އަންހެނެއްގެ ގައިގައި ސައިކަލަކުން ޖެހި އެ މީހާއަށް އަނިޔާވި މައްސަލައިގައި، ސައިކަލު ދުއްވަން އިން މީހާ 74،400 ރުފިޔާއިން ޖޫރިމަނާކޮށްފިއެވެ.

މި މައްސަލާގައި ދައުލަތުން ދައުވާ އުފުލީ، ގދ. ތިނަދޫ، ހިޔަލީގުލްޝަން، ނަސްރުﷲ ސަލީމްގެ މައްޗަށެވެ. 

ދައުލަތުން ނަސްރުﷲ ގެ މައްޗަށް ކުރި ދައުވާގައި ބުނީ، މިއީ 31 މާޗު 2017 ވަނަ ދުވަހު 18:30 އެހާކަންހާއިރު، އެއްގަމު އުޅަނދު ދުއްވުމުގެ ލައިސަންސް ނެތި، ޖުޕިޓާ ބްރޭންޑްގެ ސައިކަލެއްގައި ގދ. ތިނަދޫ މިސްކިތްމަގުން އިރުން ހުޅަނގަށް، އެރަށު، ހިޔަލީގުލްޝަން، ނަސްރުﷲ ސަލީމް ދުއްވާފައި ދަނިކޮށް، އެރަށު، ސްވީޓްޑްރީމްގެ، މާހާ އަލީ ހާޝިމްގެ ގައިގައި ޖެހި އޭނާއަށް ބޮޑެތި ޖިސްމާނީ އަނިޔާތަކެއް ލިބިފައިވާތީ ދައުލަތުން ކުރި އަނިޔާއެއް ދިނުމުގެ ދައުވާއެއް ކަމަށެވެ. 

މި ދައުވާގެ އިބްތިދާއީ މަރުހަލާގައި ނަސްރުﷲ ވަނީ ކުށަށް އިއުތިރާފުވެފައެވެ. އެގޮތުން ނަސްރުﷲ ބުނެފައިވަނީ، މާހާގެ ގައިގައި ސައިކަލުން ޖެހުނީ ކާރެއް އޯވަޓޭކް ކުރަން އުޅުމުގެ ތެރޭގައި ކަމަށާއި އެކަމަކީ ގަސްދުގައި ކުރި ކަމެއް ނޫން ކަމަށާ އެހެން ނަމަވެސް އޭނާ އަށް ކުރެވުނީ ކުށެއް ކަން އިއުތިރާފްވެ ނަސްރުﷲ ވަނީ އޭނާ ކުށަށް އިއުތިރާފް ވީ އެއްވެސް މީހެއްގެ މަޖުބޫރުކުރުމެއް ނެތި ކަމުގައިވެސް ބުނެފައެވެ. 

ނަސްރުﷲ ގެ އިއުތީރާފާއި އެކު، މި މައްސަލަ ކުރިއަށް ގެންދިޔައީ އަވަސް ނިޔާގެ ޝަރީއަތެއްގެ ގޮތުގައެވެ. އަވަސް ނިޔާގެ އަޑުއެހުމުގައިވެސް އޭނާ ވަނީ އިއުތިރާފު ދަމަހައްޓައިފައެވެ.

މި މައްސަލައިގައި އަދަބާ ގުޅޭ ގޮތުން ވާހަކަ ދެއްކުމުގެ އަޑުއެހުމުގައި ދައުލަތުން ވަނީ، އެ ކުށަށް ކަނޑައެޅިފައިވާ އަދަބުގެ އަސާސީ މިންގަނޑަކީ 1 އަހަރާއި، 7 މަހާއި 6 ދުވަހަށް ކަމަށާ، އެހެންނަމަވެސް ނަސްރުﷲ ކުށަށް އިއުތިރާފް ވެފައިވާތީ އަދަބު ލުއި ވާނެ ކަމަށް ބުނެފައެވެ. 

އަދަބާ ގުޅޭ ގޮތުން ވާހަކަ ދެއްކުމުގެ އަޑުއެހުމުގައި ނަސްރުﷲ ވަނީ އޭނާއަކީ މީޑިއާ ނެޓުގައި ވަޒިފާ އަދާކުރާ މީހެއް ކަމަށާއި، ވަޒީފާ ލިބުނީ ވަރަށް އުނދަގުލުން ކަމަށާ، ޖަލަށް ލައިފިނަމަ ވަޒީފާ ގެއްލޭނެތީ ޖަލު އަދަބު، ޖޫރިމަނާގެ އަދަބަކަށް ބަދަލުކޮށްދޭން އެދިފައެވެ. އަދި ޖޫރިމަނާ ފައިސާ ދެއްކޭނެ ކަމުގެ ޔަގީންކަން އޭނާ ދީފައިވެއެވެ.

އެ މައްސަލަ ބެއްލެވި ގާޒީ އަލީ ނަދީމް ހުކުމް ކުރެއްވީ، ނަސްރުﷲ އެއް އަހަރާ 12 ދުވަހަށް ޖަލަށް ލުމަށެވެ. ނަމަވެސް ނަސްރުﷲއަކީ ކުށުގެ ވެށީގައި އުޅޭ މީހަކަށް ނުވެފައި އޭނާ ކުށަށް އިއުތިރާފުވުމާއި އެކުށް ކުރުމުގެ ގަސްދު އޭނާގެ ނެތުމުން އޭނާއަށް އިއްވި ޖަލު ހުކުމް ގާޒީ ވަނީ 74،400 ރުފިޔާގެ ޖޫރިމަނާގެ ހުކުމަކަށް ބަދަލުކޮށް، އެ ފައިސާ 18 މަސް ދުވަހުގެ ތެރޭގައި މީރާއަށް ދެއްކުމަށް އަންގަވައިފައެވެ.