މިދިޔަ އަންގާރަ ދުވަހު ފުލުހުން ހިންގި އޮޕަރޭޝަނެއްގެ ތެރެއިން ގދ.ހޯޑެއްދޫއިން ހައްޔަރުކޮށް ފުލުހުންގެ ބެލުމުގެ ދަށަށް ގެނެސްފައިވަނިކޮށް ނިޔާވި ޕީޕީއެމްގެ ގދ. ހޯޑެއްދޫ ސްޓިއަރިން ކޮމިޓީގެ ރައީސް، ރަޝީދުގެ ހަށިގަނޑު ޢާއިލާ އާއި ހަވާލުކުރުމަށް ގޮވާލައި ރޭ އިދިކޮޅުން ކުރިއަށް ގެންދިޔަ އިހްތިޖާޖުގެ ތެރެއިން 4 މީހަކު ހައްޔަރުކޮށްފިއެވެ.
ރަޝީދުގެ ހަށިގަނޑު ޕޯސްޓްމޯޓަމް ނުހަދައި ޢާއިލާއާއި ހަވާލު ކުރުމަށް ޢާއިލާއިން އެދެމުން ދިޔަނަމަވެސް، އޭނާގެ ޕޯސްޓްމޯޓަމް ހަދާނެ ކަމަށް ފުލުހުން ވަނީ މީގެ ކުރިން ބުނެފައެވެ. އަދި އެ މައްސަލަ މިހާރު ބަލަމުންދާ ނެޝަނަލް އިންޓެގްރިޓީ ކޮމިޝަން (އެންއައިސީ) އިން ރޭ ނެރުނު ބަޔާނުގައިވެސް ފުލުހުންގެ އެ ނިންމުން ބަދަލު ނުކުރާ ކަމަށާ، އެ ކޮމިޝަނުންވެސް ނިންމާފައިވަނީ ޕޯސްޓްމޯޓަމް ހެދުމަށް ކަމަށް ކަމަށް ވަނީ ބުނެފައެވެ.
އެކަމާއި ގުޅިގެން ކަންބޮޑުވުން ފާޅުކޮށް ޕީޕީއެމް އޮފީސް ކުރިމަތީގައި އިދިކޮޅު ޕީޕީއެމް/ ޕީއެންސީ ކޯލިޝަނުން ރޭ ކުރިއަށް ގެންދިޔަ އިހްތިޖާޖުގެ ތެރެއިން ބައިވެރިންވަނީ ހަަށިގަނޑު އާއިލާއާ ހަވާލުކޮށް ވަޅުލުން އަވަސް ކުރުމަށް ގޮވާލާފައެވެ. އަދި ރަޝީދުއަށް އިންސާފު ހޯދައިދިނުމަށް އިހްތިޖާޖުގެ ބައިވެރިން ވަނީ ގޮވާލާފައެވެ.
މީގެ އިތުރުން، ރޭގެ އިހްތިޖާޖްގައި އިދިކޮޅުން ވަނީ ފޯޅަވަހީގެ މައްސަލާގައި ރާއްޖެއިން މޮރިޝަސް ކޮޅަށް ތާއިދުކުރަން ނިންމެވުމާއި ގުޅިގެންވެސް ކަންބޮޑުވުންފާޅުކޮށްފައެވެ.
ރޭގެ އިހްތިޖާޖް ފެށިތާ މާގިނައިރެއް ނުވެ، ފުލުހުންވަނީ ބާރުގެ ބޭނުން ކޮށްގެން މުޒާހަރާ ރޫޅާލާފައެވެ. އަދި މުޒާހަރާ 4 ބައިވެރިއެއްވެސް ވަނީ ފުލުހުންގެ ބެލުމުގެ ދަށަށް ގެނެސްފައެވެ.
Advertisement
This content is created and paid for by advertisers and does not involve Voice Journalists
