ތަޢުލީމީ ދާއިރާއިން؛ އުނގެނުމުގައި ޚާއްޞަ އެހީއަށް ބޭނުންވާ ކުދިންނާއި މީހުންނަށް ތަޢުލީމު ފޯރުކޮށްދިނުމުގެ ރޮނގުން ހިތްވަރު ދިނުމުގެ އިނާމް ކުރީގެ ރައީސް ޑރ  މުހައްމަދު ވަހީދު ހަސަން މަނިކުގެ އަނބިކަނބަލުން އިސްވެ އުފައްދަވާފައިވާ މޯލްޑިވްސް އޯޓިޒަމް އެސޯސިއޭޝަން ލިބިއްޖެއެވެ. 

ރޭ އޮތް ޖަލްސާގައި ގައުމީ ހިތްވަރު ދިނުމުގެ އިނާމް ހާސިލްކުރި މޯލްޑިވްސް އޯޓިޒަމް އެސޯސިއޭޝަން އަށް އިނާމް ހަވާލުކުރެއްވީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހެވެ. މޯލްޑިވްސް އޯޓިޒަމް އެސޯސިއޭޝަންގެ ފަރާތުން އެވޯޑާއި ހަވާލުވެވަޑައިގެންނެވީ އެ އެސޯސިއޭޝަންގެ ފައުންޑަރ އަދި އެގްޒެކްޓިވް ޗެއާމަން އިލްހާމް ހުސައިންއެވެ. 

މޯލްޑިވްސް އޯޓިޒަމް އެސޯސިއޭޝަން އަކީ 2010 ވަނަ އަހަރު، އިލްހާމް ހުސައިންގެ އިސްނެންގެވުމުގެ މަތިން ދިވެހިރާއްޖޭގައި އޯޓިޒަމް ހުންނަ ކުދިންނަށް ތައުލީމާއި ތަމްރީން ދިނުމަށާއި، އޯޓިޒަމާއި ބެހޭގޮތުން ހޭލުންތެރިކަން އިތުރުކުރުމަށް ޕްރޮގްރާމްތައް ހިންގުމުގެ މަގުސަދުގައި އުފައްދާފައިވާ އަމިއްލަ ޖަމިއްޔާ އެކެވެ. 

Advertisement

އޯޓިޒަމް ހުންނަ ކުދިންނަށް ހަަމަހަމަ ފުރުސަތު ހޯދައިދިނުމުގައި މޯލްޑިވްސް އޯޓިޒަމް ސެންޓަރުގައި ނަމުގައި ވަކި ތައުލީމީ މަރުކަޒެއްވެސް އެ އެސޯސިއޭޝަންގެ ދަށުން ވަނީ އުފައްދާފައެވެ. 

ސަރުކާރުން ދެއްވާ ހިތްވަރު ދިނުމުގެ ޤައުމީ އިނާމު 19 ބޭފުޅަކަށާއި، 3 ފަރާތަކަށް ވަނީ ދެއްވާފައެވެ. މި އިނާމުތައް ދެއްވީ، މި އަހަރުގެ ޤައުމީ އިނާމު ދެއްވުމަށް ދަރުބާރުގޭގައި ރޭ ބޭއްވެވި ރަސްމީ ޖަލްސާގައެވެ. މި ޖަލްސާގައި ހިތްވަރު ދިނުމުގެ ޤައުމީ އިނާމު ލިބިވަޑައިގެންނެވި ބޭފުޅުންނަށް ރައީސުލްޖުމްހޫރިއްޔާ ދެއްވީ، ހަނދާނީ ފިލައެކެވެ.