ވަޒީފާއަށް ދިޔުމަށްޓަކައި ހެދުނު ހެނދުނާ ތެދުވާއިރު، ފަތިސް ނަމާދު އޭގެ ވަގުތުގައި އަދާކުރުމަށް މުހިއްމުކަން ދެނީ ކިތައް މީހުންތޯ މިއަދުގެ ހުކުރު ޚުތުބާގައި ސުވާލުކޮށްފިއެވެ.

"ހަގީގީ ބާއްޖަވެރިކަން" މި މައުލޫއަށް ހާއްސަކޮށްގެން މިއަދު ދިން ހުތުބާގައި ބުނީ މާތް ﷲ އާމެދު އަޅާގެ ހިތުގައި އޮންނަ ޔަގީންކަމާއި ބަރޯސާއަކީ އިންސާނާއަށް ބާއްޖަވެރިކަން ގެނެސްދޭ ކަމެކެއް ކަމަށެވެ. އަދި އެ ޔަގީންކަން ލިބޭނީ ހަމައެކަނި އީމާންކަމުން ކަމަށެވެ.

އެގޮތުން، ކުރެވުނު ހެޔޮ އަމަލުތަކުގެ ސަބަބުން ތިބާއަށް ބުނަންވެސް ނޭނގޭހާއި ހިތްހަމަޖެހުމާއި އުފާވެރިކަން އިޙްސާސް ކުރެވޭނެ ކަމަށާ އެހެނީ އޭގެ ސަބަބުން ﷲ ތަޢާލާއާއި އެމީހަކާއި ދެމެދު އެ ގާއިމު ކުރެވުނީ މަތިވެރި މުޤައްދަސް ގުޅުމެއް ކަމަށެވެ. އަދި އެއީ އެމީހާގެ އަމާޒަކީ، އަދި ޙަޔާތުގެ މަގްސަދަކީ ވެސް، ﷲ ތައާލާގެ ރުއްސެވުން ލިބިގަތުން ކަމުގައިވާތީ ލިބޭ ހިތްހަމަޖެހުމެއް ކަމަށްވެސް ޚުތުބާގައި ބުނެފައިވެއެވެ.

"އެ އަމާޒަށް ވާޞިލު ވެވިއްޖެނަމަ، ތިބާއަށް ހިތްހަމަޖެހުމާއި އުފާވެރިކަން ލިބުނީއެވެ. އެ އުފަލާއި ހިތްހަމަ ޖެހުމަކީ މަޤާމަކުން، މީހަކު ބުނެލާ ބަހަކުން އަދި ފައިސާއަކުން ހޯދޭނޭ އެއްޗެއް ނޫނެވެ." ޚުތުބާގައި ބުންޏެވެ.

މިއާއެކު ޚުތުބާގައި ބުނީ، މިއަދު ކޮންމެ މީހަކުވެސް ގަދައަޅައި، ބުރަ މަސައްކަތް ކުރަނީ، އުފާވެރި، ހިތްހަމަޖެހޭ ދިރިއުޅުމެއް ހޯދުމަށް ކަމަށެވެ. އެގޮތުން އެކިއެކި ކަންކަމުގައި އަވަދިނެތި މަޟްޢޫލުވެގެން، ބާއްޖަވެރިކަން ދެއްވުމަށް ވަޢުދުވެވޮޑިގެންނެވި ގަދަކީރިތިވަންތަ ﷲ ސުބުޙާނަހޫ ވަތައާލާ ހަނދުމަކުރަން ވެސް ހަނދާނެއް ނުހުންނަ ކަމަށް ޚުތުބާގައި ބުންޏެވެ. 

"އެ ކަލާނގެ އެންމެ ބޮޑަށް ލޯބިވެވޮޑިގަންނަވާ ފަރުޟު ފަސްނަމާދު މަތިންވެސް ހަނދާން ނުހުރުއެވެ. މާތް ﷲ އެންމެ ބޮޑަށް ލޯބިވެވޮޑިގަންނަވާ އަޅުކަމަކީ ނަމާދެވެ. ނަމާދަށް ރައްކާތެރިނުވެ، ކިތަންމެ ބުރަ މަސައްކަތެއް ކުރިކަމުގައި ވިޔަސް ބާއްޖަވެރިކަން ލިބޭނީ ކިހިނަކުން ހެއްޔެވެ؟ ލޮބުވެތި ނަބިއްޔާ ބިލާލުގެފާނަށް ހަދީޘްކުރެއްވިއެވެ. ” އޭ ބިލާލުވެ! ނަމާދަށް ގޮވާލާށެވެ! ނަމާދުން އަހަރެމެންގެ ހިތްތަކަށް ހަމަޖެހުން ގެނެސްދޭށެވެ!” އަދި ފަތިސް ނަމާދުގެ ސުންނަތް ދެ ރަކުޢަތް ކުރާމީހަކަށް ހުރި ބާއްޖަވެރިކަމާއި، ދަރުމައިގެ މަތިވެރިކަން ބަޔާންކުރައްވަމުން އިތުރު އެކަލާގެފާނު ހަދީޘް ކުރެއްވިއެވެ. ” ދުނިޔެއާއި ދުނިޔޭގައި ވާހައި އެއްޗަކަަށްވުރެ ފަތިސް ނަމާދުގެ ސުންނަތް ދެ ރަކުޢަތް މާ ހެޔޮކަން ބޮޑުވެގެންވެއެވެ.” ޚުތުބާގައި ބުނެފައިވެއެވެ.

ހަޤީޤީ ބާއްޖަވެރިކަމަކީ އެއީ ކަމުގައި ވާއިރު އެ މަތިވެރިކަމާއި ބާއްޖަވެރިކަން ޙާސިލުކުރުމަށްޓަކައި ނަމާދަށް ފަރުވާތެރި ވަނީ ކިތައް މީހުންތޯ ޚުތުބާގައި ވަނީ ސުވާލުކޮށްފައެވެ. އަދި ވަޒީފާއަށް ދިޔުމަށްޓަކައި ހެދުނު ހެނދުނާ ތެދުވާއިރު، ފަތިސް ނަމާދު އޭގެ ވަގުތުގައި އަދާކުރުމަށް މުހިއްމުކަން ދެނީ ކިތައް މީހުންތޯވެސް ޚުތުބާގައި ވަނީ ސުވާލުކޮށްފައެވެ.

އުފާވެރި ބާއްޖަވެރި ދިރިއުޅުމެއް ބޭނުންވާނަމަ، ބާއްޖަވެރިކަމުގެ ދެ އަސާސު ކަމުގައިވާ އީމާންކަމާއި ﷲ އަށް ކިޔަމަންތެރިކަން އަދާކުރުމަށް އަވަސްވެގަތުމަށް ޚުތުބާގައި ވަނީ އެންމެހައި މުސްލިމުތަކުންނަށް ވަޞިއްޔަތްކޮށް ނަސޭހަތްތެރިވެފައެވެ.