ގދ. ހޯޑެއްދޫއިން ފުލުހުން ހޯދި މަސްތުވާތަކެއްޗަކީ އަންގާރަ ދުވަހު އެރަށުން ހައްޔަރު ކުރި މީހެއް ފޮރުވާފައި ހުރި މަސްތުވާތަކެތި ކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެެއެވެ. 

ހަމީދު މިއަދު ކުރެއްވި ޓުވީޓެއްގައި ވިދާޅުވީ، މަސްތުވާތަކެތި ރާއްޖެ އެތެރެކުރިކަމުގެ ތުހުމަތަށް ހައްޔަރުކުރެވުނު ގދ. ހޯޑެއްދޫ، ސްވެން ރަޝީދު ފުލުހުންގެ ހައްޔަރަށް ގެނެވިފައިހުއްޓާ ނިޔާވުމަކީ ވަރަށް ހިތާމަވެރިކަމެއް ކަމަށެވެ. އަދި އެކަމުގައި ފުލުހުންގެ އިހުމާލެއް އޮތްތޯބެލުމަށް ހިންގާ ތަހުގީގަށް ފުރިހަމަ އެއްބާރުލުން ދޭނެ ކަމަށްވެސް އޭނާ ވިދާޅުވިއެވެ. 

މިއާއެކު ހަމީދު ވިދާޅުވީ، އެ މައްސަލައާައި ގުޅިގެން ހައްޔަރުކުރެވުނު އެހެން ފަރާތެއް ގދ. ހޯޑެއްދޫ ވަލުތެރޭގައި ވަޅުލައި ފޮރުވާފައިހުރި ގިނައަދަދެއްގެ މަސްތުވާތަކެތި ފުލުހުންގެ ޓީމުން ހޯދާފައިވާކަމަށެވެ. އަދި ގދ. ހޯޑެއްދޫގެ އެހެނިހެން ތަންތަން ކުރިއަށް އޮތްވަގުތުތަކުގައިވެސް ފުލުހުން ބަލާފާސްކުރާނެ ކަމަށް ހަމީދު ވިދާޅުވިއެވެ. 

މިދިޔަ އަންގާރަ ދުވަހު ފުލުހުން ހިންގި އޮޕަރޭޝަނެއްގެ ތެރެއިން ގދ.ހޯޑެއްދޫއިން ހައްޔަރުކޮށް ފުލުހުންގެ ބެލުމުގެ ދަށަށް ގެނެސްފައިވަނިކޮށް މެޔަށް ތަދެއް އަރައި، އެކަމަށް ފަރުވާ ނުދެވި ނިޔާވި ރަޝީދު ނިޔާވެފައިވަނީ ފުލުހުންގެ އިހުމާލުން ކަމަށް އާއިލާއިން ތުހުމަތު ކުރެއެވެ. އެގޮތުން ފުލުހުން އޭނާ ހައްޔަރު ކޮށްގެން ލޯންޗަށް އެރުވި ތަނުން މެޔަށް ތަދުވާ ކަމަށް ބުނި ކަމަށާ، އެ ވޭނުގައި އޭނާ އުޅުނު އިރުވެސް ފުލުހުން ބުނެފައި ވަނީ އޭނާ "އެކްޓް" ޖައްސަނީ ކަމަށް ކަމަށް އާއިލާއިން ބުނެއެވެ. 

އަދި ރަޝީދު އެގޮތަށް އުޅެން ފެށުމުން އެރަށު ކައުންސިލްގެ ނާއިބު ރައީސް އާއި، ރައްޔިތުންގެ މަޖިލީހުގެ މަޑަވެލި ދާއިރާގެ މެމްބަރު ހުސެއިން ފިރުޝާން އާއި، ހޯޑެއްދޫ ހޮސްޕިޓަލު މެނޭޖަރުވެސް އެ ތަނަށް ދިޔަ ކަމަށާ، އަދި ރަޝީދު ހޮސްޕިޓަލަށް ގެންދެވެން ނެތް ނަމަ، އެ ތަނަށް ޑޮކްޓަރ ގެނެސްދެވޭނެ ކަމަށްވެސް ހޮސްޕިޓަލު މެނޭޖަރު ބުނި ކަމަށްވެސް ރަޝީދުގެ މަންމަ ބުނެއެވެ. އެހެން ނަމަވެސް، އެގޮތަށްވެސް އެއްބަސް ނުވެ، އެގޮތުގައި ދެ ގަޑިއިރުވެ ދިޔަފަހުުން އޭނާ ނިޔާވި ކަމަށާ، ނިޔާވުމުންވެސް ނިޔާވި ޚަބަރުވެސް ޢާއިލާއަށް ނުދީ، މަޑަވެލީ ހޮސްޕިޓަލަށް އޭނާގެ ހަށިގަނޑު ލުމަށްފަހު ފުލުހުން ދިޔައީ ކަމަށްވެސް ރަޝީދުގެ މަންމަ ބުންޏެވެ. 

ރަޝީދުގެ މަންމަ އިތުރަށް ބުނީ، ރަޝީދު ނިޔާވިކަން އެނގުނީ މަޑަވެލިން މީހަކު ގުޅާފައި ބުނުމުން ކަމަށާ، އޭނާ މަޑަވެއްޔަށް ގެންދިޔަ ލޯންޗުގެ ލޯންޗުތެރޭގައި ވެސް ވަރަށް ރޯ އަޑު އިވުނު ކަމަށް ލޯންޗުގައި ތިބި މީހުންގެ ފަރާތުން މައުލޫމާތު ލިބުނު ކަމަށެވެ. އަދި އެގޮތުގައި އެތައް އިރެއް ވުމަށްފަހު، ހުއްޓި ޖެހި، އަނގައިން ފޮނު އަރާފައި ނިޔާވި ކަމަށް ލޯންޗުގައި ތިބި މީހުންގެ ފަރާތުން ކިޔައިދިން ކަމަށްވެސް ރަޝީދުގެ މަންމަ ބުންޏެވެ.