ޗާގޯސް މައްސަލާގައި މޮރިޝަސް އާއި އެއްކޮޅަށް ވޯޓު ދިނުމުން އޭގެ ސަބަބުން ދިވެހިރާއްޖޭގެ ދެކުނުގެ މަސްވެރިންނަށް ކުރާނެ ނޭދެވޭ އަސަރުތަކާއި ގުޅޭ ދިރާސާއެއް ހެދިފައި ނުވާ ކަމަށް ކުރީގެ ބަންޑާރަ ނައިބު އަދި މަޝްހޫރު ގާނޫނީ ވަކީލު ޑރ. މުހައްމަދު މުނައްވަރު ވިދާޅުވެއްޖެެއެވެ. 

ޗާގޯސް މައްސަލައާއި ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މުނައްވަރު ވިދާޅުވީ، ބައިނަލްއަގުވާމީ ކަނޑުގެ ގާނޫނުގެ ދަށުން އިގްތިސާދީ ސަރަހައްދު ދެނީ އިގްތިސާދީ ބޭނުމަށް ކަމަށެވެ. އެގޮތުން އެއީ ކަނޑުގެ ސަރަހައްދުގައި ދިރިއުޅޭ އާބާދީ އިގްތިސާދީ މަންފާއަށް ދޭ ސަރަހައްދެއް ކަމަށާ، އެއީ ކަނޑުގެ ސަރަހައްދަށް ބަރޯސާވެ، އެއިން ކައިބޮއި އުޅޭތީ އެ ބޭނުމަށް ދޭ ސަރަހައްދެއް ކަން އޭނާ ފާހަގަ ކުރެއްވިއެވެ. 

މިއާއެކު ޑރ. މުނައްވަރު ވިދާޅުވީ، މޮރިޝަސް އަކީ މަސްވެރި ގައުމެއް ނޫން ކަމަށާ، އެގައުމަށް ލިބިފައިވާ ކަނޑުގެ ސަރަހައްދުން މަސްވެރިކަން ކުރަނީ، އެހެން ގައުމުތަކުން ކަމަށެވެ. އެގޮތުން އެ ގައުމުތަކުން މޮރިޝަސް ގެ ކަނޑުގެ ސަރަހައްދުން މަސްވެރިކަން ކުރަނީ ލައިސެންސް ހޯދައިގެން ކަމަށާ، އެ މަސްބާނާ ގައުމު ތަކަކީ ދާ އަޅައިގެން މަސްވެރިކަން ކުރާ ގައުމުތައް ކަމަށެވެ. 

އެފަދައިން އެ ގައުމުތަކުން ކަން ކުރަން ފެށުމުން، ދޮށީގެ މަސްވެރިކަން ކުރާ ރާއްޖޭގެ މަސްވެރިން، މަސް ބާނަން އެކި ހިސާބުތަކަށް ދާއިރު، އެ ސަރަހައްދު ތަކުގައި ބާނާނެ މަސް ނުހުންނާނެ ކަމަށެވެ. އެހެންކަމުން، ރާއްޖެ ފަދަ މަސްވެރިކަން ކޮށްގެން ކައިބޮއި އުޅޭ ގައުމަކަށް އޭގެ ސަބަބުން ކުރާނެ އަސަރަށް ވިސްނާލަންޖެހޭ ކަމަށެވެ.