހިތަށް ހަމަޖެހުން ލިބޭ، ކަންބޮޑުވުމާއި ހާސްވުންފަދަކަންކަމުން ދުރުކޮށްދޭ އަޅުކަމެއް ކަމަށެވެ. 

މިއާއެކު ޚުތުބާގައި ބުނީ، ކިތަންމެ ބަލި ބޮޑުވިޔަސް، ބަލިމީހާއަށް ވެސް ނަމާދު އެޅުމެއް ނެތް ކަމަށާ އެހެންނަމަވެސް މިއަދު އަހަރެމެންނަށް ފެންނަނީ، މިއާ ޚިލާފު މަންޒަރެއް ކަމަށެވެ.

"މީހަކު ހަމަ ބައްޔެއް ވެލާއިރަށް ނަމާދު ނުކޮށް ދޫކޮށްލާތަނެވެ. އެފަދަމީހުންނަށް ނަމާދު ކުރުން ވެފައިވަނީ އުފުލަން ޖެހިފައިވާ ބޮޑު ބުރައަކަށެވެ. ބައެއް މީހުން ނަމާދު ނުކޮށް ދޫކޮށްލަނީ ބަލި ފަސޭހަވުމުން އެ ނަމާދުތައް ޤަޟާ ކުރާނަމޭ ބުނަމުންނެވެ. ހަމައެއާއެކު، އެ ބަލީގައި މަރުވެއްޖެނަމަ، އެއީ އޭނާއަށް ލިބުނު ޢުޛުރެއް ކަމަށް އެދެކެގެންނެވެ. މިއީ ވަރަށް ބޮޑު ވަރަށް ބޮޑު އޮޅުމެކެވެ. މިގޮތަށް ޤަޟާ ކުރުމަށް ނިޔަތްގަނެގެން ވެސް، ނަމާދު އެޅުމަކީ ހުއްދަވެގެންވާނެ ކަމެއް ނޫނެވެ." ޚުތުބާގައި ބުނެފައިވެއެވެ. 

ޝައިޠާނާ މުސްލިމުން ނަމާދާ ދުރުކުރުމަށްޓަކައި ވަރަށް ގިނަ ޙީލަތްތަކާއި މަކަރުތައް ހަދައި، ދުނިޔެ ރަންކޮށް ދައްކާކަން ފާހަގަކޮށް ޚުތުބާގައި އިތުރަށް ބުނީ، ޝައިޠާނާއަށް ވާނަމަ މުސްލިމުން ނަމާދާ މުޅިން ދުރުކުރެވޭތޯ ބަލާނެ ކަމަށެވެ. އަދި އާދަކޮށް ނަމާދު ކުރާ މީހަކުނަމަ، އޭނާ ބައެއް ނަމާދުތަކާ ދުރުހެލި ކުރެވޭތޯ ޝައިތާނާ ބަލާނެ ކަމަށާ، މުސްލިމުންގެ ޙާލަތަށް ބަލާއިރު، ގިނަ ބަޔެއްގެ ނަމާދުގެ ތިލަފަތް ވަނީ ލުއިވެފައި ކަމަށެވެ.

"އެމީހުންގެ ގާތުގައި ނަމާދަށް ވުރެ އިސްކަން ދެވެނީ އެހެނިހެން ކަންކަމަށެވެ. ނަމާދުގެ ވަގުތުތަކާ ދިމާކޮށް، ދުންޔަވީ ޢަމަލުތައް ރާވައި، ހިންގާތަން ފެނެއެވެ. ބަންގި ގޮވުމުން ފިހާރަތަކާއި، ސައިހޮޓާތައް ލައްޕަން ޤަވާޢިދުތައް އަމުރު ކުރާތީ އެތަންތަން ލެއްޕިއަސް އެ ތަންތަނުގެ ތެރޭގައި، ގިނަބަޔަކު ނަމާދަށް ނުގޮސް ތިބޭ ތަން ފެނެއެވެ." ޚުތުބާގައި ބުނެފައިވެއެވެ. 

Advertisement

ކޮމެންޓް