ދައުލަތާއި ދެކޮޅަށް ހުށައަޅާ ކޮންމެ މައްސަލައެއް ކޯޓުން ބޭރުން ނިންމުމަށް ބަންޑާރަ ނައިބު މަސައްކަތް ކުރައްވާކަން ފާހަގަކުރައްވާ ޑރ މުހައްމަދު މުނައްވަރު ކަންބޮޑުވުން ފާޅުކުރައްވައިފިއެވެ.
ޗާގޯސް މައްސަލައާއި ގުޅިގެން ޑރ މުނައްވަރު ބޭއްވި ޕްރެސް ކޮންފަރެންސްގައި ވާހަކަދައްކަވަމުން ވިދާޅުވީ ދައުލަތާއި ދެކޮޅަށް މައްސަލައެއް ހުށައަޅާއިރަށް، ކޯޓުން ބޭރުން އެ މައްސަަލަ ނިންމުމަށް މަސައްކަތް ކުރަމުންދާކަމަށެވެ. ކޯޓުން ބޭރުން މައްސަލަ ނިންމީމާ އަމިއްލަ އިޚްތިޔާރުގައި ބައެއް ދޭން އެއްބަސް ވެވުނީކަމަށް ޑރ މުނައްވަރު ވިދާޅުވިއެވެ.
ދައުލަތާއި ދެކޮޅަށް ހުށައެޅޭ މައްސަލަތަކުގައި ޝަރީއަތް ނިމެންދެން މަޑު ނުކުރެވެންވީ ސަބަބަކީ ކޮބައިތޯ އެބޭފުޅާ ވަނީ ސުވާލު އުފައްދަވާފައެވެ. އަދި އެފަދައިން ބަންޑާރަ ނައިބު އަމަލުކުރައްވަމުން ދާ ދިއުމާއި ގުޅިގެން ދައުލަތަށް ބޮޑެތި ގެއްލުންތަކެއް ލިބިގެންދާނެކަމަށް ފާހަގަކުރައްވާ ޑރ މުނައްވަރު ވަނީ ދައުލަތުގެ މާލިއްޔާ ހިތު ހުރި ގޮތަކަށް ބަހާލުމަކީ ބަންޑާރަ ނައިބަށް ލިބިގެންވާ ހައްގެއްތޯ އައްސަވާ ސުވާލުކުރައްވާފައެވެ.
"ތިބޭފުޅުން އަޅެ ވިސްނާވަޑައިގެން ވިދާޅުވެބައްލަވާ ބަންޑާރަނައިބަށް ކޮން ހައްގެއްތޯ އޮތީ ދައުލަތުގެ މާލިއްޔަތު ބަހާލަން. ކީއްވެތޯ ޝަރީއަތް ނިމެންދެން މަޑުނުކުރެވެނީ؟ ދިފާއު ނުކުރެވޭނެތީތޯ؟ ދައުލަތުގެ ޕޮސިޝަން ދިފާއު ނުކުރެވޭނެތޯތޯ އޭ ތިޔަ ކޯޓުން ބޭރުން އެއްބަސް ވަނީ އިރުކޮޅުކޮޅާ؟"
ޑރ މުހައްމަދު މުނައްވަރު
އެއާއެކު ޑރ މުނައްވަރު ވަނީ ކޯޓުން ބޭރުން ކަންކަން ނިންމުމުގެ ފުރުސަތަކީ އޭޖީއަށް ފުޅާކޮށް ލިބިފައިވާ ފުރުސަތެއްގެ ގޮތުގައި ބާއްވަން ވާނެތޯވެސް އައްސަވާފައެވެ.
ކޯޓުތަކަށް އިތުބާރު ނުކުރެވޭކަމަށް ވާނަަމަ، ކޯޓުތަކުގައި ތިއްބެވި ފަރާތްތައް ބަދަލުކޮށްގެންވެސް ދައުލަތާއި ދެކޮޅަށް ހުށައެޅޭ މައްސަލަތައް ނިންމަންވާނީ ޝަރިއަތުންކަމަށް ޑރ މުނައްވަރު ވަނީ ވިދާޅުވެފައެވެ. އަދި އެ ނޫން ގޮތަކަށް އެކަން ކުރެއްވުމަކީ ދައުލަތުގެ މަސްލަހަތު ފުށޫ އަރާނެ ކަމެއްކަމަށް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
