"ޗާގޯސް މައްސަލައިން ރާއްޖޭގެ ދެކުނުގެ މަސްވެރިކަމަށް ކުރާނެ އަސަރުތަކެއް ދިރާސާއެއް ނުކުރޭ!"

ޑރ. މުހައްމަދު މުނައްވަރު--ފޮޓޯ: މިނޫސް

ޗާގޯސް މައްސަލާގައި މޮރިޝަސް އާއި އެއްކޮޅަށް ވޯޓު ދިނުމުން އޭގެ ސަބަބުން ދިވެހިރާއްޖޭގެ ދެކުނުގެ މަސްވެރިންނަށް ކުރާނެ ނޭދެވޭ އަސަރުތަކާއި ގުޅޭ ދިރާސާއެއް ހެދިފައި ނުވާ ކަމަށް ކުރީގެ ބަންޑާރަ ނައިބު އަދި މަޝްހޫރު ގާނޫނީ ވަކީލު ޑރ. މުހައްމަދު މުނައްވަރު ވިދާޅުވެއްޖެެއެވެ. 

ޗާގޯސް މައްސަލައާއި ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މުނައްވަރު ވިދާޅުވީ، ބައިނަލްއަގުވާމީ ކަނޑުގެ ގާނޫނުގެ ދަށުން އިގްތިސާދީ ސަރަހައްދު ދެނީ އިގްތިސާދީ ބޭނުމަށް ކަމަށެވެ. އެގޮތުން އެއީ ކަނޑުގެ ސަރަހައްދުގައި ދިރިއުޅޭ އާބާދީ އިގްތިސާދީ މަންފާއަށް ދޭ ސަރަހައްދެއް ކަމަށާ، އެއީ ކަނޑުގެ ސަރަހައްދަށް ބަރޯސާވެ، އެއިން ކައިބޮއި އުޅޭތީ އެ ބޭނުމަށް ދޭ ސަރަހައްދެއް ކަން އޭނާ ފާހަގަ ކުރެއްވިއެވެ. 

އެތަނަށް މިދެނީވެސް އިކޮނޮމިކް ރައިޓްސް. އެތަނަށް މިދެނީ ސިޔާދަތެއްވެސް ނޫން. ސިޔާދަތީ ހައްގުތައް. ސޮވެރެއިން ރައިޓްސް ތަކެއް މިދެނީ، ސޮވެރެއިން ރައިޓްސް ގެ މާނަ އަކީ އެހެން ގައުމުތައް އެކްސްކްލޫޑް ވެޔޭ އެ ސަރަހައްދުގައި އެ ހައްގު ބޭނުން ކުރުމަށް. 

ޑރ. މުހައްމަދު މުނައްވަރު

މިއާއެކު ޑރ. މުނައްވަރު ވިދާޅުވީ، މޮރިޝަސް އަކީ މަސްވެރި ގައުމެއް ނޫން ކަމަށާ، އެގައުމަށް ލިބިފައިވާ ކަނޑުގެ ސަރަހައްދުން މަސްވެރިކަން ކުރަނީ، އެހެން ގައުމުތަކުން ކަމަށެވެ. އެގޮތުން އެ ގައުމުތަކުން މޮރިޝަސް ގެ ކަނޑުގެ ސަރަހައްދުން މަސްވެރިކަން ކުރަނީ ލައިސެންސް ހޯދައިގެން ކަމަށާ، އެ މަސްބާނާ ގައުމު ތަކަކީ ދާ އަޅައިގެން މަސްވެރިކަން ކުރާ ގައުމުތައް ކަމަށެވެ. 

ދެން ނިކަން ބައްލަވާ، އައްޑު އަތޮޅު ދެކުނުން 200 މޭލު ބޭރުން އެތަން ބައި ކޮށްފައި އެއްބައި އެވެރިންނަށް ދިނީމާ ދާ އަޅާލަނީ. ދާ އަޅާލީމާ ޓޫނާ، މައިގަނޑު ގޮތެއްގައި އަޅުގަނޑުމެން ބާނާ ޓޫނާ އަކީ މައިގްރޭޓަރީ ސްޕީޝީސް އެއް. އެއީ އެއް ތަނެއްގައި މަޑުކުރާ އެއްޗެއް ނޫން. މޮޒަންބީ، އެފްރިކާގެ ކޯސްޓުން މޮޒަންބީ އައިސް ރާއްޖޭގެ ކޯސްޓުގައި މަޑުކޮށްލާފައި ދަނީ އަނެއްކާ އެތަނަށް. އެ އަންނަ މަގުމާތީގައި ދާ އަޅަނީ. ދާ މަގުމަތީގައި ދާ އަޅަނީ. ދާއިމަށް ދާ އަޅަނީ. މިވާ ގޮތުން ވެއްޖެއްޔާ. އެޅީމަ ދެން ދެކުނުގެ މަސްވެރިކަމަށް ކިހިނެއްތޯ ވާނީ؟ އެވަރަށް ދިރާސާއެއް ނެހެދޭ. 

ޑރ. މުހައްމަދު މުނައްވަރު

އެފަދައިން އެ ގައުމުތަކުން ކަން ކުރަން ފެށުމުން، ދޮށީގެ މަސްވެރިކަން ކުރާ ރާއްޖޭގެ މަސްވެރިން، މަސް ބާނަން އެކި ހިސާބުތަކަށް ދާއިރު، އެ ސަރަހައްދު ތަކުގައި ބާނާނެ މަސް ނުހުންނާނެ ކަމަށެވެ. އެހެންކަމުން، ރާއްޖެ ފަދަ މަސްވެރިކަން ކޮށްގެން ކައިބޮއި އުޅޭ ގައުމަކަށް އޭގެ ސަބަބުން ކުރާނެ އަސަރަށް ވިސްނާލަންޖެހޭ ކަމަށެވެ. 

Advertisement

ކޮމެންޓް