މިއަދު "ވޮއިސް" ގެ ބަދިގެއިން މި ގެނެސްދެނީ ވަރަށް ފަސޭހައިން ވަރަށް މީރުކޮށް ފަޖީ ބްރައުނީސް ތައްޔާރުކުރާނެ ގޮތެވެ. ކިޔުންތެރިންނަށް ކަމުދާނެ ކަމަށް އުއްމީދު ކުރަމެވެ. 

1/2 ޖޯޑު ބަޓަރު  (ފިނި ކަނޑުވައި މަޑުކޮށްފައި )

2 1/2 ޖޯޑު ޗޮކްލެޓް ޗިޕްސް

4 ބިސް

1 1/4 ޖޯޑު ހަކުރު

1 މޭޒުމަތީ ސަމުސާ ކޮފީ

3 މޭޒުމަތީ ސަމުސާ އޮލިވް އޮއިލް ނުވަތަ ވެޖެޓެބަލް އޮއިލް

1 މޭޒުމަތީ ސަމުސާ ވެނީލާ އެސެންސް

2/3 ޖޯޑު ފުށް

1/2 އަން-ސްވީޓެންޑް ކޮކޯ ޕައުޑަރ

1 1/2 ސައި ސަމުސާ ބޭކިންގ ޕައުޑަރ

1/2 ސައި ސަމުސާ ލޮނު

1) ބަޓަރ ކޮޅާއި އެކު ދެ ޖޯޑު ޗޮކްލެޓް ޗިޕްސް އާވިން ދިޔާވަންދެން ކައްކާލާށެވެ. ( އާވިން ކެއްކުމަށް، ކެކި ކެކި ހުރި ފެން އެއްޗެއްގެ މަތީގައި ބަޓަރ އާއި ޗޮކްލެޓް ޗިޕްސް ތަށި ބަހައްޓައިގެން އެކުލަވާނީ އެވެ. ބަޓަރ އާއި ޗޮކްލެޓް ޗިޕްސް މެޓަލް އެއްޗެއްގައި ބަހައްޓައިގެން މެލްޓް ކުރާ ނަމަ އަވަސް ވާނެއެވެ. )

2) އިތުރު ތައްޓެއްގައި ބިހާއި، ހަކުރާއި، ކޮފީ އާއި ތެޔޮފޮދާއި ވެނީލާ އެސެންސް ފޮދު އެކުލަވާލާށެވެ.

3) ދެން މަޑުމަޑުން ހަލުވަމުން، ކުރިން ވިރުވި ޗޮކްލެޓް ޗިޕްސް މިކްސްޗަރ ބިސް މިކްސްޗަރ ތެރެއަށް އަޅާލާށެވެ.

4) އެއަށްފަހު އިތުރު ތަށްޓެއްގައި ފުށާއި، ކޮކޯ ޕައުޑަރާއި، ބޭކިންގ ޕައުޑަރާއި ލޮނު އެކުލަވައިލާށެވެ. ދެން ކުރިން އެކުލެވި މިކްސްޗަރ ތެރެއަށް މަޑުމަޑުން ފުށް މިކްސްޗަރ އަޅަމުން ހަލުވަމުންދާށެވެ. ( އެކުލަވާ އިރު މާ ބާރަށް ނުގިރައި، ފަތި ސަމްސަލެއް ކަހަލަ އެއްޗަކުން މަޑުމަޑުން އެކުލަވައިލާށެވެ)

5) ދެން ޓްރޭ އެއްގައި ކުޑަ ބަޓަރ ކޮޅެއް އުނގުޅުމަށް ފަހު، އޭގެ މައްޗަށް ފުށް ކޮޅެއް ބުރުވާލުމަށްފަހު، ބްރައުނީ މިކްސްޗަރ އެއަށް އަޅާލާށެވެ.  އެއަށްފަހު ބާކީ ހުރި ޗޮކްލެޓް ޗިޕްސް ކޮޅުވެސް މައްޗަށް އަޅާލައި، ޕްރީ ހީޓް ކޮށްފައި ހުރި އަވަނެއްގައި 180 ޑިގްރީއަށް 40-35 މިނެޓަށް ފިހެލާށެވެ.

ނޯޓް: އާއްމުކޮށް ފަޖީ ބްރައުނީސް 37-35 މިނެޓް ތެރޭގައި ތައްޔާރު ވާނެ އެވެ. ތަންކޮޅެއް ހިކިކޮށް ބްރައުނީ ހަދަން ބޭނުން ނަމަ 40 މިނެޓް ވަންދެން ފިހެލާށެވެ.